2 Avami 5 - KITABU KITAKATIFU

¹ Kunangwa Naaman, munene welihe lyomwami wa Siria, ya li mundu munene imbiri womunene wewe, nokwidzominywa, kigira Yahova ya li na a mali kuha Vasiria liguuta nomukono gwa uyu: kandi ya li mundu welihe wetsingulu, navutswa ya li wobugere.

² Vasiria va li ni va twula viduma neviduma, ni va leta muhambe mukana kutwula mkivala kya Israeli; naye ya li mulindi womukali wa Naaman.

³ Ya manya na a volera munene wekikali wewe, Ngano munene wange ya li ha mproieti uyu u veye ha Samaria hene yaho ngano wa mu honnya ubugere bwibwe.

⁴ Na mulala yingira, na a volera munene wewe, na a vola, Mukana wa twula mu kivala kya Israeli a volanga ndi na ndi.

⁵ Mwami wa Siria ya vola, Tsia, na nda hila ibaruwa ku mwami wa Israeli. Ma ya tsia, na a vugula tsitalenta likumi tsyefetha, nevidonye vyethahabu tsielfu tsitano na indala netsingubo likumi.

⁶ Na ya letera mwami wa Israeli ibaruwa, na a vola, Ibaruwa yiyi lwa i duka ku ive, henza ndetanga ku ive uyu Naaman mutumekiri wange, u duke kumuhonnya ku ubugere bwibwe.

⁷ Ga duka, lwa mwami wa Israeli ya soma ibaruwa zana, hene yaho ya tandula tsingubo tsitsye, na a vola, Inze, mbeye Nyasaye, kwiita nokusimugukidza, mundu uyu a lete ku inze, mbonnye mundu ubugere bwibwe? Navutswa mu manye, mwadza, mu lole kuli uyu wenyanga lihangala ku inze.

⁸ Kunangwa, Elisha mundu wa Nyasaye, lwa ya hulira umwami wa Israeli u tanduyi tsingubo tsitsye, hene yaho ya tuma avatumwa ku mwami, na a vola, Kigira ki u tanduyi tsingubo tsitsyo? Yadze ku inze kalunu, na a la manya muprofeti a veye mu Israeli.

⁹ Ma Naaman yadza halala na tsiparasi tsitsye na magari gege, na a singira ha kiliango kyenyumba ya Elisha.

¹⁰ Na Elisha ya tuma mutumwa kuye, na a vola, Tsia uesinge mu mugera gwa Yordani hali gatano na gaviri, nenyama yomubiri gugwo i lirana ku ive kandi, na u la va munifu.

¹¹ Navutswa Naaman ya vihirirwa, na a tsia, na a vola, Henza, inze nda ganagana, ligali a ladza ku inze kyova, noku singira, nokwanira lieta lya Yahova Nyasaye wewe, nokuvitidza mukono gwigwe ha bulwaye, nokuhonnya wobugere.

¹² Migera Abana na Farpari, migera gya Danmasko, si gyi veye milahi kuvita amadzi gosi ga Israeli? Si nyala kwisinga mugyo, nokuva munifu? Ma ya girunkana na a twula nobutima.

¹³ Avatumekiri veve visunda himbi, nokuvolerana naye, ni va vola, Dada wange, mu profeti uyu ava a ku voleye, Kola kindu kinene, ngano si u koli? Na sindi lwa a ku voleye vutswa, wisinge, u ve munifu?

¹⁴ Hene yaho ya sulunguta, ni yeyina mu madzi gomugera gwa Yordani hali gatano na gaviri, kuli livola lyomundu wa Nyasaye; nenyama yeye yomubiri yirana kuli inyama yomwana mudoto, naye ya li munifu.

¹⁵ Yirana ku mundu wa Nyasaye uyu, nekiganda kikye kyosi, vadza, ni va singira imbiri wewe: na a vola, Henza kalunu, manya si ha veye na Nyasaye mu lirova lyosi, navutswa mu Israeli: kunangwa kalunu, mwadza, u vugule ubugasu ku mukono gwomutumekiri wowo.

¹⁶ Navu tswa Elisha ya vola, Kuli Yahova a veye mwoyo, wa nsingiye imbiri wewe, si nda vugula kilala ku vyosi mba. Ya mu goonya a duke kuvugula; navutswa ya sula.

¹⁷ Na Naaman ya vola, Ni ga ta li ndiyo, nku saala, va mbe inze mutumekiri wowo marova aga duka misigo gyetsinyumbu tsiviri; kigira inze mutumekiri wowo kutwula kalunu si nda haana kihaanwa kyokusambwa ku l vanyasaye vandi mba, kinga kisyu viriru, navutswa ku Yahova yeng'ine.

¹⁸ Yahova a samehe inze mutumekiri wowo ku inkuva yiyi; lwa munene wange yingiranga mu inyumba ya Rimon kusigamira mu, ni yidira ku mukono gwange, na inze ndinama mu inyumba ya Rimon lwa ndinama mu inyumba ya Rimon Yahova a samehe mutumekiri wowo mu inkuva yiyi.

¹⁹ Ya mu volera, Tsia nemirembe. Ma ya twula kuye ni yisunda ki taambuka ha duki.

²⁰ Navutswa Gehazi, mutumekiri wa Elisha mundu wa Nyasaye, ya vola, Henza, munene wange u lekeye Naaman Musiria uyu, kigira si a vuguye mu mukono gwigwe kya ya leta: kuli Yahova a veye mwoyo, nda mu londerera tsimbiru, nokuvugula kindu kuye.

²¹ Ma Gehazi ya londerera Naaman. Na Naaman lwa ya lola mulala a mu londerera tsimbiru, yika ku ligari lilye a duke kulolana naye, ya mu teva, Gyi veye mirembe?

²² Naye ya vola, Ga veye mirembe. Munene wange u ntumi kuvola, Henza, kalunu va duki ku inze kutwula mu kivala kyevigulu kya Efiraim avandu vaviri ku avana vavaprofeti; mwadza, u va he italenta indala yefetha, netsingubo tsiviri.

²³ Naaman ya vola, U leme mwoyo, vugula tsitalenta tsiviri. Naye ya mu niga, na a boha tsitalenta tsiviri tsyefetha mu tsimuya tsiviri, halala netsingubo tsiviri, na a tsidwika avatumekiri veve vaviri; navo va tsi hila imbiri wewe.

²⁴ Lwa va duka mu kigulu, ya vugula vindu zana mu makono gavo, nokuvivika mu inyumba; na a leka avandu yavo va twule, navo va tsia.

²⁵ Navutswa yingira na a singira imbiri womunene wewe. Elisha ya mu teva, U twula haliha Gehazi? Ya vola, Inze mutumekiri wowo si ntsiye ahandi mba.

²⁶ Ya mu volera, Mwoyo gwange si gwa tsia halala nive, lwa mundu uyu ya girunkana kandi kutwula ku ligari lilye kulolana nive? I veye inyinga yokuvugula ifetha, nokuvugula tsingubo, nomulimi gyemizeituni, nemi limi gyemizabibu, na magondi, ne tsing'ombe, na vatugwa vayai na vatugwa vakana?

²⁷ Kunangwa ubugere bwa Naaman bu la ku hamba ive, nekisikululwi kikyo mihiga nemihiga. Ya twula imbiri wewe na a gwiye wobugere mulavu kuli likonza.