Ayubu 17 - KITABU KITAKATIFU

¹ Mwoyo gwange gu hidzanga, na madiku gange ga heri, Kilindwa kyetegeki ku mbugula.

² Ligali va veye ho halala ninze ava kolanga kihenyahenye, Na imoni yange i henzanga ubululu bwavo.

³ Kalunu u haane kihambiriru, u ve kihambiriru kigira inze halala nive mwene: Ni bwaha u veye ho u bugirira kukupannya ninze umukono?

⁴ Kigira myoyo gyavo u gyi visi si gyi veye nelimanya: Kigira yaga si u la va nenehidza mba.

⁵ Uyu u hudziridzanga avalina veve ku linyola kidieli, Kali tsimoni tsyavana veve tsi la kuvuka;

⁶ Navutswa u nkoli ulugano mu vandu; Ngwiye wokudunyirwa havulavu.

⁷ Imoni yange i tsengeye kigira livererera, Na vivero vyange vyosi vi veye kuli kiriri.

⁸ Avalungi va la genyira yaga, Na u ta li nelihyolo a levukidza mwene ku uyu u ta tia Nyasaye.

⁹ Mulungi a la tsitsagil'la ku inzira yeye, Na uyu u veye namakono manifu a la meda kunyola tsingulu.

¹⁰ Navutswa mwirane mwinye mwosi, hambi kalunu; Si nda nyola mundu wobugeeri kali mulala hagati henyu mba.

¹¹ Madiku gange ga fweye, lyenya lyange li vuniki, Kali tsiganagani tsyomwoyo gwange.

¹² Va girunkannyanga ubudiku kuva mbasu: Ubulavu, ra vola, bu veye himbi ku kisundi.

¹³ Ni mbenza Mung'ani kuli inyumba yange; Ni nzala kitali kyange mu kisundi

¹⁴ Ni mbolera lidividza, Ive u veye dada wange; Nokuvolera ing'ende, Ive u veye mama wange, nambotso wange;

¹⁵ Ku gene yaga lisuuvira lyange li veye haliha? Kandi ku makuva gelisuuvira lyange, ni bwaha u li lola?

¹⁶ Li la sulunguta kuduka ku kiheri kyo Mung'ani, Ha bwelemeridzi bu li va mu lugukyi.