2 Samweli 3 - KITABU KITAKATIFU

¹ Kunangwa bwa li ho ubulwani bwa madiku manyingi hagati henyumba ya Saulo nenyumba ya Daudi: na Daudi ya meda tsingulu, navutswa inyumba ya Saulo ya geha tsingulu.

² Na Daudi yivulira avana vayai mu Hebironi: wokutanga wewe ya i langwa Amnon, wa Ahinoam Mujozireeli;

³ na wakaviri, ya langula Kileabu, wa Abigaili wa li muha Nabali Mukarimeli; na wakat akaa, Abisalom mwana wa Maaka mukana wa Talmai mwami wa Geshuru:

⁴ na wa kane, Adonija mwana wa Hagithu; wa gatano, Shefatia mwana wa Abitali;

⁵ na wa gatano na mulala, Ithiream, mwana wa Egila, muka Daudi. Yavo vosi vivulwa ku Daudi ha Hebironi.

⁶ Na ga duka, inyinga bulwani bwa li hagati henyumba ya Saulo neyumba ya Daudi, Abineri yevika mwene tsingulu mu inyumba ya Saulo.

⁷ Na Saulo ya li na a veye na suria mulala, wa langwa Rizipa, mukana wa Aia: na Ishboshethu va teva Abineri, Kigira ki ive u veye halala na suria wa dada wange?

⁸ Hene yaho Abineri ya vihirirwa ligali kigira makuva ga Ishboshethu, na a vola, Inze mbeye mutwe gwembwa ya Yuda? Lero nda vera inyumba ya dada wowo, navamwavo veve, navalina veve tsimbabasi, mbule kuvika ive mmukono gwa Daudi; navutswa ive lero u vika ku inze mahyolo ku makuva gomukali uyu.

⁹ Nyasaye a kolere Abineri kuli vaga, nokuvita, kuli Yahova yisuhira Daudi, inze mbule kumukolera ndiyo;

¹⁰ kutwulidza ubwami yibu mu inyumba ya Saulo, nokusingeridze intebe yobwami ya Daudi ku Israeli noku Yuda, kutwula Dan kuduka Beersheba.

¹¹ Naye si a nyala kutivulira Abineri likuva lindi, kigira ya mu tia.

¹² Na Abineri ya tuma vatumwa va tsia ku Daudi mbugono bwibwe, na a vola, Kivala yiki ni kya bwaha? Kandi ya vola, Kola lilagana halala ninze, na henza, mukono gwange gu a la va halala nive, kukuletera Israeli vosi.

¹³ Na Daudi ya vola, Nobulahi; nda kola lilagana halala nive; navutswa mbeye nelinigwa lilala lya nyenyanga ku ive: nalyo ni yili, ive u la vula kundola mmoni mwange, ni ga ta li u la tanga kuleta Mikali, mukana wa Saulo, lwa u duka kulola mmoni mwange.

¹⁴ Na Daudi ya tuma avatumua ku Ishboshethu, mwana wa Saulo, na a vola, U mbe mukali wange Mikali, wa nda kwa magodo mia ga Vafilisiti.

¹⁵ Na Ishboshethu ya tuma avandu, na a twulidza mukali ku musatsa wewe, uyu Palitieli mwana wa Laishi.

¹⁶ Nomusatsa ya mu londa, na a lira na a genda, na a mu londa kuduka Bahurim. Hene yaho Abineri ya mu volera, Wirane: naye yirana.

¹⁷ Na Abineri ya volerana navakulundu va Israeli, na a vola, Ku madiku ga vita mwinye mwenya Daudi a ve mwami ku mwinye:

¹⁸ kalunu mu kole; kigira Yahova u voye makuva ku Daudi, na a vola, Inze nda honnya avandu vange Israeli ku makono ga Vafilisiti, noku makono gavasigu vavo vosi, nomukono gwa mutumekiri wange Daudi.

¹⁹ Na Abineri ya vola mmatu gavandu va Benjamini: na Abineri kandi ya tsia a duke kuvola mmatu ga Daudi ha Hebironi yaga gosi aga loleka kuva malahi ku Israeli, noku inyumba yosi ya Benjamini.

²⁰ Ma Abineri ya tsia ku Daudi ha Hebironi, navandu makumi gaviri va tsia halala naye. Na Daudi ya lombera Abineri navandu ava li halala naye lilia.

²¹ Na Abineri ya volera Daudi, nda singira ntsie, na nda vungidza Israeli vosi ku munene wange mwami, va lombe lilagana nive, na ive u duke kwameha ku vosi avomwoyo gugwo gwenyanga. Na Daudi ya tuma Abineri; naye ya tsia nemirembe.

²² Kandi, henza, avatumekiri va Daudi na Joabu vadza kutwula mbulwani, na va leta navo vilanye vinyingi: navutswa Abineri si ya li halala na Daudi ha Hebironi; kigira ya li na a mu tumi, naye ya li na a mali kutsia nemirembe.

²³ Na Joabu nekiduma kyosi kya li halala naye, lwa va mala kuduka, va volera Joabu, ni va vola, Uyu Abineri mwana wa Neri yadza ku mwami, nave ya mu leka, na u tsiye nemirembe.

²⁴ Hene yaho Joabu ya tsia ku mwami na a mu volera, U koli ki? Henza Abineri yadza ku ive; kigira ki ive wa mu leka, na u tsiye ligali?

²⁵ Ive u manya uyu Abineri mwana wa Neri, yadza kukugada, nokumanya litwula lilyo nelingira lilyo, nokumanya gosi aga u kolanga.

²⁶ Na Joabu lwa ya twula ku Daudi, ya tuma vatumwa va londerere Abineri, navo va mirannya kutwula ha kidaho kya Sira: navutswa Daudi si a manya.

²⁷ Na lwa Abineri ya li ni yirananga Hebironi, Joabu ya mbeta haluvega hagati hekiribwa kuvolerana naye galaha, naye ya mu tumita munda, na a kudza, kigira masahi ga Asaheli amwavo Joabu.

²⁸ Lwenyima, Daudi lwa ya hulira, ya vola, Inze nobwami bwange si ku veye nekindu imbiri wa Yahova mihiga nemihiga, ku masahi ga Abineri mwana wa Neri:

²⁹ ga gwe ku mutwe gwa Joabu, noku inyumba ya dada wewe; nenyumba ya Joabu i vule kugehidzirwa mundu u veye nekisununu, kinga u veye nobugere, kinga wedira mu digiru, kinga wokugwa ku kivavi, kinga wokugeha vyokulia.

³⁰ Ni ndiyo Joabu namwavo wewe Abishai viita Abineri, kigira yiita amwavo wavo Asaheli ha Gibeon mbulwani.

³¹ Na Daudi ya volera Joabu, navandu vosi ava li halala naye, Tandula tsingubo tsyenyu, mwevika tsingubo tsyamagunia, nokusyomera Abineri. Mwami Daudi ya londa ludiigi.

³² Na va ta Abineri mu Hebironi: nomwami ya ginga mwoyo gwigwe, na a lilira ha kilindwa kya Abineri; navandu vosi va lira.

³³ Na mwami ya syomera Abineri, na a vola, Ga dukira Abineri a kudze kuli musiru?

³⁴ Makono gogo si ga bofwa, kinga virenge vivyo si vya vikwa ku munyororo mba: Kuli musatsa a gwidzanga imbiri wavana vobudamano, ni ndiyo ive wa gwa. Na avandu vosi va mu lilira kandi.

³⁵ Ma avandu vosi va tsia b va duke kuniga Daudi a lagire ubukima ni gu kikiri mbasu; navutswa Daudi yisuha, na a vola, Nyasaye ya nkolere ndiyo, nokuvita, ni ntsatsama ubukima kinga kindi kindu, kuduka liuva li yera.

³⁶ Navandu vosi va henza inkuva yeyo, nayo ya va Yanzidza; kuli ku gosi gomwami ya kola ga yanzidza avandu vosi.

³⁷ Kunangwa avandu vosi na Vaisraeli vosi va manya lidiku yilyo si ga veye makuva gomwami kwiita Abineri mwana wa Neri.

³⁸ Nomwami ya volera avatumekiri veve, Mwinye si mu manya mukulundu nomundu munene u gwiye mu Israeli lero?

³⁹ Na inze lero mbeye mudedekere, kali ni mbeye mwami wa vakwa maguta; navandu yava kandi avana va Zeruia, va veye avandu avadinyu kuvita ku inze: Yahova a tunge u kolanga budamano kuli ubudamano bwibwe.