Ayubu 23 - KITABU KITAKATIFU

¹ Hene yaho Ayubu ya tivula, na a vola

² Kuduka lero lilira lyange li veye nobululu: Likuywa lyange li veye liliduhu kuvita likenya lyange.

³ O, nkano mmanya ha nyala kumunyola Nduke kali ha intebe yeye

⁴ Nkano nda mu lohidzira livola lyange a li manye, Nokwizulitsa munwa gwange mativuli.

⁵ Nkano mmanyi makuva ga a ntivulira Nokumanyeridza aga a mbolera.

⁶ A nyala kuhing'ana ninze mbunene bwobunyali bwibwe? Auwa; navutswa a la hulira likuva lyange.

⁷ Ha zana avalungi nkano va ka lohidzana imbiri wewe; Ma nda honywa ku mukalagi wange mihiga nemihiga.

⁸ Henza, ntsitsanga imbiri, naye si a veye ho mba; Nzirana inyuma navutswa si nyala kumulola;

⁹ Ntsitsanga haluvega lwomukono mmosi, ha a kolanga miyinzi navutswa si nyala kumulola; Yivisa ku luvega lwomukono mulungi, mbule kumulola.

¹⁰ Navutswa a manya inzira ya ntsitsa ku; Na a mali kungeridza nda twula kuli ithahabu.

¹¹ Kirenge kyange ki handi ligali ku tsinduvatiru tsitsye; N gumiye ligali inzira yeye, si ntsia haluvega.

¹² Si nzirani inyima kuleka lilaga lyeminwa gyigye mba; Nzivikiye akiba yamakuva gomunwa gwigwe kuvita vyokulia vyange.

¹³ Navutswa a veye nomwoyo mulala, ni bwaha u nyala kumugirunkannya? Kandi kyomwoyo gwigwe gu yanza, nikyo kya a kolanga.

¹⁴ Kigira a dukidza kya nda lagwa: Kandi vindu vinyingi kuli yivi vi veye halala naye.

¹⁵ Kigira yaga mbendanga mwoyo imbiri wewe: Lwa ng'anagananga, nda mu tia.

¹⁶ Kigira Nyasaye u koli mwoyo gwange kudendeya, Na Wanyala Vyosi a ntihidzi;

¹⁷ Kigira si nda kalagwa kutwulidzwa, kisundi ni ki kikiri kuduka, Kandi si ya kunika kisundi kinene ki vule kuva mmoni mwange.