2 Avami 9 - KITABU KITAKATIFU

¹ Na Elisha muprofeti ya langa mulala ku avana vavaprofeti, na ya mu volera, Boha kikenge kikyo, u vugule kiseve kyamaguta mmukono gugwo, u tsie Ramothu-gileadi.

² Lwa u duka yo, u henze yo Jehu mwana wa Jehoshafatu mwana wa Nimshi, wingire, u mu twulidze a twule hagati ha vamwavo veve, u mu hile mu inyumba yomugati.

³ Ma u vugule kiseve kyamaguta, na u mu tsukire ku mutwe gwigwe, u vole, Yahova a vola, mbaki ive amaguta u ve mwami ku Israeli. Kunangwa u ligula muliango, nokwiruka, u ta lindagira mba.

⁴ Ma musoleli uyu, muprofeti musoleli, ya tsia Ramothu gileadi.

⁵ Lwa ya duka yo, henza, avanene velihe va li ni vikaye; na ya vola, Ndumeywi ku ive nelikuva, O munene. Na Jehu ya mu teva, Ku u li ha ku kwinye kwosi? Naye ya vola Ku ive, O munene.

⁶ Na ya singira ni yingira mu inyumba: na a mu tsukira maguta ku mutwe gwigwe, nokumuvolera, Yahova, Nyasaye wa Israeli a volanga, Mbaki ive amaguta u ve umwami ku avandu va Yahova, kali ku Israeli.

⁷ Na u la kuya inyumba ya Ahabu munene wowo, nduke kuvanza masahi gavatumekiri vange avoprofeti, na masahi gavatumekiri vosi va Yahova, mmu kono gwa Jezebeli.

⁸ Kigira inyumba ya Ahabu yosi i la diva; nda mu twulidza musatsa sa mulala wa Ahabu, uyu wa bofwa na uyu wa bohololwa mu Israeli.

⁹ Nda kola inyumba ya Ahabu i fwanane nenyu mba ya Jeroboam mwana wa Nebati, kandi i fwanane nenyumba ya Baasha mwana wa Ahija.

¹⁰ Na tsimbwa tsi la liira Jezebeli mu kidieli kyomulimi kya Jezireeli na si a la va ho wokumuta. Na yigula muliango, ni yiruka.

¹¹ Ma Jehu ya twula na a tsia ku vatumekiri vomunene wewe: nomulala ya mu teva, Gyi veye mirembe? Kigira ki mulalu uyu yadzi ku ive? Na ya va volera, Mu manya uyu, kandi mu manya livola lilye.

¹² Va vola, bu veye bubehi; u ku volere. Na ya vola, Ya mbolera yaga na yaga, na a vola, Yahova a vola Mbaki ive amaguta u ve mwami ku Israeli.

¹³ Ma va kola bwangu nokuvugula sa mulala ingubo yeye, nokugivika isi wewe igulu wevikaa, ni va kupa kisiliva, ni va vola, Jehu a veye mwami.

¹⁴ Ma Jehu mwana wa Jehoshafatu mwana wa Nimshi ya kola bwebaali ku Joram. (Na Joram ya li na a lindanga lidala lya Ramothu gileadi, uyu na Israeli vosi, kigira Hazaeli nmwami wa Siria;

¹⁵ navutswa mwami Joram ya li ni yirani a duke kulwalidzwa mu Jezireeli tsing'oma tsya Vasiria va mwaata, lwa ya lwana na Hazaeli mwami wa Siria.) Jehu ya vola, Ni li va ni li veye lyenya lyenyu, mu ta leka mundu a hononoke, a twule mu lidala, kutsia kuhila makuva Jezireeli.

¹⁶ Ma Jehu ya nina mu ligari na a tsia Jezireeli; kigira Joram ya li na ya gona yo. Na Ahazia mwami wa Yuda ya li na a sulunguti kutsia kulola Joram.

¹⁷ Umulindi ya singira ku kitaradzi ha Jezireeli, na a lola kiduma kyavandu va Jehu lwa vadzanga, na n ya vola, Ndolanga kiduma kyavandu. Joram ya mu volera. Vugula wokunina ku iparasi u mu tume a tsie kuvaganira, na a va teve, Gyi veye mirembe?

¹⁸ Ma mundu mulala wokunina ku iparasi ya tsia kumwa ganira, na a teva, Mwami a vola Ni mirembe? Na Jehu ya mu tivuiira, U veye ndi nemirembe? Girunkana wingire inyima wange. Mulindi ya twulidza makuva, na a vola, Mutumwa u duki kuvo, navutswa si yadzi yino kandi mba.

¹⁹ Ma ya tuma wa kaviri wokunina iparasi, wa duka kuvo, na a teva, Mwami a vola, Gyi veye mirembe? Na Jehu ya mu tivulira, U veye ndi nemirembe? Girunkana wingire inyima wange.

²⁰ Na mulindi ya twulidza makuva, na a vola, U duki kuvo, navutswa si yadzi yino kandi mba: neligendidza li veye kuli ligendidza lya Jehu mwana wa Nimshi; kigira a gendidzanga kuli mulalu.

²¹ Joram ya vola, Lomba ligari. Ni va mu lombera ligari lilye. Na Joram mwami wa Israeli na Ahazia mwami wa Yuda va twula, sa mulala mu ligari lilye, kwagana na Jehu navo va mu nyola mukidieli kyomulimi gwa Nabothu Mujezireeli.

²² Na ga duka, lwa Joram ya lola Jehu, ya mu teva, Gyi veye mirembe, Jehu? Naye ya mu tivulira, Gyi ve ye mirembe ki, inyinga ubuheyi bwa mama wowo Jezebeli nobukumu bwibwe bu veye bunyingi ndi?

²³ Na Joram ya girunkannya makono gege, ni yiruka, na a volera Ahazia Inkuva yiyi i veye kirage, O Ahazia.

²⁴ Na Jehu ya nyira ubuta bwibwe netsingulu tsitsye tsyosi, na a lasa Joram mu kivirigani; nombano gwa twulira ha mwoyo gwigwe, naye ya yenzeera mu ligari lilye.

²⁵ Hene yaho Jehu ya volera Bidikari munyampara wewe, Mu mginge, u mu te mu kidieli kyomulimi gwa Nabothu Mujezireeli; kigira widzulitse lwa kwa li mu linina tsiparasi tsyetu, inze nive, nokulonda Ahabu dada wewe, kuli Yahova ya mu vikira musigo yigu, na a vola:

²⁶ Ligali ndoli masahi ga Nabothu mgolova, na masahi gavana veve, Yahova a vola; na nda ku vanzira mu kidieli yiki, Yahova a vola. Kunangwa kalunu u mu ginge, u mu te mu kidieli zana, kuli livola lya Yahova.

²⁷ Ahazia mwami wa Yuda, lwa ya lola yaga, yirukira ku inzira yenyumba yomulimi. Jehu ya mu londerera, na a vola, Mu kuye uyu kandi mu ligari lilye; na va mu kuyira ha kyanegiru kyokutsia Guri, ki veye himbi Ibileam. Yirukira Megido, na a kudzira yo.

²⁸ Avatumekiri veve va mu gingira mu ligari, ni va tsia naye Yerusalemi, ni va mu ta mu kilindwa kikye halala navaguga veve mu lidala lya Daudi.

²⁹ Mu muhiga gwelikumi na mulala gwelyameha lya Joram mwana wa Ahabu, Ahazia ya tanga kwameha ku Yuda.

³⁰ Na lwa Jehu yadza Jezireeli, Jezebeli ya hulira; yebula kibala mmoni, nokuboha mutwe, nokuhenzera mu lidirisha.

³¹ Na lwa Jehu yingira mu kiribwa kyelidala, ya vola, Gyi veye mirembe, O Zimri, ive wiita munene wowo?

³² Naye ya ginga mmoni mwimwe na a henzera mu lidirisha, na a vola, U veye ku luvega lwange ni bwaha? Bwaha? Na vitsiri vaviri kinga vavaka va mwu mika.

³³ Jehu ya va volera, Mu mwagulule hasi. Ma va mwagulula hasi; na malala ku masahi gege ga tuma ku lidigi, na gandi ku tsiparasi; naye ya mu duvaga.

³⁴ Na lwa ya mala kwingira, ya lagira na a nwa, na a vola, Henzi, mukali uyu wa laamwa, mu mu te; kigira a veye mwana womwami.

³⁵ Na va tsia kumuta; navutswa si va mu nyola ni i ta li va nyola kihanga kikye, nevirenge, nevigalo.

³⁶ Kigira yaga va tsia kandi na va mu volera. Naye ya vola, Yili ni livola lya Yahova ya vola, nomunwa gwomutumekiri wewe Elija Mutishibi, lwa ya vola, Tsimbwa tsi la lia inyama ya Jezebeli mu kidieli kya Jezireeli;

³⁷ na mubiri mukudzu gwa Jezebeli gu la va kuli isingu mmoni mwemilimi mu kidieli kya Jezireeli, va vule kuvola, Uyu ni Jezebeli.