2 Timoteo 4 - KITABU KITAKATIFU

¹ Nku tsuva ligali imbiri wa Nyasaye kandi imbiri wa Kristo Yesu, u li kalagira ava veye mwoyo navakudzi, noku lilang'ama lilye noku bwami bwibwe:

² wilwadze likuva; u dinye ku mu tsinyinga tsindahi nomu tsinyinga tsi ta li tsindahi; u gaye, u gondokere, u ganehidze nobwikudziri bwosi nelyegidza.

³ Kigira inyinga i ladza ya va li vula kubugirira megidzo geligali navutswa va li vungidzira avegidzi kuli likayirwa lyavo, va veye namatu geviyago;

⁴ kandi va la girunkannya amatu gavo kutwula ku ageliga li, nokuyeka haluvega lwetsing'ano tsyobubehi.

⁵ Navutswa ive, weli nde ku vyosi, wekudzire ku budinyu, u kole miyinzi gyomwilwadzi wevangeli, u dukidze ubutumwa bubwo.

⁶ Kigira kalunu inze nzukangwa, kandi inyinga yange yokutwula i veye himbi.

⁷ Mmali kulwana ubulwani bulahi, mmali kudukidza ulugendo lwange, mmali kulinda lisuuvira.

⁸ Lwenyima mbikeywi itaji yobulungi, yo Mwami mukalagi wobulungi, a li mpa mu lidiku yilyo; navutswa si a li inze tsyeng'ine navutswa yava vosi ava yanza lilang'ama lilye.

⁹ U guluhe kuudza ku inze bwangu:

¹⁰ kigira Dema, wa li ndeka, kigira u mali kuyanza vyelirova lya kalunu yili, kandi wa tsia Tesalonike; Keresike wa tsia Galatia, Tito wa tsia Dalamatia.

¹¹ Luka yeng'ine niye wa mbeye naye. U vugule Marko uudze naye hano; kigira ya ndukanga ku butumwa.

¹² Navutswa Tukiko nda mu tuma Efeso.

¹³ U letane likoti lya nda leka Troa na Karipu halala nevitabu, ligali kuvita vyelise ro.

¹⁴ Alekisandero mutuli womu gasa ya nkola ubudamano bunyingi: Mwami a la mu tunga kuli miyinzi gyigye.

¹⁵ Kandi ive u mu gelihe kigira wa hing'ana ligali amakuva getu.

¹⁶ Mu litivula lyange lyoku tanga, si ha li nomundu wa nkonya, navutswa vosi va ndeka: yaga ga ta volwa kuvo.

¹⁷ Navutswa Mwami ya singira halala na inze, nokumpa tsingulu; nduke kugamba lilwadza nobudukiru bwalyo, avandu vosi ve Tsihiri va duke kuhulira: na inze nda honnywa mu munwa mweking'ang'a.

¹⁸ Mwami ya mbonnya mu miyinzi gyosi midamano, nokuninda kuduka mu bwami bwibwe bwomigulu: wo bukumi bu veye kuye mihiga nemihiga. Amini.

¹⁹ U chelidze Prisila na Akula navenyumba ya Onesiforo.

²⁰ Era sto ya menya Korintho: navutswa Terofimo nda mu leka Mileto na a lwala.

²¹ U guluhe kuudza ku inze inyinga yobukindu ni kikiri kuduka. Eubulu a ku chelidza, na Pudene, na Lino, na Kilaudia, navamitu vosi halala.

²² Mwami a ve na roho gugwo. Tsimbabasi tsi ve na ive.