2 Avami 19 - KITABU KITAKATIFU

¹ Na ga duka, lwa mwami Hezekia ya hulira yaga, ya tandula tsingubo tsitsye, ni yevika magunia, ni yingira mu inyumba ya Yahova.

² Na ya tuma Eliakim, wa li musingeriri wenyumba yeye, na Shebina mung'odi, navakulundu vavasalisi, ni viviki magunia, va tsie ku Isaya mprofeti, mwana wa Amozu.

³ Na va mu volera, Hezekia a volanga, Lidiku lya lero li veye lidiku lyekivi, nelyelihebwa amageli, nelyamanyego: kigira avana va duki kwivulwa, netsingulu tsyelivula si tsi veye ho mba.

⁴ Namusya Yahova Nyasaye wowo a la hulira makuva yaga gosi aga Rabishake, wa mwami wa Asuria munene wewe a tumi kulega Nyasaye u veye mwoyo, namsya Nyasaye a la gondokira amakuva aga Yahova Nyasaye wowo a huliranga: kigira yaga ginga lisaala lilyo kigira litigala lya yavo avatigala.

⁵ Ma vatumekiri vamwami Hezekia va tsia ku Isaya.

⁶ Isaya ya va volera, Mu la volera munene wenyu likuva yili, Yahova a vola, U ta tia makuva ga u huliye, aga avatumekiri vomwami wa Asuria va nyegera inze.

⁷ Henza nda vika muye roho, naye a la hulira makuva, na a lirana mu kivala kikye; na nda mu tsyoma ku kivavi mu kivala kikye.

⁸ Ma Rabishake ya tsia, na a nyola mwami wa Asuria a veye mu lilwana wa Libina; kigira ya hulira u twuli Lakishi.

⁹ Na lwa ya hulira makuva yaga, Tirihaka mwami wa Ethiopia, Henza, u twuli kulwana nive, hene yaho ya tuma avatumwa hali kaviri va tsie ku Hezekia, na a vola,

¹⁰ Mu la volera Hezekia i mwami wa Yuda, makuva yaga, mu vole, U ta leka Nyasaye wowo wa u suuviranga a ku gade, a vola, Yerusalemi si li la vikwa mu mukono gwomwami wa Asuria.

¹¹ Henza u huliye makuva gavami va Asuria va kola ku vivala vyosi, kuvidividza ligali: na ive u la hona?

¹² Avanyasaye vetsihiri va va honnya, va vaguga vange va dividza, navo ni Gozan, na Harani, na Rezefu, na avana va Eden ava li mu Telasaru?

¹³ Mwami wa Hamathu a veye haliha, nomwami wa Aripadi, nomwami welidala lya Sefarivaim, wa Hena, nowa Iva?

¹⁴ Na Hezekia ya nyola ibaruwa mmukono gwavatumwa, na a gi soma; na Hezekia yanegira nokwingira mu inyumba ya Yahova, nokuvambula ibaruwa zana imbiri wa Yahova.

¹⁵ Na Hezekia ya saala Yahova, na a vola, O Yahova, Nyasaye wa Israeli, ive wikalanga igulu wa vakerubi, ive u veye Nyasaye, ive weng'ine, wobwami bwosi bwelirova; na ive wa lomba ligulu nelirova.

¹⁶ Tegidza ugutu gugwo, O Yahova, u hulire; kunula tsimoni tsitsyo, O Yahova, u lole; u hulire makuva ga Senakeribu, aga ya mu tuma yadza nago kunyega Nyasaye u veye mwoyo.

¹⁷ Ligali, Yahova, avami va Asuria va kaminya avetsihiri nevivala vyavo,

¹⁸ na va ta avanyasaye vavo mmuliru; kigira si va veye avanyasaye, navutswa va li miyinzi gyamakono gavandu vutswa, avemisala na vamagina; kigira yaga va va dividza.

¹⁹ Kunangwa kalunu, O Yahova Nyasaye wetu, nku saala ligali, u ku honnye, mwadza, ku mukono gwa uyu, ubwami bwosi bwelirova bu duke kumanya ive u veye Yahova Nyasaye, ive weng'ine.

²⁰ Hene yaho Isaya mwana wa Amozu ya tuma mutumwa ku Hezekia, na a vola, Yahova, Nyasaye wa Israeli a vola, Kigira ive u mala kusaala inze ku Senakeribu mwami wa Asuria, mmali kukuhulira.

²¹ Likuva lya Yahova ya vola ku makuva gege ni yili: Mukana mugima wa Zioni u mali kulega ive, naye a ku sekanga u luhe u ve isoni; mukana w a Yerusalemi a ku sung'usiranga mutwe gwigwe.

²² Ni bwaha wa u legeridzi nokumunyega? Na wa ginga mwoyo gugwo nokuginga tsimoni tsitsyo ku bwaha? Ku uyu Mulala Mutakatifu wa Israeli.

²³ Wa legeridza Yahova na vatumwa vovo, nokuvola, Inze ndanegira, halala nobunyingi bwamagari gange kuduka igulu wevigulu, kuduka ku kiheri kya Lebanon; nda tema mitaragwa gyigye mitambi, nemisala milahi kali yigu; na ndingira kuduka ha bumenyo bwibwe bwembiri ligali, kuduka mmulitu gwemilimi gyigye gyamanga ligali.

²⁴ Nda yava nokunwa madzi gobugeni, nda kaminya migera gyosi gya Egepeti nevirenge vyange.

²⁵ U kikiri kuhulira kuli nda kola yaga ku matsyambiri, nokugakola mu madiku ga kale? Kalunu ndukidzi inkuva yiyi, ive u duke kuva mudividze wamadala getsingaga, ga ve vitumi vyeving'anye.

²⁶ Kigira yaga avandu yavo va li netsingulu tsinkekeke, va genya nokuva isoni; va li kuli bunyasi bwommilimi, na kuli tsingutsa tsimbisi, kuli bunyasi ku inyumba igulu, kuli obolo bwominywa ni bu kikiri kuviruka.

²⁷ Navutswa mmanya likala lilyo, nilitwula lilyo, nelingira lilyo, nobutima bubwo bwa u veye nabwo ku inze.

²⁸ Kigira ubutima bubwo bwa u veye nabwo ku inze, kandi kigira lyegingira lilyo li duka mu amatu gange, kigira yaga nda vika inzago yange mu liulu lilyo, nelijamu lyange ku minwa gyigyo, na nda kwiranyira ku inzira ya wadzira ku.

²⁹ Kandi likuva yili li la va kilolekidzu ku ive: muhiga yigu mu la lia kyemeranga kyene, nomuhiga gwa kaviri mu la lia kisibuku kyakyo; nomuhiga gwa kavaka, mu tage, mu gese, nokusimika milimi gya mazabibu, nokulia makuyu gagyo.

³⁰ Na va tigala va hona avenyumba ya Yuda, va la hila imiri hasi kandi, noku luvega lwe igulu va laama makuyu.

³¹ Kigira ava tigala va la twula Yerusalemi, na ava li hona va la twula mkigulu kya Zioni ubugulu bwa Yahova bu la kola yaga.

³² Kunangwa Yahova a vola ku mwami wa Asuria, Si a lingira mu lidala yili, kandi si a la lasa yo mbano, kandi si a lisunda ku lidala yili nengavo, kandi si a la ku kola kitumi imbiri walyo.

³³ Ku inzira ya yadzira ku, a liranira ku inzira zana, na si a lingira mu lidala yili mba, Yahova a vola.

³⁴ Kigira inze nda sola lidala yili li duke kubona, kigira inze, kandi kigira mutumekiri wange Daudi.

³⁵ Na ga duka ku budiku zana yibu, ingelosi wa Yahova ya tsia, na a kuya avandu tsielfu mia na makumi gatano na gavaka na tsitano mu hokusosa ha Vaasuria: na lwa avandu va vuka mugamba tsuri, henza, yava va li avakudzu vosi.

³⁶ Ma Senakeribu mwami wa Asuria ya twula, na a tsia ni yirana, na a menya Nineve.

³⁷ Na ga duka, lwa ya li mulisigama mu inyumba ya Nisiroku munyasaye wewe, Adarameleku na Sharezeru (avayai veve) va mu duya nekivavi: ni viruka ni va tsia mu kivala kya Ararati. Nomwana wewe Esarihadon yameha mbugono bwibwe.