2 Avami 6 - KITABU KITAKATIFU

¹ Na avana vavaprofeti va volera Elisha, Henza kalunu, hango ha ku menyi hano imbiri wowo si ha duki kwinye mba.

² Ku ku goonya u ku he munwa ku tsie Yordani, ku vugule yo misala, mundu sa mulala musala, kwombakire yaho kuduke kunyola ho kumenya. Na ya va volera, Mu tsie.

³ Na mulala ya vola, Nu u yanza, mwadza, u tsie halala navatumekiri vovo. Ya tivula, Nda tsia.

⁴ Ma ya tsia halala navo. Lwa va duka ha Yordani, va tema misala.

⁵ Navutswa mulala, lwa ya li na a temanga itiru, imbadzi ya somoka ni i gwa mu madzi; ya hanzuka na a vola, Ivanii, munene wange kigira nda li ni i savi.

⁶ Na mundu wa Nyasaye ya teva, I gwiye haliha? Ya mu manya ha zana. Ya tema kisala, na a sikisa ha zana, na yeleminya kivya.

⁷ Na a mu volera, Vugula. Ma ya nyira mukono, na a ki vugula.

⁸ Kunangwa mwami wa Siria ya lwana na Israeli; na ya lomba makuva navatumekiri veve, na a vola, Hokusosa hange ha la va havuleve.

⁹ Mundu wa Nyasaye ya tuma vatumwa ku mwami wa Israeli, na a vola, U gelihe, u vule kuvita havuleve; kigira Vasiria va sulunguta ho.

¹⁰ Mwami wa Israeli ya tuma vatumwa ha zana ha mundu wa Nyasaye ya mu volera, nokumugerihidza; na yehonya ha zana, si i veye inyinga indala kinga hali kaviri.

¹¹ Na mwoyo gwomwami wa Siria gwa henda ligali kigira inkuva yiyi; ya langa vatumekiri veve, na a va teva, Si mu la manya ni u li ha ku kwinye u veye ku luvega lwomwami wa Israeli?

¹² Mulala ku vatume kiri veve ya vola, Auwa, munene wange, O mwami; navutswa ni Elisha, muprofeti u veye mu Israeli, a volera mwami wa Israeli makuva ga u volanga mu inyumba yoyo yokugona.

¹³ Ya vola, Mu tsie kumuhenza ha a veye, nduke kuhila avandu kumuvugula. Ya volerwa, kuvola, Henza, a veye Dothan.

¹⁴ Kunangwa ya hila tsiparasi, na magari, nelihe linene: na vadza ubudiku, ni va kumbiridza lidala hosi.

¹⁵ Mutumekiri womundu wa Nyasaye lwa ya vuka mugamba tsuri, na a tsia kyova, henza, li veye ho lihe halala netsiparasi na magari va kumbiridza lidala. Mutumekiri wewe ya mu volera, Ai, munene wange ku kola ndi?

¹⁶ Ya mu tivulira, U ta tia mba; kigira ava veye halala nekwinye va veye vanyingi kuvita yavo ava veye halala navo.

¹⁷ Elisha a saala, na a vola, Nku saala Yahova, u kunule tsimoni tsitsye, a lole. Yahova ya kunula tsimoni tsyomuyai; naye ya lola, kandi, henza, kigulu kizula tsiparasi na magari gomuliru ga kumbiridza Elisha tsimbega tsyosi.

¹⁸ Lwa va sulunguta kuye, Elisha ya saala Yahova, na a vola, Nku saala, u kuye avandu yava nelivakula lyetsimoni. Na ya va kuya nelivakula, kuli livola lya Elisha.

¹⁹ Elisha ya va volera, Yiyi si i veye inzira, na yili si li veye lidala: mu nonde, nda mu hila ku mundu wa mwenyanga. Na ya vimirira kutsia Samaria.

²⁰ Ga duka, lwa va mala kwingira Samaria, Elisha ya vola, O Yahova kunula tsimoni tsyavandu yava, va duke kulola. Na Yahova ya va kunula tsimoni, na va lola; na, henza va veye hagati ha Samaria.

²¹ Na mwami wa Israeli lwa ya va lola ya teva Elisha, Dada wange, mba va kuye? Mba va kuye?

²² Ya tivula, U ta va kuya mba: wenya kukuya ava wa hamba avahambe ni kivavi kikyo, nobuta bubwo? U va sundire ubukima na madzi, va duke kulagira nokunwa, na virane ku munene wavo.

²³ Ya va sundira vyokulia vinyingi: lwa va mala kulia nokunwa, ya va hila, ni va tsia ku munene wavo. Viduma vya Siria va vula kudza kandi kwingira mu kivala kya Israeli.

²⁴ Na ga duka inyima wa yaga, Ben-hadadi mwami wa Siria ya vungidza lihe lilye lyosi, na yanegira, na a kumbiridza lidala lya Samaria.

²⁵ Inzala ya li ho inene mu Samaria: na, henza, va meda lilwana, kuduka mutwe gwesukiri gwa luha gwa gu lidzwa vidonye vyefetha makumi gatano na gavaka, ne navodo ya masi lingoko gamakulu vidonye vyefetha vitano.

²⁶ Na lwa mwami wa Israeli ya vita ku lidigi lyolugaga igulu, mukali yahanzuka kuye, na a vola, O mwami wange, u nkonye.

²⁷ Naye ya vola, Yahova na a va na a vula kukukonya, inze nda ku konya na ki? Kutwula ku lodze, naho ku twula mu kyokumina iwaini?

²⁸ Na mwami ya mu teva, U veye na ki? Naye ya tivula, Mukali uyu ya mbolera, Haana mwana wowo, ku duke kumulia lero, na ku la lia mwana wange mugamba.

²⁹ Ma kwa deka mwana wange, na ku mu lia: na nda mu volera ku lidiku lya kaviri, Haana mwana wowo, ku duke kumulia; naye ya visa mwana wewe.

³⁰ Na ga duka, lwa mwami ya hulira makuva gomukali uyu, ya tandula tsingubo tsitsye (ya li na a vitanga ku lidigi lyolugaga igulu); avandu va mu lola, na henza, ya li netsingubo tsyamagunia ku mubiri gwigwe.

³¹ Hene yaho ya vola, Nyasaye ya nkolere ndiyo, nokuvita, mutwe gwa Elisha mwana wa Shafatu gu la va kuye lero.

³² Navutswa Elisha yikala mu inyumba yeye, navakulundu vikala halala naye; nomwami ya tuma mundu kutwula imbiri wewe: navutswa lwa mutumwa a kikiri kuduka kuye, ya volera vakulundu, Mu lola kuli mwana womulumindi uyu a tumi mutumwa kutwulidza mutwe gwange? Henzi, lwa mutumwa yadza, mu hane muliango, nokumwigalira nagwo ligali: muliviti gwevirenge vyomunene wewe si gu mu londa inyima?

³³ Na lwa a veye mu livolerana navo, henza, mutumwa yadza kuvo: na a vola, Ubudamano yibu nobwa Yahova; kigira ki inze ni.