Amosi 8 - KITABU KITAKATIFU

¹ Ni ndiyo Mwami Nyasaye ya mbuulira: na, henza, kihinda kyamakuyu genyinga yoluya.

² Naye ya vola, Amosi, u lola ki? Na inze nda vola, Ndola kihinda kyamakuyu genyinga yoluya. Hene yaho Yahova ya mbolera, Avandu vange Israeli, kiheri kyavo ki duki kuvo; si nda va leka kandi mba.

³ Na tsinyimbu tsyelitempeli tsi la va tsikwili mu lidiku lilyo, Mwami Yahova a vola: mibiri mikudzu gyi la va minyingi; va la gyi ta hosi makiriri.

⁴ Mu hulire yaga, O mwinye avenyanga kumira avadambi, nokuheridza avadaka mu kivala,

⁵ ni mu vola, Mweli muhya yigu gu la hera inyinga ki, ku duke kugulidza ubu swage? Kandi lidiku lyelisahato li la vita inyinga ki, ku duke kulang'ami nya ingano, ku kole efa i ve inkekeke, na ishekeli ku gi kole i ve inene, noku kola ubugadi ku tsiratili tsyokugada;

⁶ ku duke kugula avadaka nefetha, navadambi ku va gule vilatu viviri, nokugulidza amadzengere gengano?

⁷ Yahova wesuhi ku bunene bwa Yakobo, Ligali si ndivirira kazozo miyinzi gyavo kali mulala kugyo

⁸ Kivala si ki la degera kigira yaga, noku vosi u menyanga mukyo si a la syoma? Yee, ki la vuka kvosi kuli Mugera; na ki la lola ubudinyu nokugehera kandi, kuli Mugera gwa Egepeti.

⁹ Na ga la duka mu lidiku yilyo, Mwami Nyasaye a vola, Nda yeridza liuva mbasu hagati, na nda mwaminya kivala inyinga yombasu gu valanga.

¹⁰ Na nda girunkannya madiku manene genyu ga ve lisyoma; na tsinyimbu tsyenyu tsyosi tsi la va lilira; na nda vika tsingubo tsyamagunia mu vikenge vyosi, na kyavusu ku mitwe gyosi: na nda ga kola ga ve kuli lisyomera umwana muyai muderwa, na kiheri ki ve kuli lidiku lilulu.

¹¹ Henza, madiku ga ladza, Mwami Nyasaye a vola, Mmadiku yago nda leta inzala mu kivala, si i la va inzala Yobukima kinga ubuluhu bwamadzi, navutswa inzala yelihulira makuva ga Yahova.

¹² Na va la gendagenda kutwula inyanza kuduka ku inyanza, nokutwula ku luvega lwa kasikasini kuduka ku luvega lwevugwe; va la nyagula kutsia yiyi neyiyi kwenya likuva lya Yahova, na si va la li lola mba.

¹³ Mu lidiku yilyo avakana vagima avalahi na vavai va la kudza mwoyo kigira ubuluhu.

¹⁴ Yavo avesuhanga ku bwoni bwa Samaria, nokuvola, Kuli nyasaye wowo, O Dan, a veye mwoyo; kandi, Kuli inzira ya Beersheba i veye mwoyo; va la gwa, na si va la vuka kandi mba madiku gosi.