Amosi 9 - KITABU KITAKATIFU

¹ Nda lola Yahova na a singiye himbi nobwali: na a vola, U kuye mitwe gyevigutu, maliva ga duke kudegera; na u ga vunannye vidonyi ku mitwe gyavo sa mulala; na ndiita muhereridzi nekivavi: kali mulala kuvo si a nyala kwiruka, kandi si ha ve kali malala kuvo u nyala kuhona.

² Kali ni va yava kuduka kwingira mu Kihadisi, mukono gwange gu la va gumira kuvatwulidza yo; kali ni va nina kuduka mwigulu nda vikidza kutwula yo.

³ Kali ni vivisa ku isonga ya Karimeli, nda venya kuvatwulidza yo; kali ni vivisa hasi mu inyanza kutwula mu tsimoni tsyange, nda laga yo inzoka, nayo i la va luma.

⁴ Na kali va tsia mbutugwa imbiri wavasigu vavo, nda laga yo kivavi, na ki la viita: nda vumika ku budamano, si ga veye ku bulahi.

⁵ Kigira Yahova, Nyasaye wa mahe, uyu niye u diranga lirova ma li salaluka, na vosi va menyi mulyo va la syoma; na ki la vuka kyosi kuli Mugera, na ki la kama kandi, kuli Mugera gwa Egepeti;

⁶ uyu niye wombakanga inyumba yeye mwigulu, nokuyava imise gyevigutu ku lirova; uyu u langanga amadzi genyanza, nokugatsuka mmoni mwelirova; Yahova ni lieta lilye.

⁷ Mwinye si mu veye ku inze kuli avana va Vaethiopia, mwinve avana va Israeli? Yahova a vola. Inze si nda leta Israeli kutwula mu kivala kya Egepeti, na Vafilisiti va twule Kafitori, na Vasiria va twule Kiri?

⁸ Henza, tsimoni tsyo Mwami Nyasaye tsi veye ku bwami bwobwoni, na nda bu dividza bu twule mmoni mwelirova; navutswa si ndononnya ligali inyumba ya Yakobo, Yahova a vola.

⁹ Kigira, henza, nda laga, na nda sesa inyumba ya Israeli hagati hetsihiri tsyosi, kuli ubusuage bu sesangwa mu luderu, navutswa inzoli indala i la vula kugwa hasi.

¹⁰ Avobwoni vosi vavandu vange va la kudza nekivavi yavo ava volanga, Ubudamano yibu si bu la ku nyola, kinga kuvugana nekwinye.

¹¹ Ku lidiku yilyo nda singeridza lihema lya Daudi lya gwa, nokuhana hasasuguka halyo; na nda lohidza lisalana lyalyo, na nda lyombaka kuli mmadiku gamatsyambiri;

¹² va duke kuvugula avatigala va Edom, na vetsihiri vosi ava langwa ku lieta lyange, Yahova u kolanga inkuva yiyi, a volanga.

¹³ Henza, madiku gadzanga, Yahova a vola, mmadiku yago, uyu u limanga a la duka ku uyu u gesanga, na uyu u minanga mazabibu, a la duka ku uyu u simikanga tsinzoli; nevigulu vi la tonyatonya iwaini inulu, na tugulu twosi tu la salaluka.

¹⁴ Na nda galukidza kandi lyadikidzwa lyavandu vange Israeli, navo va lombaka madala aga ng'anywa, nokumenya mugo; na va la taga milimi gyemizabibu, na va la nwa iwaini yagyo; na va la lomba milimi, na va la lia makuyu gagyo.

¹⁵ Na nda va simika mkivala kyavo, na si va liifwa kandi kutwula mu kivala kyavo kya nda va ha, Yahova Nyasaye wowo a vola.