2 Avami 16 - KITABU KITAKATIFU

¹ Ku muhiga gwa kola likumi na gyitano na gyiviri gwelyameha lya Peka mwana wa Remalia, Ahazu mwana wa Jotham mwami wa Yuda ya tanga kwameha.

² Ahazu ya li mundu wemihiga makumi gaviri lwa ya tanga kwameha; na yameha mihiga likumi na gyitano na mulala ha Yerusalemi: si ya kola bulungi imbiri wa Yahova Nyasaye wewe, kuli Daudi guga wewe.

³ Navutswa ya genda ku inzira yavami va Israeli, yee, ya vitidza mwana wewe hagati ho muliru, kuli livihiriridza lyavetsihiri, ava Yahova ya kunga va twule imbiri wavana va Israeli.

⁴ Na ya haana vihaanwa nokuvuyidza vimuli mu hadiguluku, noku vigulu, na isi wemisala sa mulala muvisi.

⁵ Hene yaho Rezin mwami wa Siria, na Peka mwana w a Remalia, mwami wa Israeli vanegira kutsia Yerusalemi ku bulwani: na va kumbiridza Ahazu, navutswa si va nyala kumuguuta.

⁶ Inyinga yeyo Rezin mwami wa Siria ya galukidza lidala lya Elathu ku Siria, nokukunga Avayuda vosi va twula Elathu; na Vasiria va tsia Elathu, ni va menya yo kuduka lero.

⁷ Ma Ahazu ya tuma vatumwa ku Tigilathu pileseru mwami wa Asuria, na a nu volera, Inze mbeye mutumekiri wowo nomwana wowo: wanegire u mbonnye ku mukono gwomwami w a Siria, nomukono gwomwami wa Israeli, ava singira kulwana ninze.

⁸ Na Ahazu ya vugula ifetha nethahabu ya nyoleka mu inyumba ya Yahova, nomu butugi bwenyumba yomwami, na a gi hilira mwami wa Asuria.

⁹ Na mwami wa Asuria ya mu hulira; mwami wa Asuria yanegira kulwana ha Damasko, na ya li vugula, kandi ya hila avandu ralyo avahambe, na a tsia navo Kiri, na yiita yo Rezin.

¹⁰ Na mwami Ahazu ya tsia Damasko a duke kulolana na Tigilathu pileseru mwami wa Asuria, na ya lola ubwali bwa li ha Damasko; mwami Ahazu ya hilira Urija musalisi lifwana lyobwali, nelihera lyabwo, kuli miyinzi gyosi gyabwo.

¹¹ Na Urija musalisi ya lomba bwali: kuli gosi gomwami Ahazu ya mu letera kutwula Damasko, na ndiyo Urija musalisi ya bu lomba, mwami Ahazu na kikiri kwirana kutwula Damasko.

¹² Na lwa mwami yadza kutwula Damasko, mwami ya lola ubwali: na mwami yesunda himbi ku bwali, nokuhaana kihaanwa kubwo.

¹³ Ya samba vihaanwa vivye vyokusambwa, nevihaanwa vivye vyobusie, noku tsuka vihaanwa vivye vyokunwa, na yuha amasahi gevihaanwa vivye vyemirembe, ku ubwali.

¹⁴ Na ubwali bwomugasa, bwa li imbiri wa Yahova, ya bu twulidza hambiri henyumba, kutwula hagati ho bwali bwibwe mwene nenyumba ya Yahova, na ya bu vika ha luvega lwa kasi kasini wobwali bwibwe.

¹⁵ Na mwami Ahazu ya laga Urija musalisi, na a mu volera, U la samba ku bwali bunene, kihaanwa kyokusambwa kyomugamba, nekihaanwa kyamgalova kyobusie, nekihaanwa kyokusambwa kyomwami, nekihaanwa kikye kyobusie, halala nekihaanwa kyokusambwa kyavandu vosi vomu kivala, nekihaanwa kyavo kyobusie, nevihaanwa vyavo vyevyokunwa; na masahi gosi gekihaanwa kyokusambwa, na masahi gosi gekihaanwa: navutswa ubwali bwomugasa bu la va ku inze ntevere ku.

¹⁶ Urija musalisi ya kola ndiyo, kuli gosi gomwami Ahazu ya mu laga.

¹⁷ Na mwami Ahazu ya kalaga lusigi lwo bwikaliru, na ya twulidza ludavo kubwo; nenyanza ya gikidza na a gi twulidza ku tsing'ombe tsyomugasa tsya li isi wayo, na a gi vika ku tsimbaso tsyamagina.

¹⁸ Na ha kunikwa he lisabato ha lombwa mu inyumba, na ho kwingirira ho mwami ha li kyova, ya girunkannya kuhenza ku inyumba ya Yahova, kngira rnwami wa Asuria.

¹⁹ Vikolwa vya Ahazu vya tigala vya ya kola, si vya ng'odwa mu kitabu kyetsinyinga tsyavami va Yuda?

²⁰ Na Ahazu ya gona halala navaguga veve, na a tebwa halala navaguga veve mu lidala lya Daudi: na Hezekia mwana wewe yameha mbugono bwibwe.