2 Samweli 22 - KITABU KITAKATIFU

¹ Na Daudi ya volera Yahova makuva golwimbu yilu ku lidiku lya Yahova ya mu honnya ku makono ga vasigu veve vosi, noku mukono gwa Saulo:

² na a vola, Yahova a veye lwanda lwange, nolugaga lwange, nomuhonnyi wange, wange ligali.

³ Nyasaye, lwanda lwange, ndi visa muye; Ingavo yange, nolwiga lwange lwobuhonnyi, nomunara gwange, na hokwivisa hange; A veye muhonnyi wange, u mbonnyi ku kirage.

⁴ Ndanira ku Yahova, u dukana kwidzominywa: Na ndiyo nda honnywa ku vasigu vange.

⁵ Kigira viguvuli vyelikudza vya nkumberidza; Ubunene bwobudamano bwa ntihidza:

⁶ Migoye gyekihadisi gya nkumberidza; Mitego gyelikudza gya nyola.

⁷ Mu lisalira lyange ndanira Yahova Yee, nda kupa lwanga ku Nyasayewange: Naye ya hulira mwoyo gwange mu litempeli lilye, Nelilira lyange lingira mmatu gege.

⁸ Hene yaho lirova lya degera ni li dengeya. Mise gyeligulu gya degera Na gya degeridzwa, kigira ya li nobutima.

⁹ Mwoki gwa vuya kutwula mmolu gege, Nomuliru gwa twula mmunwa gwigwe ni gu lia: Amanda gaakidzwa nagwo.

¹⁰ Yinaminya ligulu kandi, yika hasi; Kisundi kinene kya li isi wevirenge vivye.

¹¹ Yikala ku mukerubi, na a buluka; Yee, ya loleka igulu wetsimbaha tsyembudza.

¹² Ya kola kisundi kuva mahema gokumukumberidza, Livunga lyamadzi, amalesi manene gomigulu.

¹³ Mu bung'ering'anu bwa henza imbiri wewe, Amanda gomuliru gaakidzwa.

¹⁴ Yahova ya syagukidza inkupa migulu, U veye Igulu Ligali ya twulidza mwoyo.

¹⁵ Na ya lasa mibano, na a va salannya; Ya twulidza uluheni, na a va dambidza.

¹⁶ Tsinzira tsyenyanza tsya loleka, Mise gyelirova gya kunulwa, Neligondoka lya Yahova, Ku lihuudza lyemyika gyamolo gege.

¹⁷ Ya tuma kutwula migulu, na a mbugula; Ya ntwulidza mmadzi manyingi;

¹⁸ Ya mbonnya ku musigu wange wetsingulu, Kuvo ava ndunyira; kigira va li netsingulu kuvita inze.

¹⁹ Va ntwulira bwangu ku lidiku lyekivi kyange; Navutswa Yahova ya li itiru yange.

²⁰ Na ya ntwulidza, ni ya mbika hobwiyangu Ya mbonnya, kigira ya nyanza.

²¹ Yahova ya mba madanyi kuli ubulungi bwange; Kuli butakatifu bwamakono gange ya mpa ndiyo.

²² Kigira ng'umiye tsinzira tsya Yahova, Kandi si nda twula ku Nyasaye wange ku budamano.

²³ Kigira miima gyigye gyosi gya li imbiri wange; Na si ndavukana namalago gege.

²⁴ Nda li mudukiru imbiri wewe; Nzegaya ku ubukyamu bwange.

²⁵ Kunangwa Yahova u ntungi kuli bulungi bwange, Kuli butakatifu bwange imbiri wetsimoni tsitsye.

²⁶ Ku wetsimbabasi u lelolekidza kuva wetsimbabasi Ku u veye mudukiru u lelolekidza kuva mudukiru;

²⁷ Ku u veye umunifu, u lelolekidza kuva umunifu; Ku mukyamu u lelolekidza kuva mukyamu.

²⁸ Na ava dambidzangwa u la va honnya; Navutswa tsimoni tsitsyo tsi veye ku yavo aveyidzominyanga, u duke kuvagehidza.

²⁹ Ive Yahova u veye itaya yange; Na Yahova a la lavidza kisundi kyange.

³⁰ Kigira ku ive ntwulira lihe; Noku Nyasaye wange nsira lidigi.

³¹ Nyasaye uyu inzira yeye i veye indukiru: Livola lya Yahova li loleywi kuva lilungi A veye ingavo ya vosi avivisa muye.

³² Kigira ibwaha a veye Nyasaye, na a ta li Yahova? Nibwaha u veye lwanda na a ta li Nyasaye wetu?

³³ Nyasaye uyu niye lugaga lwange lwetsingulu; Uyu yimiriranga muduliiru ku inzira yeye.

³⁴ Virenge vyange a vi leng'annya ne virenge vyembongo, A nsingeridzanga ha kidiguluku hange.

³⁵ A nalidza makono gange ku lwana, Kuduka makono gange ga kuumba ubuta bwomugasa.

³⁶ Kandi u mpeye ingavo yobuhonnyi bubwo; Nobuhoma bubwo bu nenehidzi.

³⁷ U lombeye tsinduvatiru tsyange ubwiyangu isi wange; Tsinduvatiru tsyange tsi vuli kuswerereka.

³⁸ Nda londerera avasigu vange, na nda va dividza, Kandi si ndirana kuduka lwa nda va heridza.

³⁹ Nda va heridza, kuvatodza, va vule kuvuka: Yee, va gwa isi wevirenge vyange.

⁴⁰ Kigira wa mboha tsingulu tsyokuguuta mbulwani; Winaminya ava hing'ananga ku inze, isi wange.

⁴¹ Kandi ive u kola avasigu vange va girunkana migongo gyavo ku inze, Nduke kudividza yavo ava ndu nyiranga.

⁴² Va henza, navutswa si ha li nowokuvahonnya; Kali ku Yahova, navutswa si yava tivulira mba.

⁴³ Ma nda va sia, va duka kuva kuli lugukyi lwekivala, Nda va duvaga kuli ubudohi bwoku inzira, nokuvasalannya yiyi neyiyi.

⁴⁴ Ive wa mbonnya ku lining'ana lyavandu vange; Wa ninda nduke kuva mutwe ku avetsihiri Avandu va nkikiri kumanya vala ntumekira.

⁴⁵ Avetsihiri tsindi va legehidza avene ku inze: Lwa va hulira makuva gange, nonoho va mbulira.

⁴⁶ Avandu va ihiri yindi va la niala, Va la twula mbugono ha vivisa nelidegera.

⁴⁷ Yahova a veye mwoyo; lwanda lwange lu gasidzwe; Na a nenehidzwe Nyasaye, lwanda lwobuhonnyi bwange,

⁴⁸ Kali Nyasaye u mbanziranga kisalya, A gehidzanga avandu isi wange,

⁴⁹ Na ya ntwulidza hagati ha vasigu vange: Yee, u nginganga igulu kuvo ava ntuliranga; U mbonnya ku uyu wekirage.

⁵⁰ Kigira yaga nda santidza ive, O Yahova, hagati hetsihiri, Na ndimba tsinyimbu tsyokwidzominya lieta lilyo.

⁵¹ A hedzanga mwami wewe ubuhonnyi ubunene, Nokumannya mbake wewe tsimbabasi tsyobuyanzi, Ku Daudi nokuvisukululwi vivye kuduka mihiga nemihiga.