2 Samweli 10 - KITABU KITAKATIFU

¹ Na ga duka inyima wa yaga, umwami wavana va Amon ya kudza, na Hanun mwana wewe yameha mbugono bwibwe.

² Na Daudi ya vola, Nda vererera Hanun mwana wa Nahashu, kuli dada wewe ya vererera inze. Na Daudi ya hila kuye avatumekiri kumuleminya mwoyo kigira dada wewe. Na vatumekiri va Daudi va duka mu kivala kyavana va Amon.

³ Navutswa avanene vavana va Amon va volera Hanun munene wavo, ni va rola, Ive u ganagananga Daudi uyu yidzominyanga dada wowo, neliieta avandu kukuleminya mwoyo? Daudi si ya tuma vatumekiri veve ku ive va duke kuluta lidala, nokuliligula nokulitung'aminya?

⁴ Ma Hanun ya vugula avatumekiri va Daudi, na a va vega sa mulala inusu yetsinderu tsitsye, na a kalaga tsingubo tsyavo hagati kuduka ku madako, na a v a kunga.

⁵ Na lwa va volera Daudi, ya tuma avandu kuvagana; kigira avandu yavo va li netsisoni ligali. Nomwami ya vola, Mu menye ha Yeriko kuduka tsinderu tsyenyu tsi mere, ma mwirane.

⁶ Navana va Amon lwa va lola va gwiye kyokuvihiridza Daudi, avana va Amon va tuma na va lagana litunga lyelihe lya Vasiria va Bethrehobu, na Vasiria va Zoba, avaskari va genda nevirenge tsielfu makumi gaviri, nomwami wa Maaka halala navandu elfu, navandu va Tobu tsielfu likumi na tsiviri.

⁷ Na lwa Daudi ya hulira yaga, ya tuma Joabu, nelihe lyosi lyavaluviriri.

⁸ Navana va Amon va twula, ni va lomba ubulwani ha bwingiru bwekiribwa: na Vasiria va Zoba, na va Rehobu, navandu va Tobu na va Maaka, va li veng'ine mwigendanyama.

⁹ Na Joabu lwa ya lola ubulwani bu lombeywi kuye imbiri nenyima, ya tovola mu avandu avatovoli vosi ava Israeli, na va va lohidza kulwana na Vasiria:

¹⁰ navandi vosi ava tigala ya va vika mmukono gwamwavo wewe Abishai; naye ya va lohidza va lwane navana va Amon.

¹¹ Naye ya mu volera, Vasiria ni va va netsingulu kuguuta inze, hene yaho u la nkonya; navutswa avana va Amon ni va va netsingulu kuguuta ive, hene yaho inze ndadza kukukonya.

¹² U ve nobuluviriri, kwelolekidze ku veye avasatsa kigira avandu vetu, kandi kigira amadala ga Nyasaye wetu: na Yahova a kole aga a lolanga kuva malahi.

¹³ Ma Joabu navandu va veye halala naye visunda himbi kulwana na Vasiria: navo viruka imbiri wewe.

¹⁴ Navana va Amon lwa va lola Vasiria viruki, navo kandi viruka imbiri wa Abishai, ni vingira mu lidala. Hene yaho Joabu yirana kutwula ku avana va Amon, na a duka Yerusalemi.

¹⁵ Na lwa Vasiria va lola va guuteywi imbiri wa Israeli, va vugana halala.

¹⁶ Na Hadarezeri ya hila makuva, kuvungidza Vasiria ava li engereka wo Mugera: na va duka Helam, halala na Shobaku munene welihe lya Hadarezeri wa li munene wokuvimirira.

¹⁷ Na Daudi ya volerwa; naye ya vungidza Israeli vosi halala, na yambuka Yordani, na a duka Helam. Na Vasiria velohidza avene kulwana na Daudi, na va lwana naye.

¹⁸ Na Vasiria viruka imbiri wa Israeli; na Daudi yiita ku Vasiria avandu avamagari tsi mia tsitano na tsiviri, navaskari vokunina ku tsiparasi tsielfu makumi gane, na ya kupa Shobaku munene welihe lyavo, na a kudzira yo.

¹⁹ Navami vosi ava li avatumekiri va Hadarezeri lwa va lola va guuteywi imbiri wa Israeli, va kola mirembe na Israeli, ni va va tumekira. Na ndiyo Vasiria va tia kukonya avana va Amon kandi.