2 Samweli 21 - KITABU KITAKATIFU

¹ Mmadiku ga Daudi ya li ho inzala mihiga gyivaka, muhiga nomuhiga; na Daudi yenya mmoni mwa Yahova. Na Yahova ya vola, Ga veye kigira Saulo, na kigira inyu mba yeye ya masahi, kigira yiita Vagibeoni.

² Nomwami ya langa Vagibeoni, na a va volera (Vagibeoni si va veye ku avana va Israeli, navutswa ku yavo va tigala Vaamori; navana va Israeli va li va visuhiye: na Saulo mu lididikana lilye lya ya li nalyo ku Israeli na Yuda, yenya kuviita);

³ na Daudi ya volera Vagibeoni, Nda mu kolera ki? Na nda lomba kindu ki kukunika ubwoni, mwinye mu duke kugasidza miyandu gya Yahova?

⁴ Na Vagibeoni va mu volera, Si ga veye gefetha kinga gethahabu ga veye hagati hetu na Saulo, nenyumba yeye; kandi si ga veye agetu kwiita mundu ku vosi mu Israeli. Naye ya va volera, Kya mu vola, ndi mu kolera kya zana.

⁵ Na va volera mwami, Mundu uyu wa dividza kwinye, nokutwulidza livola ku kwinye, kuduka ku dividzwe, ku vule kumenya mu tsinzako tsya Israeli tsyosi,

⁶ avandu vatano na vaviri ku avana veve va twulidzwe va haanwe ku kwinye, na ku la va sunga igulu imbiri wa Yahova mu Gibea lya Saulo, mu tovole wa Yahova. Na mwami ya vola, Nda va ha.

⁷ Navutswa mwami ya vererera Mefiboshethu, mwana wa Jonathan mwana wa Saulo, kigira lisuha lya Yahova lya li hagati havo, hagati ha Daudi na Jonathan, mwana wa Saulo.

⁸ Navutswa mwami ya vugula avana a vaviri va Rizipa, mukana wa Aia, ava yivulira Saulo, Arimoni na Mefibo shethu: navana vayai vatano ava Mikali mukana wa Saulo, ava yivu lira Adirieli mwana wa Barizilai Mumeholathu:

⁹ na ya va vika mmakono ga Vagibeoni, navo va va sunga mkigulu imbiri wa Yahova, na va gwa vosi vatano na vaviri halala. Navo viitwa mmadiku geligesa, mma diku gelitanga, litanga lyeligesa lyeshairi.

¹⁰ Na Rizipa mukana wa Aia ya vugula magunia ni yeyalira mwene ku lwanda, kutwula ku litanga lyeligesa, kuduka va kupidzirwa amadzi ku twula migulu: na si ya leka manyonyi gombwerefu kugwa kugo inyinga yombasu, kinga tsinyama tsyommulitu inyinga yobudiku.

¹¹ Na Daudi ya volerwa aga Rizipa mukana wa Aia, suria wa Saulo, ya kola.

¹² Na Daudi ya tsia na a vugula vigumba vya Saulo nevigumba vya Jonathan mwana wewe mmakono gavandu va Jabeshgileadi, ava li viba ku inzira ya Bethshan, ha Vafilisiti va va sunga, mu lidiku lya Vafilisiti viita Saulo mu Giliboa;

¹³ na ya vi leta kutwula yo, vigumba vya Saulo nevigumba vya Jonathan mwana wewe; na va dola vigumba vya yavo ava sungwa.

¹⁴ Na va ta vigumba vya Saulo nevigumba vya Jonathan mwana wewe mu kivala kya Benja mini mu Zela, mu kilindwa kya dada wewe Kishi: na va dukidza gosi agomwami ya laga. Na lwenyima ku vaga Nyasaye ya bugirira lisaala kigira kivala.

¹⁵ Na Vafilisiti va lwana kandi na Israeli; na Daudi ya sulunguta, navatumekiri veve halala naye, va lwana na Vafilisiti; na Daudi tsingulu tsitsye tsya geha.

¹⁶ Inyinga yeyo Ishibibenobu, wa li ku avana va gundu, wobuliduhu bwelitimu lilye bwa duka tsishekeli tsimia tsivaka tsyomugasa, ligerwa lyalyo, naye yeboha kivavi kihya, ya saavira kwiita Daudi.

¹⁷ Navutswa Abishai mwana wa Zeruia ya mu honnya, na a kuya Mufilisiti, nokumwiita. Hene yaho avandu va Daudi va mwisuhira, na va vola, Ive si u la tsia kandi halala nekwinye mu lihe, gase u la siminya itaya ya Israeli.

¹⁸ Na ga duka kandi inyima wa yaga, lihe lya li ho lya Vafilisiti ha Gobu: hene yaho Sibekai Muhushathi yiita Safu, wa li ku avana vogundu.

¹⁹ Inyima wa y aga ubulwani bwa li ho ku Vafilisiti ha Gobu: na Eliha nan mwana wa Jaareoregim Mubethlehemu yiita Goliati Mugiti, wa lu vango lwelitimu lilye lwa duka kuli lwomusala gwomuluguyu.

²⁰ Kandi ubulwani bwa li ho ha Gathu, ya li ho mundu mulala mutambi ligali, wa li nevidete vitano nekilala ku makono gombi, nevino vitano nekilala ku vi renge vyombi, vyosi vya li makumi gaviri na vine; uyu kandi yivulwa ku gundu.

²¹ Naye lwa yekonya ku Israeli, Jonathan mwana wa Shimei, amwavo Daudi, ya mwiita.

²² Yavo vane vivulwa ku gundu mu Gathu; na va gwa ku mukono gwa Daudi, noku makono gavatumekiri veve.