2 Samweli 12 - KITABU KITAKATIFU

¹ Na Yahova ya tuma Nathan a tsie ku Daudi, Naye ya duka kuye, na a mu volera makuva yaga, Va li ho avandu vaviri mu lidala lilala; mulala ya li mutugi, nowundi mudaka.

² Mutugi ya li nevyayo vyamagondi netsing'ombe vinyingi ligali;

³ navutswa mudaka si a veye nekindu, ni i ta li kimeme kyeligondi kilala kikekeke kisuveni, kya ya gula na a ki lera: nakyo kya li halala naye, nokuviruka halala navana veve; na kya lia ku vyokulia vivye, na kya nwa ku kikombe kikye, na kya gona mu kiritu kikye, nakyo kya li kuye kuli mukana wewe.

⁴ Nomugeni yadza ku mutugi, naye ya sula kuvugula mutugu ku kyayo kikye kyamagondi nokyayo kikye kyetsing'ombe, kulombera mugeni u duki kuye, navutswa ya vugula kimeme kyeligondi kyomudaka, na a ki lombera mugeni u duki kuye.

⁵ Ma ubutima bwa Daudi bwaaka ku mundu uyu; naye ya volera Nathan, Kuli Yahova a veye mwoyo, umundu uyu wa kola inkuva yiyi u dukani nelikudza:

⁶ na a lirannya kimeme kyeligondi hali kane, kigira ya kola inkuva yiyi, kandi kigira ya vula kuva netsimbabasi.

⁷ Na Nathan ya volera Daudi Ive niye mundu zana. Yahova Nyasaye wa Israeli a ku volera ndi, Inze nda ku vaka maguta u ve umwami ku Israeli, na nda ku honnya ku mukono gwa Saulo:

⁸ na nda ku ha inyumba yomunene wowo, navakali vomunene wowo nda ku ha mkiritu kikyo, na nda ku ha inyumba ya Israeli na Yuda; na kandi yaga ni ga va ni ga li kugeha, nkano inze nda ka ku meda yivi na yivi.

⁹ Kigira ki ive u legi likuva lya Yahova, nokukola agobudamano imbiri wewe? Ive u kuye Uria Muhiti nekivavi, na u vuguye mukali wewe kuva mukali wowo, na u mwiiti nekivavi kyavana va Amon

¹⁰ Kunangwa kalunu kivavi si ki la twula mu inyumba yoyo mihiga nemihiga, kigira u legi inze, na u vuguye mukali wa Uria Muhiti a ve mukali wowo.

¹¹ Yahova a ku volera, Henza, nda vukidza budamano ku ive mu inyumba yoyo mwene; na nda vugula vakali vovo imbiri wetsimoni tsitsyo, nda va haana ku mutende wowo naye a la gona navakali vovo mu bulavu bweliuva yili.

¹² Kigira ive wa kola inkuva yiyi makiriri: navutswa nda kola yaga imbiri wa Israeli vosi, na imbiri weliuva.

¹³ Na Daudi ya volera Nathan, Nkoleye Yahova ubwoni. Na Nathan ya volera Daudi, Yahova u twulidzi ubwoni bubwo; u la vula kukudza.

¹⁴ Navutswa, kigira ive wa haana ku vasigu ubwiyangu bunene bwokunyega Nyasaye, ku likola yili umwana wivulwa ku ive ligali a la kudza.

¹⁵ Na Nathan ya twula mu inyumba yeye. Na Yahova ya kuya mwana wa muka Uria yivulira Daudi, na ya li mulwaye ligali.

¹⁶ Kunangwa Daudi ya saala Nyasaye kigira mwana; na Daudi ya honga lilia, na yingira, na a gona hasi ubudiku bwosi.

¹⁷ Navakulundu venyumba yeye va vuka, ni va singira himbi naye kumbukidza hasi: navutswa ya sula kandi si ya lagira halala navo.

¹⁸ Na ga duka ku lidiku lya kola gatano na gaviri mwana ya kudza. Navatumekiri va Daudi va tia kumuvolera, Mwana u kudzi, kigira va vola, Henzi, lwa mwana ya li na a kikiri mwoyo, kwa mu volera, naye si a ku hulira mba: a lekupidza ndi kivi, ni ku va ni ku mu volera, Mwana u kudzi

¹⁹ Navutswa Daudi lwa ya lola vatumekiri veve ni va monyananga halala, Daudi ya manya mwana u kudzi; ma Daudi ya teva vatumekiri veve, Mwana u kudzi? Navo va mu volera, Yee, u kudzi.

²⁰ Hene yaho Daudi ya vuka hasi, ni yesinga, ni yevaka maguta, nokwivika tsingubo tsindi; ni yingira mu inyumba ya Yahova, na a sigamira: ma ya tsia mu inyumba yeye mwene; na lwa ya laga, va mu lombera ubukima, na a lagira.

²¹ Hene yaho vatumekiri veve va mu teva, Inkuva ki yiyi ya u koli? Wa honga lilia nokulilira mwana, lwa ya li mwoyo, navutswa lwa a kudzi, wa vuka no u lagira ubukima.

²² Naye ya va volera, Lwa mwana ya li na a kikiri mwoyo, nda honga lilia nokusyoma: kigira nda vola, Ni bwaha u manya Yahova a la mbererera, ku mwana a hone?

²³ Navutswa kalunu u kudzi, kigira ki mbonge lilia? Nyala kumwirannya kandi? Inze nda tsia kuye, navutswa uyu si a lirana ku inze mba.

²⁴ Na Daudi ya leminya mwoyo gwa Bath-sheba mukali wewe, naye ya duka kuye, na a gona naye: ni yivula mwana muyai, na ya gulika lieta lilye Solomoni. Na Yahova ya mu yanza;

²⁵ naye ya tuma nomukono gwa Nathan muprofeti; naye ya mu gulika lieta lilye Jedidia, kigira Yahova.

²⁶ Na Joaou ya lwana na Raba lyavana lya Amon, na a vugula lidala lyobwami.

²⁷ Na Joabu ya tuma vatumwa ku Daudi, na a vola, Inze mali kulwana na Raba; yee, mbuguye lidala lyamadzi.

²⁸ Kunangwa kalunu u vungidze avandu va tigaye i halala, nokuvalohidza kulidala, nokulivugula; gase inze nda vugula lidala, na li la gulikwa lieta lyange.

²⁹ Na Daudi ya vungidza avandu vosi halela, na a tsia Raba, na a lwana nalyo, na a li vugula.

³⁰ Na ya vugula itaji yomwami ku mutwe gwigwe; bulidihu bwayo bwa duka italenta indala yethahabu, namagina agobuguli budinyu ga li muyo; nayo ya vikwa ku mutwe gwa Daudi. Na ya vugula vilanye vyelidala, vinyingi ligali.

³¹ Na ya leta kyova avandu ava li mu lidala, na a va vika isi wemisameno, na isi wetsimbivu tsyevivya, na isi wetsimbadzi, na a va niga kuvita hagati ha kisambiru kyamatafali: na ya kola ndiyo ku madala gosi gavana va Amon. Na Daudi navandu vosi virana Yerusalemi.