2 Samweli 2 - KITABU KITAKATIFU

¹ Na ga duka inyima wa yaga, Daudi ya teva Yahova, na a vola, Nzanegire kwingira mu lilala ku madala ga Yuda? Na Yahova ya mu volera, Wanegire. Na Daudi ye teva, Nzanegire kutsia haliha? Naye ya vola, U tsie Hebironi.

² Ma Daudi yanegira kutsia yo, navakali veve vaviri vanegira halala naye, Ahinoam Mujezireeli, na Abigaili wa li muka Nabali Mukarimeli.

³ Navandu veve ava li halala naye, ya va leta, sa mulala navandu venyumba yeye: nfivo va menya mmadala ga Hebironi.

⁴ Navandu va Yuda va tsia, ni va vakira yo Daudi maguta, a ve mwami ku inyumba ya Yuda. Na va volera Daudi, ni va vola, Avandu va Jabeshgileadi nivo ava ta Saulo.

⁵ Na Daudi ya tuma avatumwa ku avandu va Jabeshgileadi, nokuvola, Yahova a gasidze mwinye, kigira mwa vera munene wenyu tsimbabasi, uyu Saulo, na mwa mu ta.

⁶ Na kalunu Yahova a kolere mwinye tsimbabasi nageligali: na inze kandi nda mu tunga tsimbabasi yitsi, kigira mu koli inkuva yiyi.

⁷ Kunangwa kalunu makono genyu ga ve netsingulu, nomu ve avaluviriri; kigira Saulo, munene wenyu u kudzi, navenyumba ya Yuda va mbaki maguta mbe mwami kuvo.

⁸ Na Abineri mwana wa Neri, wa li munene welihe lya Saulo, w a vugula Ishboshethu mwana wa Saulo, na a mwambukidza na a mu leta Mahanaim;

⁹ na a mwamehidza a ve mwami ku Gileadi, noku Vaashuru, noku Jezireeli, noku Efiraim, noku Benjamini, noku Israeli vosi.

¹⁰ Ishboshethu, mwana wa Saulo, ya li na a duki mihiga makumi gane lwa ya tanga kwameha ku Israeli, na yameha mihiga gyiviri. Navutswa avenyumba ya Yuda va londa Daudi.

¹¹ Na inyinga ya Daudi ya li mwami mu Hebironi ku inyumba ya Yuda gya li mihiga gyitano na gyiviri nemyeli gyitano na mulala.

¹² Na Abineri mwana wa Neri, navatumekiri va Ishboshethu mwana wa Saulo, va twula Mahanaim kutsia Gibeon.

¹³ Na Joabu mwana wa Zeruia, navatumekiri va Daudi, va twula ni va vugana navo himbi nelidavalia lya Gibeon; na vikala, yava ku luvega yilu lwelidavalia, na yava ku luvega lundi.

¹⁴ Na Abineri ya volera Joabu, Mwadza, leka avasoleli yava va singire va kine imbiri wetu. Na Joabu ya vola, Va singire.

¹⁵ Hene yaho va singira ni va tsia ku luvega lundi ku livalidzwa lyavo: likumi na vaviri ku Benjamini, ku Ishboshethu mwana wa Saulo, na likumi na vaviri ku vatumekiri va Daudi.

¹⁶ Navo va gumirana sa mulala ya gumira wakye mutwe, nokutumita kivavi kikye mu mbalu mwawakye; ni ndiyo va gwa hasi halala: kigira yaga, ha zana ha langwa Helikathuhazurim, niho ha veye mu Gibeon.

¹⁷ Nobulwani bwa li budinyu ligali lidiku yilyo; na Abineri ya guutwa, navandu va Israeli, imbiri wavatumekiri va Daudi.

¹⁸ Navana vavaka va Zeruia va li ha zana, Joabu, na Abishai, na Asaheli: na Asaheli ya li wetsimbiru kuli imbongo.

¹⁹ Na Asaheli ya londerera Abineri; na mu litsia lilye si ya girunkana ku luvega lyomukono mulungi kinga mukono mosi ku lilonderera Abineri.

²⁰ Ma Abineri yekevuka, na a teva, Ive u veye Asaheli? Naye ya bugirira, Yee, ninze.

²¹ Na Abineri ya mu volera, Girunkana u tsie ku luvega lwomukono gugwo mulungi, kinga ku luvega lwomukono gugwo mmosi, na u gumire mulala ku vasoleli, u vugule vindu vivye vyobulwani. Navutswa Asaheli si ya bugirira kugirunkana nokuleka limulonderera.

²² Ma Abineri ya volera Asaheli kandi, Girunkana u leke kunonda: kigira ki inze nduke kukukuya hasi ku lirova? Kunangwa nda nyala ndi kuginga mmoni mwange kuhenza amwavo wowo Joabu?

²³ Navutswa ya sula kugirunkana: kigira yaga Abineri ya mu tumita mmunda nesililini lyelitimu lilye, nelitimu zana lya twulira mugongo; naye ya gwa ha zana yaho, na a kudzira ho: na ga duka, ku yavo vosi ava duka ha zana ha Asaheli ya gwa na a kudza, va singira ho.

²⁴ Navutswa Joabu na Abishai va londerera Abineri: liuva lya yera lwa va duka ku kigulu kya Ama, ki henza ku Gia, ku inzira ya migendanyama lya Gibeom

²⁵ Navana va Benjamini va vugana halala inyima wa Abineri, navo va li kiduma kilala, ni va singira ku kigulu kilala.

²⁶ Hene yaho Abineri ya langa Joabu, na a mu volera, Kivavi yikyo ki la mira madiku gosi? Si u manya bu la va ubululu ku kiheri? I la duka inyinga ki nu u laga avandu kuleka kulonoda avamwavo vavo?

²⁷ Na Joabu ya vola, Kuli Nyasaye a veye mwoyo, ive u vula kuvola, ngano avandu yavo va tsiye mugamba, kinga ngano si va londi sa mulala amwavo wewe mba.

²⁸ Na Joabu ya kupa kisiliva; navandu vosi va singira, navo si va londerera Israeli kandi mba, kandi si va lwana mba.

²⁹ Na Abineri navandu veve va genda budiku bei mu kireremu; na vambuka Yordani, navo va vitira hagati ha Bithiron, ni va duka Mahanaim.

³⁰ Na Joabu yirana kutwula kulonderera Abineri, na lwa ya mala kuvungidza avandu vosi halala, va geha ku avatumekiri va Daudi avandu likumi na vatano na vane na Asaheli.

³¹ Navutswa avatumekiri va Daudi va li ni va kuyi ku avandu va Benjamini, navandu va Abineri, tsimia tsivaka na makumi gatano na iilala va kudze.

³² Na va vugula Asaheli, ni va mu ta mu kilindwa kyadada wewe, kya li mu Bethlehemu. Na Joabu navandu veve va genda budiku bei, nomugamba bwa kyera kuvo ha Hebironi.