2 Avami 2 - KITABU KITAKATIFU

¹ Na ga duka, lwa Yahova yenya kuhila Elija migulu nembuudza yekihudzudzi, hene yaho Elija ya twula Gilgali halala na Elisha.

² Elija ya volera Elisha, Wikale hano, mwadza; kigira Yahova u ntumi kuduka Beth-eli. Elisha ya vola, Kuli Yahova a veye mwoyo, na kuli ive u veye mwovo, si nda ku leka mba. Ma va sulunguta Beth-eli.

³ Na vana vavaprofeti va veye ha Betheli vadza ku Elisha, ni va mu teva, U manya Yahova a la twulidza munene wowo lero a vule kuva ku ive kandi? Naye ya vola, Yee, mmanya; mu kiring'ane.

⁴ Na Elija ya volera Elisha, Wikale hano, mwadza; kigira Yahova u ntumi Yeriko. Na ya vola, Kuli Yahova a veye mwoyo, kandi kuli ive mwene u veye mwoyo, si nda ku leka mba. Ma va duka Yeriko.

⁵ Avana vavaprofeti ava veye ha Yeriko vesunda ku Elisha, nokumuteva, Ive u manya Yahova a la twulidza munene wowo a vule kuva ku ive kandi lero? Ya va tivulira, Yee, mmanya; mu kiring'ane.

⁶ Na Elija ya mu volera, Wikale hano, mwadza; kigira Yahova u ntumi Yordani. Naye ya vola, Kuli Yahova a veye mwoyo, kandi kuli ive mwene u veye mwoyo, si nda ku leka mba. Ma va tsia vombi halala.

⁷ Navandu makumi gatano vavana vavaprofeti va tsia, nokusingira kuvahenzera ihale: navo vombi va singira himbi ku Yordani.

⁸ Na Elija ya vugula ingubo yeye yokwigulu, na a gi linga halala, nokuduya amadzi, nago gayuka kutsia yiyi neyiyi, ma vambuka vombi ku kivala kyumu.

⁹ Na ga duka, lwa va mala kwambuka, Elija ya volera Elisha, Teva ku inze kya wenyanga nku kolere, ni nkikiri kutwulidzwa ku ive. Elisha ya vola, Nku goonya, vi ve ku inze vidieli viviri vya roho gugwo.

¹⁰ Ya vola, U tevi kindu kidinyu: nu u va nu u lola inze ni mbugulwa ku ive, u la nyola; navutswa ni i va u vula kundola si u la nyola mba.

¹¹ Na ga duka, lwa va li ni va tsitsanga, nokuvolerana, henza, nonoho ligari lyomuliru lya loleka, netsiparasi tsyomuliru, tsya vavukannya uyu na uyu; na Elija yanegira kutsia migulu nembuudza yekihudzudzi.

¹² Na Elisha ya lola, na a hanzuka na a vola, Dada wange, dada wange, magari ga Israeli navokunina ku tsiparasi vovo. Na a vula kumulola kandi: na ya gumira tsingubo tsitsye mwene, nokutsitandula tsimbaala tsiviri.

¹³ Na ya dola ingubo yokwigulu ya Elija yaguluka kutwula kuye, ni yirana, na a singira ku luginga lwa Yordani.

¹⁴ Na ya gumira ingubo yokwigulu ya Elija yaguluka kutwula kuye, na ya kuyira amadzi, na a vola, Yahova Nyasaye wa Elija a veye haliha? Lwa ya mala kukuya amadzi, gayuka kutsia yiyi neyiyi; ma Elisha yambuka.

¹⁵ Avana vavaprofeti ava li Yeriko lwa va mu lola, va vola, Roho wa Elija wikaye ku Elisha. Na vadza kumwaganira, na vinama hasi imbiri wewe.

¹⁶ Na va mu volera, Henza, kalunu va veye ho halala nekwinye avatumekiri vovo, avandu avetsingulu makumi gatano; ku goonya ive, leka va tsie kwenya munene wowo, namusia Roho wa Yahova u mu gingi, nokumusikisa mu kigulu kilala, kinga mwivona lilala. Ya vola, Mu ta va tuma mba.

¹⁷ Na lwa va mu goonyerera ya luha ya va isoni, na a vola, Tumi. Ma va tuma avandu makumi gatano. Na va mwenya madiku gavaka, ni va vula kumulola.

¹⁸ Virana kuye, lwa ya lindagira ha Yeriko; na a va volera, Si nda mu volera, Mu ta tsia mba?

¹⁹ Avandu velidala yilyo va volera Elisha, Henza, ku goonya ive, lidala yili ha veye na halahi, kuli munene wange a lolanga: navutswa amadzi yaga si ga veye malahi mba, nekivala ki veye kihyahya vutswa.

²⁰ Ya vola, Ndeteri kiseve kihya, mu vike mu munyu. Va mu letera.

²¹ Na ya twula na a tsia kuduka ha kisenukiru kyamadzi, na a tsuka mu umunyu, nokuvola, Yahova a vola, Inze mali kuhonnya amadzi yaga; si li la twula mu likudza kandi, kinga lilogosa.

²² Kunangwa amadzi ga honywa kuduka lero, kuli likuva lya Elisha ya vola.

²³ Na yanegira kutwula ho kutsia Betheli; na lwa ya li na a vitanga ku inzira, vayai va twula mu lidala yilyo, ni va mu kolera kihenyehenye, ni va mu volera, Nina igulu, ive wogwavusu; nina igulu, ive wogwavusu.

²⁴ Yekevuka na a lola, na a va laama ku lieta lya Yahova. Na tsiduba tsiviri tsinkali tsya twula mu mulitu, na tsi tandula ku yavo makumi gane na vaviri avayai.

²⁵ Kutwula yaho ya tsia ku kigulu kya Karimeli, nokutwula yaho yirana Samaria.