2 Timoteo 2 - KITABU KITAKATIFU

¹ Kunangwa ive, mwana wange, u nyole tsingulu mu tsimbabasi tsi veye mu Kristo Yesu.

² Kandi vyosi vya wa hulira ku inze ku valoli vanyingi, u vike ku avandu avasuuvirifu, ava li dukana kwegidza avandi.

³ Wekudzire mu kivi halala na inze kuli musikari mulahi wa Kristo Yesu.

⁴ Si ha veye nomusikari u tsitsanga mu lihe wevika mu madidikano genyinga yiyi, a duke kuyanzidza wa mu ng'oda kuva musikari.

⁵ Kandi mundu na a gerana mu bukino, si a vikwa itaji bugira na a ta gerana kuli miima.

⁶ Ga dukiranga uyu mulimi wa nyankana ku miyinzi a tange kunyola ku makuyu.

⁷ Ganagana aga mbolanga; kigira Mwami a la ku ha ubugeeri mu vindu vyosi.

⁸ Widzulire Yesu Kristo, wa simuguka kutwula ku vakudzu, wevisukululwi vya Daudi, kuli ivangeli yange:

⁹ ya nda nyolera mu ubusaliri kuduka libofwa, kuli mukoli wobudamano, navutswa likuva lya Nyasaye si li bofwa mba.

¹⁰ Kigira yaga nzikudziranga ku vyosi kigira avatovole, navo kandi va duke kunyola ubuhonnyi bu veye mu Kristo Yesu halala nobukumi bu ta hera mba.

¹¹ Li veye lyokusuuvirwa likuva yili: Kigira ni ku va kwa kudza halala naye, ku la va nelivamwoyo ka ndi halala naye:

¹² ni ku saliridzwa, kandi ku lameha halala naye: ni ku mwambakana, naye a la kwambakana;

¹³ ni ku vula kusuuvira mwene a la menya musuuvirifu, kigira si a nyala kweyambakana mwene.

¹⁴ Widzulitse avandu vindu yivi nokuveganehidza imbiri wo Mwami va ta va nobuhing'ani ku makuva ga ta veye nobukonyi, aga gotidzanga yava ava huliranga.

¹⁵ Wedinyiridze kwevika mu libugirirwa imbiri wa Nyasaye, mukoli wemiyinzi u vula kulegannywa, u tumekiranga bulungi likuva lyageligali.

¹⁶ Weyahule ku tsimbaka tsyekivala tsya vutswa: kigira yitsi tsi la kira kuduka mu budamano,

¹⁷ kandi likuva lyatsyo li la lia kuli inkwagu i litsanga. Kuvo va veye Humenayo na Fileto;

¹⁸ avandu ava goti ku geligali, va vola lisimuguka li mali kuvita, na va hinulanga lisuuvira lyavalala.

¹⁹ Navutswa muse gwe tsingulu gwa Nyasaye gu singira, gu veye nekiloleru yiki: Mwami a manya yava ava veye aveve: kandi, Ku vosi u talanga lieta lyo Mwami yelehe ku budamano.

²⁰ Kunangwa mu inyumba inene si vi veye mu viju vyethahabu nevyefetha vyeng'ine, navutswa vi veye mu vyemisala nevyobudohi; vilala vi veye nelidzominywa, nevindi si vi veye nelidzominywa.

²¹ Kunangwa mundu ni yetakasa nokweleha yivi, a la va kiju kyelidzominywa, ki takaseywi, ki dukana nemiyinzi gyo Mwami, ki lombeywi ku miyinzi gyosi milahi.

²² Navutswa wiruke likayirwa lidamano lyobuyai, navutswa u londe ubulungi, nobusuu virifu, nobuyanzi, nemirembe, halala na yavo avaniranga Mwami mu myoyo milahi.

²³ Navutswa mateva gobusiru naga ta li nelimanya u sule, limanya u manya gyivulanga mahangali.

²⁴ Mutugwa wo Mwami ga mu dukira a vule kuha ngala, navutswa a ve nobuhooms ku vosi, a ve netsingulu kwegidza, a ve nobwikudziri,

²⁵ a ve nobuho kya mu lyeganehidza avahing'ana; mbula Nyasaye a va he lyeganira kuduka ku limanya ageligali,

²⁶ va duke kwitwulidza mu buginga bwa Setani, ava lanywa kukola ubulaliri bwibwe.