Ayubu 13 - KITABU KITAKATIFU

¹ Henza, imoni yange i loli yaga gosi, Gutu gwange gu huliye nokugamanya.

² Ga mwinye mu manya, na inze manyi ga zana: Inze si mbeye mukekeke ku mwinye.

³ Ligali nkano nda ka volerana no Wanyala Vyosi, Na nyenyanga kulohidzana na Nyasaye.

⁴ Navutswa mwinye mu veye avakongi vamakuua gobubehi; Mwinye mwosi mu veye avetsinyasi va ta veye nobukonyi.

⁵ Nkano mu bugiriye kukiring'ana ligali Nkano yaga ga ka va ubugeeri bwenyu.

⁶ Kalunu mu hulire livuula lyange, Mu huliridze lihing'ana lyeminwa gyange.

⁷ Mwinye mu la volera ga ta li bulungi ku luvega lwa Nyasaye, Nokuvola nobugadi ku luvega lwa uyu?

⁸ Mu la bugirira mumoni mwimwe? Na mu la hing'ana kigira Nyasaye?

⁹ Nobulahl uyu yidere mwinye? Kinga kuli mulala a gadanga mundu, mu la gada uyu?

¹⁰ Ligali a la gondokera mwinye, Ni mu va ni mweridzanga ku vandu makiriri.

¹¹ Ubukumi bwibwe bunene si bu la tihidza mwinye, Na litihidza lilye si li la gwa ku mwinye?

¹² Livola lyenyu lyokwidzulitswa veye tsing'ano tsyeligoke, Madigi genyu ga veye madigi gobudohi.

¹³ Mu kiring'ane, mu ndeke tsyeng'ine, nduke kuvola Na gadzanga ku inze, gadze.

¹⁴ Mbugule inyama yomubiri gwa nge mu amino gange, kigira ki, Nokuvugula livamwovo lyange mu mukono gwange?

¹⁵ Kali ni ya nziita, nda mu suuvira ndiyo; Halala na yaga nda lungekidza inzira yange imbiri wewe.

¹⁶ Yaga kandi ga la va ubuhonyi bwange, Kigira mundu u vula kutia Nyasaye, si a lisunda imbiri wewe mba.

¹⁷ Mu huliridze livola lyeminura gyange Na livuula lyange lingire mu matu genyu.

¹⁸ Henza, kalunu mmali kulohidza likuva lyange; Inze manya mbeye mulungi.

¹⁹ Ni bwaha uyu u hing'ana ninze? Kigira kalunu nda kiring'ana nokutwulidza mwoyo.

²⁰ Navutswa mu ta nkolera makuva gaviri mba; Hene yaho si ndivisa kutwula mmoni mumwo mba:

²¹ Twulidza mukono gugwo gu ve ihale ku inze; Litihidza lilyo li vule kuntihidza.

²² Kunangwa u lange, na inze nda bugirira; Kinga, leka mbole, na ive u ntivulire.

²³ Ubudamano bwange nobwoni bwange bu veye bwanga? U mannye nduke kumanya lihyolo lyange nobwoni bwange.

²⁴ Kigira ki u visi mmoni mumwo, Nokuvola ku inze kuva musigu wowo

²⁵ U la vika kivi ku litu li hinulannyangwa? Na ive u la londerera mavivi amumu?

²⁶ Kigira ive u ng'oda makuva gobululu ku inze, Nokuhaana ku inze ubudamano bwobusoleli bwange:

²⁷ Kandi u vika virenge vyange mu mikatale, Nokuligula tsinzira tsyange tsyosi; Welombera lwako kukumbiridza tsinduvatiru tsyange:

²⁸ Kali ni mbeye kuli kindu kya gunduluka, Kuli ingubo yetsisere tsya lia.