2 Samweli 4 - KITABU KITAKATIFU

¹ Na Ishboshethu, mwana wa Saulo, lwa ya hulira Abineri u kudzeyi mu Hebironi, tsingulu tsya geha ku makono gege, na Vaisraeli vosi va henda mwoyo.

² Na Ishbpshethu, mwana wa Saulo, ya li navandu vaviri avanyampara veviduma: lieta lyomulala lya langwa Baana, nelieta lyowundi Rekabu, avana va Rimon Mubeerothu, ku avana va Benjamini (kigira Beerothu li validzwa kuva lya Benjamini:

³ na Vabeerothu virukira Gitaim, navo va menyanga yo kuduka lero).

⁴ Na Jonathan, mwana wa Saulo, ya li nomwana muyai wa lema virenge. Naye ya li nemihiga gyitano lwa makuva ga Saulo na Jonathan ga twula Jezireeli; na muleri wewe ya mu ginga, neyiruka naye: na ga duka, lwa ya li nelididikana lyokwiruka, mwana uyu ya gwa, na a gwa muleema. Lieta lilye lya langwa Mefiboshethu.

⁵ Navana va Rimon Mubeerothu, Rekabu na Baana, va tsia, ni va duka ku inyumba ya Ishboshethu inyinga kuli yeliuva li veye lilulu, inyinga ya a sosanga mbasu hagati.

⁶ Na vingira mu inyumba hagati, kuli avagingi vengano; navo va tumita Ishboshethu munda: na Rekabu namwavo wewe Baana viruka.

⁷ Na lwa vingira mu inyumba, lwa ya li na a gonanga ku kitali kikye mu inyumba yeye yokugona, va mu kuya, ni va mwiita, na va kalaga mutwe gwigwe, ni va hila mutwe gwigwe, ni va tsia ku inzira yekireremu ubudiku bwosi.

⁸ Ni va leta mutwe gwa Ishboshethu ku Daudi ha Hebironi, na va volera mwami, Henza, ku veye nomutwe gwa Ishboshethu mwana wa Saulo, musigu wowo, wa li kwenya livamwoyo lilyo; Yahova u vanziyi umunene wange mwami kisalya lero ku Saulo, noku kisukululwi kikye.

⁹ Na Daudi ya tivulira Rekahu na Baana amwavo wewe, avana va Rimon Mubeerothu, na a va volera, Kuli Yahova a veye mwoyo, wa honnya mwoyo gwange mu kivi kyosi,

¹⁰ lwa mulala ya mbolera, na a vola, Henza, Saulo u kudzi, naye a ganagana ya ndeteranga makuva malahi, nda mu gumira, ni mwiitira ha Ziklagu, yaga na madanyi ga nda mu ha kigira makuva gege.

¹¹ Nasindi, lwa avadamano viita mulungi mu inyumba yeye ku kitali kikye, inze nda vula kuvanza kisalya kyamasahi gege ku mukono gwenyu, nokutwulidza mwinye ku lirova?

¹² Na Daudi ya laga vasoleli veve, na va viita, ni va va kalaga makono gavo nevirenge vyavo, na va va sunga himbi nelidavalia mu Hebironi. Navutswa mutwe gwa Ishboshethu, va gu hila kuta mu kilindwa kya Abineri ha Hebironi.