2 Samweli 5 - KITABU KITAKATIFU1 Kunangwa tsihiri tsyosi tsya Israeli tsya duka ku Daudi ha a Hebironi, na va mu volera, ni va vola, Henza, ku veye kigumba kikyo, nombiri gugwo. 2 Inyinga ya matsyambiri, lwa Saulo ya li mwami ku kwinye, ni ive wimirira Israeli va twula nokuvingiridza: na Yahova ya ku volera, Ive u la va mwayi wavandu vange Israeli, na u la va munene ku Israeli. 3 Ma avakulundu vosi va Israeli va tsia ku mwami ku Hebironi; na mwami Daudi ya lomba lilagana navo ha Hebironi imbiri wa Yahova: navo va vaka Daudi maguta a ve mwami ku Israeli. 4 Daudi ya li nemihiga makumi gavaka lwa ya tanga kwnmeha, naye yameha mihiga makumi gane. 5 Yameha mu Hebironi ku Yuda mihiga gyitano na gyiviri nemyeli gyitano na mulala; na mu Yerusalemi yameha mihiga makumi gavaka na gyivaka ku Israeli na Yuda vosi. 6 Nomwami navandu veve va tsia Yerusalemi kulwana na Vajebusi, avamenyi mu kivala, va volera Daudi, ni va vola, Nu u va nu u ta twulidza avaboku navalema, si u lingira yimu mba; va ganagana Daudi si a nyala kwingira mu. 7 Navutswa Daudi ya guuta impinga ya Zion; nayo i veye lidala lya Daudi. 8 Na Daudi ya vola lidiku yilyo, Uyu u kuya Avajebusi, yanegire kuduka ku mugera gwamadzi, na a kuye avaboku navalema, avomwoyo gwa Daudi gu vihirirangwa. Kigira yaga va vola, Va va ho vaboku navalema; si a nyala kwingira mu inyumba. 9 Ma Daudi ya menya mu impinga, na ya gi gulika lidala lya Daudi. Na Daudi yombaka kukumbiridza kutwula Milo kuduka hagati. 10 Daudi ya tesa kuva umunene; kigira Yahova, Nyasaye wa mahe, ya li halala naye. 11 Na Hiram mwami wa Turo ya tuma vatumwa ku Daudi, na a hila misala gyomutaragwa, na vavadzi, na vombaki; na vombakira Daudi inyurmba. 12 Na Daudi ya lola Yahova u mu dinyeridzi a ve mwarni ku Israeli, na ya nenehidza ubwami bwibwe kigira avandu veve Israeli. 13 Na Daudi ya vugula avasuria avandi navakali avandi mu Yerusalemi, inyima welitwula Hebironi; ni yivula avandi vayai navakana. 14 Ameta gavana vivulwa kuye ha Yerusalemi ni yaga: Shamua, na Shobabu na Nathan, na Solomoni 15 na Ibiharu, na Elishua, na Nefegu na Jafia, 16 na Elishama, na Eliada, na Elifeleti. 17 Na Vafilisiti lwa va hulira va vaki Daudi maguta a ve mwami ku Israeli, Vafilisiti vosi vanegira kwenya Daudi; na Daudi ya ga hulira, na a sulunguta kutsia mu impinga. 18 Na Vafilisiti va li ni va mali kuduka kwilandidza mivona lya Refaim. 19 Na Daudi ya teva Yahova, na a vola, Nyanegire kulwana na Vafilisiti, naho? U la va vika mmukono gwange, naho? Na Yahova ya volera Daudi, Wanegire, kigira ligali nda vika Vafilisiti mmukono gugwo. 20 Na Daudi ya duka Baalperazim, na Daudi ya va kuyira yo; naye ya vola, Yahova u vunanye avasigu vange imbiri wange, kuli litegula lyamadzi. Kunangwa ya gulika lieta lya ha zana, Baalperazim. 21 Navo va leka ho vifwananyi vyavo; na Daudi navandu veve va vi vugula ni va vi samba. 22 Na Vafilisiti vanegira kandi, ni velandidza mwivona lya Refaim. 23 Na lwa Daudi ya teva Yahova, ya mu volera, U tanegira mba: u kupe amangodze inyima wavo, na u duke kuvo himbi nemisala gyetsinyengereri. 24 Na ga la va, lwa u hulira muliviti gweligenda ku tsisonge tsyemisala gyetsinyengereri, hene yaho u la singira bwangu; kigira Yahova u mali kutsia imbiri wowo inyinga yeyo kukuya lihe lya Vafilisiti. 25 Na Daudi ya kola ndiyo, kuli Yahova ya mu laga, na ya kuya Vafilisiti kutwula Geba kuduka Gezeri. |
©Bible Society of Kenya, 1967
Bible Society of Kenya