2 Petro 3 - KITABU KITAKATIFU

¹ Avayanze, ibaruwa yiyi yange ni ya kaviri ya nng'odera mwinye; mu tsyombi mbukidzanga myoyo gyenyu gyeligali ku limwidzulitsa;

² mu duke kwidzulitsa amakuva aga vaprofeti vatakatifu va vola ku matsyambiri, nelilaga lyo Mwami Muhonnyi lya dukira ku vatumwa venyu:

³ mu litanga kumanya likuva yili, mu madiku gekiheri avekihenyahenye va ladza nekihenyahenye ava gendanga kuli likayirwa lyavo avene,

⁴ nokuvola, Lisuuviridza lyeliduka lilye li veye haliha? Kigira kutwula vaguga vetu va gona tsindolo, vindu vyosi vi veye ho kuli wa vya li kutwula inyinga ya vya lombwa.

⁵ Kigira likuva yili lya va gotera ku litovola lyavo avene ligulu lya li yo kutwula kale, nelirova lya hambana li singira kyova wamadzi kandi mu madzi, kigira likuva lya Nyasaye;

⁶ kugo lirova lya li ho, lya dividzwa ku lizulitswa amadzi:

⁷ navutswa ligulu li veye ho kalunu, nelirova, kigira likuva zana li vikeywi kuduka mu muliru, li lindangwa kuduka ku lidiku lyelikalaga nokulidividzwa lyavandu ava vula kutia Nyasaye.

⁸ Navutswa, avayanze, kindu yiki kilala mu tivirira, ku Mwami lidiku lilala li veye kuli mihiga elfu, kandi mihiga elfu gyiveye kuli lidiku lilala.

⁹ Mwami si ya lindagira mu lisuuviridza lilye, kuli avandi va vola lilindagira; navutswa yikudzira ku mwinye, kigira si yenya mundu mulala a dive, navutswa yenya vosi va duke ku lyeganira.

¹⁰ Navutswa lidiku lyo Mwami li la duka kuli mwivi; mu lidiku yilyo ligulu li la vita nomuliviti munene, nevindu vya kale vi la timbuluka ku muliru munene, kandi lirova nemiyinzi gyi veye mulyo gyi la sambwa.

¹¹ Kunangwa kigira vindu yivi vyosi vi lati mbululwa ndiyo, ga mu dukira kuva avandu aveliva ki mu ligenda lyosi litakatifu nomu litibwa lya Nyasaye,

¹² mu lindirire nokukayirwa ligali lidza lyelidiku lya Nyasaye, kigira yilyo ligulu li la timbululwa ku lyaaka muliru, nevindu vya kale vi li saluluka ku muliru munene?

¹³ Navutswa, kuli lisuuviridza lilye ku lindirira ligulu lihya nelirova lihya lyobulungi bu menyanga mu.

¹⁴ Kunangwa, avayanze, kigira mu lindirira vindu yivi, mu kole ubugulu mu duke kunyolerwa mu mirembe, bugira kuva netsimbala kandi bugira kindu ku mwinye imbiri wewe.

¹⁵ Kandi mu vole lyekudzira lyo Mwami wetu li veye ubuhonnyi, kuli amitu wetu Paulo muyanze ya mu ng'odera kandi, kuli ubugeeri bwa ya hebwa;

¹⁶ kandi kuli mu tsibaruwa tsitsye tsyosi, a letanga vindu yivi; tsibaruwa tsi veye namakuva malala ga veye madinyu kuhulira, aga yava va vula kwegidzwa nokuvula kuluvirira va girunkannya, kuli va girunkannya amang'oda gandi kuduka kwidividza avene.

¹⁷ Kunangwa mwinye, avayanze, kigira mu manya vindu yivi, mwelinde gase lihyolo lyavebaali li la mu gotidza, mu gwe kutwula mu buluviriri bwenyu avene.

¹⁸ Navutswa mu kulire mu tsimbabasi nomu limanya lyo Mwami wetu Muhonnyi Yesu Kristo. Ubukumi bu ve kuye kalunu imihiga nemihiga. Amini.