2 Samweli 11 - KITABU KITAKATIFU

¹ Na ga duka, ku muhiga gwa londa, inyinga yavami va twula kutsia mbulu ani, Daudi ya tuma Joabu, navatumekiri veve, halala na Israeli vosi; na va dividza avana va Amon, nokukumbiridza Raba. Navutswa Daudi mwene ya menya ha Yerusalemi.

² Na ga duka inyinga ya mgolova Daudi ya vuka ku kitali kikye, na a genda ku igulu wenyumba yobwami: na lwa ya li igulu ya lola mukali ni yisinganga: nomukali zana ya li weligondo lilahi.

³ Na Daudi ya hila kuteva makuva gomukali uyu. No mundu mulala ya vola, Uyu si a veye Bathsheba, mwana wa Eliam, muka Uria Muhiti?

⁴ Ma Daudi ya tuma vatumwa, na a mu vugula; naye yadza kuye, na a gona naye (kigira mukali zana ya li na a veye munifu ku litsia mu mweli lilye); na yirana mu inyumba yeye.

⁵ Nomukali zana ya vereka; naye ya tuma kuvolera Daudi, na a vola, Inze mbeye inda.

⁶ Na Daudi ya hila makuva ku Joabu, na a vola, Tuma Uria Muhiti ku inze. Na Joabu ya tuma Uria ku Daudi.

⁷ Na lwa Uria ya duka kuye, Daudi ya mu teva makuva ga Joabu a veye ndi, namakuva gavandu va veye ndi, na kuli ubulwani bu veye.

⁸ Na Daudi ya volera Uria, U tsie mu inyumba yoyo, wisinge vire nge vivyo. Na Uria ya twula mu inyumba yomwami, nekihaanwa kyevyokulia kya mu londa kutwula ku mwami.

⁹ Navutswa Uria ya gona ha kiliango kyenyumba yomwami halala navatumekiri vosi womunene wewe na ya vula kusulunguta ku inyumba yeye.

¹⁰ Lwa va volera Daudi, na va vola, Uria ya vula kutsia mu inyumba yeye, Daudi ya teva Uria, Ive si wa li kutwula mu lugendo? Kigira ki u vuli kutsia mu inyumba yoyo?

¹¹ Na Uria ya volera Daudi, Lisanduku, na Israeli, na Yuda, va menya mmasa; nomunene wange Joabu, navatumekiri vomunene wange, va menyanga mwigendanyama kulwang'amira; ga ndukira inze kutsia mu inyumba yange, nokulia, nokunwa, nokugona nomukali wange? Kuli ive u veye mwoyo, na kuli mwoyo gugwo gu veye mwoyo, inze si nda kola yaga.

¹² Na Daudi ya volera Uria, Menya hano lero kandi, nomu gamba nda ku leka u tsie. Ma Uria yikala mu Yerusalemi lidiku yilyo nelidiku lindi li londa.

¹³ Na lwa Daudi ya mu langa, ya lia na a nwa imbiri wewe; na ya mu hambikidza: na inyinga ya mgolova ya twula na a gone ku kitali kikye halala navatumekiri vomunene wewe, navutswa ya vula kutsia mu inyumba yeye.

¹⁴ Na ga duka mugamba, Daudi ya ng'odera Joabu ibaruwa, na a gi hilira mmukono gwa Uria.

¹⁵ Na ya ng'oda mwibaruwa, na a vola, U vike Uria imbiri mu bulwani bu veye bululu ligali, na mu twule na mmu leke, a duke kukuywa, a kudze.

¹⁶ Na ga duka, lwa Joabu ya henza lidala, ya vika Uria ha ya manya avaluviriri va veye ho.

¹⁷ Navandu velidala va twula, kulwana na Joabu: navandu valala kuvo, kuli avatumekiri va Daudi, va gwa; na Uria Muhiti ya kudza kandi.

¹⁸ Hene yaho Joabu ya hila makuva kuvolera Daudi makuva gosi gobulwani;

¹⁹ naye ya li laga mutumwa, na a vola, Lwa u mali kuvolera mwami makuva gevindu vyosi vyobulwani,

²⁰ ga la va, umwami na a va na a vihirirwa, na a ku volera, Kigira ki mwisunda himbi ku lidala kulwana? Si mu manya va la lasa mibano kutwula ku lidigi?

²¹ Ibwaha wa kuya Ahimeleku, mwana wa Jerubeshethu? Si a veye mukali wa sikisa isyu kuye kutwula ku lidigi, kuduka na a kudzira ha Thebezu? Kigira ki mwisunda himbi ku lidigi? Kene yaho u Ia vola, Mutumekiri wowo Uria Muhiti u kudzi kandi.

²² Ma mutumwa ya tsia, na a duka na a mannya Daudi vindu vyosi vya Joabu ya mu tuma kumannya.

²³ Umutumwa ya volera Daudi, Avandu yavo va ku guuta, na va ku twulira kuduka mwigendanyama, na kwinye kwa li kuvo kuduka ha bwingiriru bwe kiribwa.

²⁴ Navalasi va lasa mibano ku kwinye avatumekiri vovo kutwula ku lidigi igulu; navandu valala ku vatumekiri vomwami va kudzi, na Uria Muhiti, kandi mutumekiri wowo u kudzi.

²⁵ Hene yaho Daudi ya volera mutumwa, U volere Joabu yaga, Inkuva yiyi i ta ku viririhidza mba, kigira kivavi ki litsanga mulala kuli ki litsanga wundi; u dase ubulwani bwelidala, u li guute: na u mu luviridze.

²⁶ Nomukali wa Uria lwa ya hulira musatsa wewe u kudzi, ya syomera musatsa wewe.

²⁷ Na lwa lisyoma lya vita, Daudi ya tuma mundu kuvugula mukali nokumbika mu inyumba yeye, na a va mukali wewe, ni yivula mwana muyai. Navutswa inkuva ya Daudi ya kola ya vihiriridza Yahova.