2 Avami 15 - KITABU KITAKATIFU

¹ Ku muhiga gwa makumi gaviri na gyitano na gyiviri, gyelyameha lya Jeroboam mwam iwa Israeli, Azaria mwana wa Amazia mwami wa Yuda ya tanga kwameha.

² Ya li mwana wemihiga likumi na gyitano na mulala lwa ya tanga kwameha; na yameha mihiga makumi gatano na gyiviri ha Yerusalemi: lieta lya mama wewe lya li Jekolia wa Yerusalemi.

³ Ya kola bulungi imbiri wa Yahova, kuli vyosi vya dada wewe Amazia ya kola.

⁴ Navutswa hadiguluku si ha twulidzwa mba: avandu va li ni va ki haananga vihaanwa nokuvuyidza vimuli hadiguluku.

⁵ Na Yahova ya kuya mwami, na a gwa mugere kuduka likudza lilye, naye ya menya mu inyumba ha luvega. Na Jotham mwana womwami ya li igulu wenyumba, na ya kalagira avandu vekivala.

⁶ Na vikolwa vya Azaria vya tigala, na vyosi vya ya kola, si vya ng'odwa mu kitabu kyetsinyinga tsyavami va Yuda?

⁷ Na Azaria ya gona halala navaguga veve; na va mu ta halala navaguga veve mu lidala lya Daudi: na Jotham mwana wewe yameha bugono bwibwe.

⁸ Ku muhiga gwa makumi gavaka na gyitano na gyivaka gyelyameha lya Azaria mwami wa Yuda, Zakaria mwana wa Jeroboam yameha ku Israeli myeli gyitano na mulala mu Samaria.

⁹ Na ya kola budamano imbiri wa Yahova, kuli vaguga veve va kola: si yavukana nobwoni bwa Jeroboam mwana wa Nebati, bwa ya gotidzira ku Israeli.

¹⁰ Na Shalum mwana wa Jabesh ya kola bwebaali kuye, na a mu kuyira imbiri wavandu, noku mwiita, na yameha mbugono bwibwe.

¹¹ Vikolwa vyosi vya Zakaria vya tigala, henzi, vya ng'odwa mu kitabu kyetsinyinga tsyavami va Israeli.

¹² Yili ni likuva lya Yahova ya volera Jehu, kuvola, Avana vovo va likala ku intebe yobwami bwa Israeli, kuduka ku likula lya kane. Na ga duka ndiyo.

¹³ Shalum mwana wa Jabesh ya tanga kwameha ku muhiga gwa makumi gavaka na gyitano na gyine gwelyameha lya Uzia mwami wa Yuda; naye yameha mweli mulala mu Samaria.

¹⁴ Menahem mwana wa Gadi yanegira kutwula Tiriza, na a duka Samaria, nokukuya Shalum mwana wa Jabesh mu Samaria, na mwiita, na yameha mbugono bwibwe.

¹⁵ Vikolwa vya Shalum vya tigala, nobwebaali bwibwe bwa yebaala, henzi, vya ng'odwa mu kitabu kyetsinyinga tsyavami va Israeli.

¹⁶ Hene yaho Menahem ya kuya Tifisa, navandu vosi ava li mulyo, netsinzako tsyalyo, kutwula Tiriza: kigira va vula kumwigulira, kigira yaga ya li kuya; na avakali vosi va li mu ava li inda, ya vatannya.

¹⁷ Ku muhiga gwa makumi gavaka na gyitano na gyine gwelyameha lya Azaria mwami wa Yuda, hene yaho Menahem mwana wa Gadi ya tanga kwameha ku Israeli, na yameha mihiga likumi ha Samaria.

¹⁸ Na ya kola budamano imbiri wa Yahova: madiku gege gosi si yavukana ku bwoni bwa Jeroboam mwana wa Nebati mba, bwa ya gotidzira ku Israeli.

¹⁹ Inyinga yeyo Puli mwami wa Asuria yadza kulwana nekivala yikyo; na Menahem ya ha Puli tsitalenta elfu tsyefetha, umukono gwigwe gu ve halala naye kumudinyeridzira ubwami mu mukono gwigwe.

²⁰ Menahem ya solola ku va Israeli ifetha zana, ku vanene vosi vobutugi, sa mulala tsishekeli makumi gatano tsyefetha, a duke kuha mwami wa Asuria. Ma mwami wa Asuria yirana, si ya menya mu kivala mba.

²¹ Vikolwa vya Menahem vya tigala, na vyosi vya ya kola, si vya ng'odwa mu kitabu kyetsinyinga tsyavami va Israeli?

²² Menahem ya gona halala navaguga veve; na Pekahia mwana wewe yameha mbugono bwibwe.

²³ Ku muhiga gwa kola makumi gatano gwelyameha lya Azaria mwami wa Yuda, Pekahia mwana wa Menahem ya tanga kwameha ku Israeli mu Samaria, na yameha mihiga gyiviri.

²⁴ Na ya kola budamano imbiri wa Yahova: si yavukana ku bwoni bwa Jeroboam mwana wa Nebati, bwa ya gotidzira ku Israeli.

²⁵ Na Peka mwana wa Remalia, munyampara wewe, ya kola bwebaali kuye, na ya mu kuyira mu Samaria, mu impinga yenyumba yomwami halala na Arigobu na Arie; navandu makumi gatano ava Gileadi va li halala naye: naye ya mwiita, na yameha mbugono bwibwe.

²⁶ Na vikolwa vya Pekahia vya tigala, na vyosi vya ya kola, henzi, vya ng'odwa mu kitabu kyetsinyinga tsyavami va Israeli.

²⁷ Ku muhiga gwa kola makumi gatano na gyiviri gwelyameha lya Azaria mwami wa Yuda, Peka mwana wa Remalia ya tanga kwameha ku Israeli mu Samaria, na yameha mihiga makumi gaviri.

²⁸ Na ya kola budamano imbiri wa Yahova: si yavukana ku bwoni bwa Jeroboam mwana wa Nebati, bwa ya gotidzira ku Igraeli.

²⁹ Mu madiku ga Peka mwami wa li Israeli, Tigilathu pileseru mwami wa Asuria yadza, na vugula lidala lya Ijon, na Abel beth maaka, na Jonoa, na Kedesh, na Hazoru, na Gileadi, na Galilaya, nekivala kyosi kya Nafitali; na ya va hila avalhambe na a tsia navo Asuria.

³⁰ Hoshea mwana wa Ela ya kola bwebaali ku Peka mwana wa Remalia, na ya mu kuya, na a mwiita, ni yameha mbugono bwibwe, mu muhiga gwa kola makumi gaviri gwelyameha lya Jotham mwana wa Uzia.

³¹ Vikolwa vya Peka vya tigala, na vyosi vya ya kola, henzi, vya ng'odwa mu kitabu kyetsinyinga tsyavami va Israeli.

³² Ku muhiga gwa kola gyiviri gwelyameha lya Peka mwana wa Remalia mwami wa Israeli, Jotham mwana wa Uzia mwami wa Yuda ya tanga kwameha.

³³ Ya li mundu wemihiga makumi gaviri na gyitano lwa ya tanga kwameha; na yameha mihiga likumi na gyitano na mulala mu Yerusalemi: na lieta lya mama wewe lya langwa Jerusha mukana wa Zadoku.

³⁴ Na ya kola bulungi imbiri wa Yahova; ya kola kuli gosi ga dada wewe Uzia ya kola.

³⁵ Navutswa hadiguluku ha vula kutwulidzwa: avandu va li ni va ki haananga vihaanwa nokuvuyidza vimuli hadiguluku. Naye yombaka kiribwa kyegulu kyenyumba ya Yahova.

³⁶ Vikolwa vya Jotham vya tigala, nivyosi vya ya kola, si vya ng'odwa mu kitabu kyetsinyinga tsyavami va Yuda?

³⁷ Mu madiku yago Yahova ya tanga kutuma Rezin mwami wa Siria, na Peka mwana wa Remalia va tsia kulwana na Yuda.

³⁸ Na Jotham ya gona halala navaguga veve, na va mu ta halala na vaguga veve mu lidala lya Daudi guga wewe: na Ahazu mwana wewe yameha mbugono bwibwe.