2 Samweli 15 - KITABU KITAKATIFU

¹ Na ga duka inyima wa yaga, Abisalom yelombera ligari netsiparasi, navandu makumi gatano kunyagula imbiri wewe.

² Na Abisalom ya vuka mabwebwe, na a singira ku nyasi ku inzira yekiribwa: na ga duka, ku vosi wa li nelivanzwa lya mu dukira kutsia ku mwami a duke kumukalagira, hene yaho Abisalom ya langa uyu, nokumuteva, U veye welidala ki? Naye ya vola, Inze mutumekiri wowo mbeye wehiri indala ya Israeli.

³ Na Abisalom ya mu volera, Henza, makuva gogo ga veye malahi nageligali; navutswa si ha veye nomundu womwami ya laga kukuhulira.

⁴ Na Abisalom ya vola kandi, Ngano inze mbikeywi kuva mukalagi mu kivala yiki, ku vosi mundu u veye nekindu, kinga nelivanzwa, yadze ku inze, ngano nda ka mu kalagira bulungi

⁵ Na ga duka, ku vosi umundu, lwa ya dukanga himbi kumuchelidza, ya nyira mukono gwigwe, nokumugumira, nokumbusa.

⁶ Na Abisalom ya kola kuli yaga ku Israeli vosi ava tsitsanga ku mwami va duke kukalagirwa: na ndiyo Abisalom yiba myoyo gyavandu va Israeli.

⁷ Na ga duka inyima wemihiga makumi gane, Abisalom ya volera mwami, Nku goonya, u ndeke ntsie kutunga lilagana, lya nda lagana na Yahova, ha Hebironi.

⁸ Kigira inze mutumekiri wowo nda vika lilagana lwa nda menya ha Geshuru mu Siria, ni mbola, Yahova na a va ni ya nzirannya kandi Yerusalemi ligali, hene yaho nda tumekira Yahova.

⁹ Nomwami ya mu volera, U tsie nemirembe. Ma ya singira na a tsia Hebironi.

¹⁰ Navutswa Abisalom ya tuma avaluti mu tsihiri tsyosi tsya Israeli, na a vola, Nonoho lwa mu hulira mwoyo gwekisiliva, hene yaho mu la vola, Abisalom a veye mwami mu Hebironi.

¹¹ Navandu tsimia tsiviri va twula Yerusalemi kutsia halala na Abisalom, va langwa, navo va tsia mu busiru bwavo, na si va manya kindu kali kilala.

¹² Na Abisalom ya langa Ahithofeli Mugilon, mukonyi wa Daudi mu livola, kutwula mu lidala lilye, lidala lya Gilo, inyinga ya a haananga vihaanwa. Na lihambana lyetsimbemba yili lya li netsingulu; kigira avandu va li halala na Abisalom va medeka kazozo.

¹³ Nomutumwa ya duka ku Daudi, kuvola, Myoyo gyavandu va Israeli gyi londanga Abisalom.

¹⁴ Na Daudi ya volera avatumekiri veve vosi ava li halala naye ha Yerusalemi, Mu singire kwiruke; naho si ha veye nomulala ku kwinye u nyala kuhona ku mukono gwa Abisalom: kola bwangu kusingire, gase a la ku nyola bwangu, nokuleta ku kwinye vindu vidamano, nokukuya lidala nobwogi bwekivavi.

¹⁵ Avatumekiri vomwami va volera mwami, Henza, avatumekiri vovo kwetegeki kukola kindu kya u tovola, munene wange mwami.

¹⁶ Nomwami ya twula, navandu venyumba yeye vosi va mu londa. Umwami ya leka avakali likumi, ava li avasuria, va linde inyumba.

¹⁷ Nomwami ya twula, navandu vosi va mu londa; ni va menya hakekeke mu Bethmerahaka.

¹⁸ Navatumekiri veve vosi va vita himbi naye; na Vakerethi vosi, na Vapelethi vosi, na Vagiti vosi, avandu tsimia tsitano na indala ava mu londa kutwula Gathu, va vita imbiri womwami.

¹⁹ Hene yaho mwami ya teva Itai Mugiti, Kigira ki ive u londanga kwinye? Wirane u menya halala nomwami: kigira ive u veye mugeni, kandi u veye mundu wa kungwa; wirane hango hoho mwene.

²⁰ Kuli wadza mgolova vutswa, ga ndukira kukuniga kutsie yiyi ne yiyi halala ne kwinye, kuli mbeye mu litsia ha nyala? Wirane, na yava vamwavo vovo u viranye; nemirembe nageligali vi ve halala nive.

²¹ Na Itai ya tivulira mwami, na a vola, Kuli Yahova a veye mwoyo, kandi kuli munene wange mwami a veye mwoyo, ligali ha munene wange mwami a va, ni ha va ni ha veye likudza, kinga lihindira, ha zana inze mutumekiri wowo nda va ho.

²² Na Daudi ya volera Itai, Tsia wambuke. Na Itai Mugiti yambuka, navandu veve vosi, navakekeke vosi ava li halala naye.

²³ Nekivala kyosi kya lira nomwoyo munene, navandu vosi vambuka: nomwami mwene yambuka mugera gwa Kidiron, navandu vosi vambuka kutsia ku inzira yomwigendanyama.

²⁴ Na henza, Zadoku yadza kandi, na Valevi vosi halala naye, vaginganga lisanduku lyelilagana lya Nya saye; na va vika hasi lisanduku lya Nyasaye, na Abiatharu yanegira, kuduka inyinga avandu vosi va twuli mu lidala.

²⁵ Nomwami ya volera Zadoku, U ginge lisanduku lya Nyasaye u lirannye mu lidala kandi: ni mba ni nyola tsimbabasi imbiri wa Yahova, a la nzirannya, na a la mmannya lisanduku, na hokumenya hehe:

²⁶ navutswa na a va na a vola kuli yaga, Si nyanzidzeywi mu ive; henza, mbeye ho, a nkolere kuli a lola kuva bulahi.

²⁷ Nomwami ya volera Za doku musalisi, Ive si u veye umuloli? Wirane mu lidala nemirembe, na avana vovo vombi va tsia halala nive, Ahimaazu mwana wowo, na Jona than mwana wa Abiatharu.

²⁸ Henza, inze nda linda ha tsinyambuku tsyomigendanyama, kuduka inyinga yelikuva lyokumannya li duka ku inze li twula ku ive.

²⁹ Kunangwa Zadoku na Abiatharu va ginga lisanduku lya Nyasaye ni va tsia nalyo mu Yerusalemi: ni va menya yo.

³⁰ Na Daudi yanegira ku kyanegiru kyekigulu kya Mizeituni, na ya lira lwa yanegiranga: na ya kunikwa mutwe, na a genda nevirenge vyere: navandu vosi ava li halala naye va kunikwa sa mulala mutwe gwi gwe, navo va lira lwa vanegiranga.

³¹ Nomundu mulala ya volera Daudi, na a vola, Ahithofeli a veye mu lihambana lyetsimbemba halala na Abisalom. Na Daudi ya vola, O Yahova, nku goonya, livola lya Ahithofeli, u li girunkannye li gwe ubusiru.

³² Na ga duka, Daudi lwa ya duka ku kereremu kyekigul u ha Nyasaye ya sigamirangwa, henza, Hushai Muariki yadza kumwaganira, na ya li nelikoti lya tanduka, na ya li na marova ku mutwe gwigwe.

³³ Daudi ya mu volera, Ive nu u va nu u tsia imbiri halala ninze, hene yaho u la va musiigo ku inze:

³⁴ navutswa nu u va nu wirana mu lidala, nokuvolera Abisalom, Inze nda va mutumekiri wowo, O mwami; kuli nda li mutumekiri wa dada wowo ku madiku ga vita, ni ndiyo kandi nda va mutumekiri wowo kalunu; hene yaho u la nguutira livola Iva Ahithofeli.

³⁵ Kandi si va veye yo halala nive Zadoku na Abiatharu avasalisi? Kunangwa ga la va, kindu kyosi kya u hulira kutwula mu inyumba yo mwami, u la volera Zadoku na Abia tharu avasalisi.

³⁶ Henza, va veye halala navana vavo vaviri, Ahimaazu, mwana wa Zadoku, na Jonathan, mwana wa Abiatharu; na mu la leta ku inze vindu vyosi vya u hulira namakono gayo.

³⁷ Ma Hushai, mulina wa Daudi, yingira mu lidala; na Abisalom yingira mu Yerusalemi.