Ayubu 21 - KITABU KITAKATIFU

¹ Hene yaho Ayubu ya tivula, na a vola,

² Mu hulire ligali livola lyange; Yaga ga ve kilema mwoyo kyenyu.

³ Mu ndeke, na inze nda vola; Na lwa mmali kuvola, mu mede kihenyahenye kyenyu.

⁴ Mu makuva gange, liyala lyange li veye imbiri womundu? Kigira ki mbule kwikudzira mwoyo?

⁵ Mu mbenze nokugenya, Mu vike amakono genyu ku minwa gyenyu.

⁶ Kuduka lwa nzidzulitsanga mbereranga, Na litihidza li gumiye mubiri gwange.

⁷ Kigira ki avadamano va veye mwoyo Nokugwa avasakulu, yee, nokumedeka kuva netsingulu?

⁸ Visukululwi vyavo vi dinyeridzeywi halala navo imbiri wetsimoni tsyavo Na vivulwa vyavo imbiri wetsimoni tsyavo.

⁹ Tsinyumba tsyavo tsi veye nemirembe, si tsi veye nobutii mba, Na impimbo ya Nyasaye si i veye kuvo mba.

¹⁰ Igiriki yavo yivulanga, na si i gehera tsingulu tsyayo mba; Idwasi yavo yivulanga, na si i logosa mba.

¹¹ Va hilanga avana vavo kyova kuli kyayo kya magondi, Navana vavo va kinanga bukino.

¹² Vimbanga halala nevikuli nobukana bwemigoye, Nokusangalira mwoyo gwelilere.

¹³ Amadiku gavo va tumekiranga mu ligasidzwa Kandi va sulungutanga Mung'ani bwangu.

¹⁴ Va volera Nyasaye, Twula ku kwinye; Kigira si kwenya limanya lyetsinzira tsitsyo.

¹⁵ Uyu Wanyala Vyosi ni kindu ki, ku mu tumekire? Ku la nyola vyambeti ki ni kumusaala?

¹⁶ Henza, ligasidzwa lyavo si li veye mmukono gwavo: Livola lyavadamano li veye ihale ninze ligali.

¹⁷ Ga li ndi itaya yavadamano kusiminywa hali kanyingi? Na kivi kyavo ki duka kuvo? Na Nyasaye a va gavulira ubululu mbutima bwibwe?

¹⁸ Na va veye kuli amavululi imbiri wembuudza Na kuli mukudzi gu hilangwa nekihudzudzi?

¹⁹ Mu inye mu volanga, Nyasaye a vikira avana veve ubudamano bwibwe. Yetunge mwene, a duke kumanya:

²⁰ Tsimoni tsitsye mwene tsi lole ubwoneku bwibwe, Kandi a nwe ubutima bwa uyu Wanyala Vyosi.

²¹ Kigira a veye nobuyanzi ki mu inyumba yeye inyima wewe, Livalidzwa lyemyeli gyigye lwa gyi kalagwa hagati?

²² Ku vosi mundu a legidza Nyasaye ubugeeri, Kigira uyu a kalagiranga ava veye igulu?

²³ Mundu mulala a kudzanga mu tsingulu tsitsye tsindukiru, Wokumenya nemirembe nokwelemeridza:

²⁴ Tsimbeere tsitsye tsizuye amaveere, Nobulahi bwombigumba vivye bu doti.

²⁵ Wundi a kudzanga mu litsunwa lyomwoyo gwigwe, Na si a tsatsamanga kilahi tsinyinga tsyosi mba.

²⁶ Yava va gonanga hasi mu lugukyi halala, Na tsing'ende tsi va kunika.

²⁷ Henza, mmanya tsiganagani tsyenyu Nelisaavira lya mu saaviye ubudamano ku inze.

²⁸ Kigira mu vola, Inyumba yomunene i veye haliha? Nelihema lyavadamano va menyanga mu, li veye haliha?

²⁹ Si mu tevi ava vitanga ku inzira? Na ga va lolekidza si mu manya,

³⁰ Mundu mudamano a vikangwa ku lidiku lyekivi? Va hileywi kyova ku lidiku lyobutima?

³¹ Ni bwaha u lilwadza inzira yeye imbiri wewe? Kandi ni bwaha u li mu tunga ku vyosi vya ya kola?

³² Halala na yaga a la hilwa mu kilindwa Navandu va la linda ku impira yeye.

³³ Makindi gomivona ga la va manolu kuye, Navandu vosi va la mu londa, Kuli va li ho avandu ava ta valika imbiri wewe.

³⁴ Kunangwa ga li ndi mwinye mu neminya vutswa mwoyo, Kigira mu mativuli genyu bu tigaye ububehi bwere?