2 Timoteo 3 - KITABU KITAKATIFU

¹ Navutswa u manye yaga, mu madiku gekiheri tsinyinga tsyobuhimwa tsi la duka.

² Kigira avandu va la va aveyanza avene, nava yanza ubu'ugi, naveyidzominya, navevoli, navanyegi, ava tegehidza ku avivuli vavo, ava ta li nelisantidza, nava vula kutia Nyasaye,

³ ava ta li nobuyanzi bu dukananga, na va ta huliridzana, navahudziridzi, ava tegaya, avalulu, ava ta yanza ubulahi,

⁴ avazami, avahindagiridzi, avigingiri, ava yanzi lyeyanzidza kuvita liyanza Nyasaye;

⁵ va gumira lifwana lyelitibwa lya Nyasaye, navutswa va mali kwambakana tsingulu tsyalyo: welehe avandu yava.

⁶ Kigira ku yava va twulanga mu avevikanga mu tsinyumba nokulanya avekikali vobusiru, ava ginga misigo gyobwoni, avelikayirwa tsing'ano netsing'ano lyemiririranga,

⁷ aveganga kazozo, navutswa si va nyala kali hakuzu kuduka ku limanya ageligali.

⁸ Kandi kuli Yonne na Yambare va hangalidza Musa, ni ndiyo yava va hangalidza ageligali; avandu avemyoyo midamano, kandi aviyahula mu lisuuvira.

⁹ Navutswa si va lisunda imbiri mba: kigira ubusiru bwavo bu la lang'aminywa ku vosi, kuli bwa yavo bwa duka kuva.

¹⁰ Navutswa ive wa londa megidzo gange, neligenda lyange, nobulaliri bwange, nelisuuvira lyange, nobwikudziri bwange, nobuyanzi bwange, nobwidinyiridzi bwange

¹¹ nelidambidzwa lyange, nobusaliri bwange: ivindu vya ngwira mu Antiokia, nomu Ikonio, nomu Lustra, tsing'ano tsyelidambidzwa tsya ndi kudzera mu: kandi Mwami ya mbonnya ni ya ntwulidza mu tsyosi.

¹² Yee, kandi vosi avenyanga kumenya limenya lyelitibwa lya Nyasaye mu Kristo Yesu va la nyola lidambidzwa.

¹³ Navutswa avandu avadamano navagadidzi va lisunda imbiri nokukira kuva vadamano, va gadanga, navo va gadangwa.

¹⁴ Navutswa ive u menye mu ga wegidzwa, naga wa lungikwa, limanya u manya ava wega ku;

¹⁵ kandi kutwula bwana bwoke wa manya mang'oda matakatifu, aga nyala kukugerihidza kuduka ku buhonnyi bwelisuuvira li veye mu Kristo Yesu.

¹⁶ Mang'oda gosi ga veye nomwika gwa Nyasaye, kandi ga veye netsingulu mu lyegidza, nomu lyeganehidza mu ageligali, nomu lilu ngikidza nomu ligerihidza mu miyinzi milahi gyosi;

¹⁷ mundu wa Nyasaye a duke kuva nobudukiru, nolombeywi ku miyinzi gyosi milahi.