2 Samweli 17 - KITABU KITAKATIFU

¹ Kandi Ahithofeli ya volera Abisalom, Mbe umunwa kalunu ntovole avasatsa tsielfu likumi na tsiviri, na nda singira kulonderera Daudi ubudiku bwa lero:

² na nda duka kuye ku inyinga ya a luhi, na a veye namakono madendeyu, na nda mu tihidza; navandu vosi ava veye halala naye va liruka; na nda kuya umwami weng'ine;

³ navandu vosi nda viranya ku ive: mundu wa wenyanga a veye kuli vosi virane ku ive: na ndiyo avandu vosi va la va nemirembe.

⁴ Na livola yili lya yanzidza Abisalom ligali, na vakulundu vosi va Israeli.

⁵ Ma Abisalom ya vola, Kalunu mu lange Hushai Muariki kandi, ku duke kuhulira kandi aga uyu a vola.

⁶ Na Hushai lwa ya duka ku Abisalom, Abisalom ya mu volera, na a vola, Ahithofeli u voye kuli yaga na yaga: ku kole kuli a voye? Ni ga va ni ga ta veye ndiyo, ive u vole.

⁷ Ma Hushai ya volera Abisalom, Livola lya Ahithofeli ya ku ha, si li veye lilahi inyinga yiyi.

⁸ Kuvita yaga Hushai ya vola, Ive u manya dada wowo navandu veve, va veye avandu avaluviriri, na va veye nobu lulu ligali mu myoyo gyavo, kuli iduba ni i nyagiywi avana vayo mwigendanyama; na dada wowo a veye mundu welihe, na si a la gona halala navandu.

⁹ Henza, kalunu u viseywi mbogo, kinga ahandi: na ga la duka, lwa avandi kuvo va tanga kugwa, u hulira a la vola, ha veye nobwiiti mu avandu ava londanga Abisalom.

¹⁰ Na uyu u veye nobu luviriri, womwoyo gwigwe gu veye kuli mwoyo gweking'ang'a, a la salaluka ligali; kigira Israeli vosi va manya dada wowo a veye muluviriri ligali, na va veye halala naye va veye avandu avelihe.

¹¹ Navu tswa inze nku hedzanga livola lyange, Israeli vosi va vungidzwe halala ku ive, kutwula Dan kuduka Beersheba, kuli muyeke gu veye ku luginga lwenyanza ku bunyingi bwagwo; kandi ive mwene u tsie mbulwani.

¹² Ma ku la duka kuye hosi ha a loleka, nokwama kuye kuli lime lyamanga ku lirova; na ku uyu noku yavo vosi ava veye halala naye si ku li leka kali mulala.

¹³ Nokuvita yaga, na a va ni yingira mu lidala, hene yaho Israeli vosi va la leta migoye ku lidala yili, na ku la li kwesa, nokulivika mmugera, kuduka kagina kali kalala ka la vula ku nyoleka yo.

¹⁴ Na Abisalom navandu vosi va Israeli va vola, Livola yili li twula ku Hushai Muariki li veye lilahi kuvita livola lya Ahithofeli. Kigira Yahova u saaviye kugirunkannya livola lilahi lya Ahithofeli, Yahova a duke kuleta ubudamano ku Abisalom.

¹⁵ Hene yaho Hushai ya volera Zadoku na Abiatharu avasalisi, Ahi thofeli a voleye Abisalom ndi na ndi, navakulundu va Israeli; na inze mba voleye ndi na ndi.

¹⁶ Kunangwa kalunu u tume bwangu, u volere Daudi, kuvola, U ta gona himbi nenyambuku yomigendanyama ubudiku bwa lero, navutswa ga mu dukira mwambuke; gase mwami a la mirwa, navandu vosi va veye halala naye.

¹⁷ Na Jonathan na Ahimaazu va menya himbi na Enrogeli, mukana mutugwa mulala ya tsia kuvavolera; navo va tsia kandi kuvolera mwami Daudi: kigira si va nyala kulolwa ni vingiranga mu lidala.

¹⁸ Navutswa muyai mulala ya va lola, naye ya volera Abisalom: navo va singira vombi bwangu, ni va duka ku inyumba yomundu mulala mu Ba hurim, wa li nekidaho ha mugidzi hehe: navo viika mukyo.

¹⁹ Nomukali uyu ya kunika kikuniku ku munwa gwekidaho, na a vagala ku ingano ya hulwa; na kindu kya vula kuloleka.

²⁰ Na vatumekiri va Abisalom va tsia ku mukali ha inyu mba; ni va mu teva, Ahimaazu na Jonathan va veye haliha? Nomukali ya va volera, Vambuki mugera gwa madzi. Navo lwa va mala kuvenya, kya vula, virana Yerusalemi.

²¹ Na ga duka, lwa va twula, vanegira kutwula mu kidaho, ni va tsia kuvolera mwami Daudi; va volera Daudi, Mu singire, mwambuke amadzi bwangu; kigira Ahithofeli a voye ndi na ndi ku mwinye.

²² Ma Daudi ya singira, navandu vosi ava li halala naye, ni vambuka Yordani: lwa bwa kya mulala kuvo si ya tigala wa vula kwambuka Yordani.

²³ Na Ahithofeli lwa ya lola livola lilye li vuli kulondwa, ya boha isukiri yeye, na a singira, na a tsia mu inyumba yeye, mu lidala lilye, na ya lomba makuva genyumba yeye, ni yesunga; na a kudza, na ya tebwa mu kilindwa kya dada wewe.

²⁴ Kunangwa Daudi ya duka Mahanaim. Na Abisalom yambuka Yordani, uyu navandu vosi va Israeli va li halala naye.

²⁵ Na Abisalom ya vika Amasa igulu ku lihe lyavasikari mbugono bwa Joabu. Na Amasa ya li mwana womundu mulala, wa langwa Athira Muisraeli, wingira ku Abigaili, mukana wa Nahashu, amwavo Zeruia, mama wa Joabu.

²⁶ Na Israeli na Abisalom va singeridza mahema gavo mu kivala kya Gileadi.

²⁷ Na ga duka, lwa Daudi ya duka Mahanaim, Shobi mwana wa Na hashu wa Raba lyavana va Amon na Makiru mwana wa Amieli wa Lodebari, na Barizilai Mugileadi wa Rogelim,

²⁸ va letera Daudi nava ndu va li halala naye vitali, netsiba kuli, neviju vyobudohi, nengano nesnairi, nobusie, nevisambe, namaganda, netsimpindi, nobuswage bukalange,

²⁹ nobwuki, namaguta geng'ombe, namagondi, netsinkonye tsyuminywa, va duke kulia: kigira va vola, Avandu yava va veye nenzala kandi va luhi, na va veye nobululu migendanyama.