Ayubu 12 - KITABU KITAKATIFU

¹ Hene yaho Ayubu ya tivula, na a vola,

² Ligali ni mwinye mweng'ine ava mu veye avandu Nobugeeri bu la kudza halala nemwinye, lwa mu kudza.

³ Navutswa inze kandi mbeye nelimanya kuli mwinye; Inze si mbeye mukekeke ku mwinye mba: Yee, ni bwaha u vula kumanya vindu kuli yivi?

⁴ Inze mbeye-mulala u veye kyokusekwa ku vakye, Mbeye mund u wanira Nyasaye, naye ya mu tivulira: Mulungi, mundu mudukiru, u gwiye kyokusekwa.

⁵ Mu tsiganagani tsya uyu u veye mbwelemeridzi mu veye nelilega ku kivi; Kyetegekira yavo ave kirenge kyavo ki tererekanga.

⁶ Mahema gavanuli ga gasidzangwa, Na va vihiriridzanga Nyasaye va veye mu mirembe Ava Nyasaye a letanga mmakono gavo vindu vinyingi.

⁷ Navutswa kalunu u teve tsinyama, na tsi legidza ive; U teve manyonyi gombwerefu, na ga la ku volera:

⁸ Kinga u volerane nelirova, na li la kwegidza; Na tsisudze tsyomunyanza tsi la kwilwadzira.

⁹ Ni bwaha u ta manya mu vindu yivi vyosi, Gu veye mukono gwa Yahova gu lombi yaga,

¹⁰ Welivamwoyo lya vyosi vi veye mwoyo li veye mmukono gwigwe, Na myika gyavandu vosi?

¹¹ Ugutu si gu geridza makuva, Kuli tsintama tsi tsatsamanga vyokulia?

¹² Ubugeeri bu veye halala navasakulu, Na mu madiku matambi limanya li veye mu.

¹³ Ubugeeri nobunyali vi veye halala na Nyasaye; A veye namakuva nelimanya.

¹⁴ Henza, a sambulanga, na si vi nyalika kwombakwa kandi; A bohanga mundu musatsa, na liboholola si li nyalika mba.

¹⁵ Henza, yigaliranga madzi, nago ga kamanga; Kandi a ga hilanga kyova, nago ga tung'aminyanga lirova.

¹⁶ Tsingulu nobugeeri vi veye halala naye; Uyu u gadangwa na mugadi vombi na veve.

¹⁷ Yimiriranga vavoli va tsie ni va lanyeywi, Navakalagi a va kolanga vasiru.

¹⁸ A dendeyidzanga kibohera kyavami Nokuboha vikenge vyavo nolukova.

¹⁹ Yimiriranga avasalisi va tsie ni va lanyeywi, Nokutung'aminya avaluviriri.

²⁰ A twulidzanga livola lya ava dinyeridzwa, Na a twulidzanga limanya lyavasakulu.

²¹ A tsukanga tsisoni ku vanene, Na a dendeyidza musipi gwavetsingulu.

²² A vuulanga vindu vyomu luliva kutwula mkisundi, Na kiriri kyelikudza a ki letanga mu bulavu.

²³ A medanga tsihiri, kandi a tsi dividza: A lagalaridzanga tsihiri, kandi a tsi hila mbuhambe.

²⁴ A twulidzanga myoyo gyavanene vavandu velirova Na a va hilanga mu kyangalangwi ha ta veye nenzira kali indala.

²⁵ Va havatidzanga mkisundi ha ta veye nobulavu; A va kolanga kuguyaguya kuli muhambiki.