2 Avami 12 - KITABU KITAKATIFU

¹ Muhiga gwa gatano na gyiviri gwelyameha lya Jehu, Jehoashu ya tanga kwameha; naye yameha mihiga makimi gane mu Yerusalemi: nelieta lya mama wewe lya li Zibia wa Beer-sheba.

² Na Jehoashu ya kola bulungi imbiri wa Yahova madiku gege gosi aga Jehoiada musalisi ya mwegidza.

³ Halala na yaga hadiguluku ha vula kutwulidzwa; avandu va li ni va ki haananga vihaanwa nokuvuyidza vimuli hadiguluku.

⁴ Na Jehoashu ya volera vasalisi, Ifetha yosi yevindu vya takaswa i letwa mu inyumba ya Yahova, ku ifetha yosi i tumekirangwa, ifetha yavandu kuli sa mulala a vikirwa, nefetha yosi i letangwa mu inyumba ya Yahova nomundu mwene ku liyanza lyomwoyo gwigwe kuleta,

⁵ avasalisi va tsi vugule, sa mulala a vugule ku wakye; na va la lomba hosi henyumba ya sasuguka, hosi ha lolekanga kuva hasasuguku.

⁶ Navutswa ga duka ndiyo, mu muhiga gwa makumi gaviri na gyivaka gwelyameha lyomwami Jehoashu, avasalisi va li ni va kikiri kulomba ha sasuguka henyumba.

⁷ Hene yaho mwami Jehoashu ya langa Jehoiada musalisi navasalisi vandi, na a va teva, Kigira ki mu vula kulomba ha sasuguka henyumba? Kunangwa kalunu mu ta vugula if etha ku vakyenyu, navutswa mu tsi haane kigira ha sasuguka henyumba.

⁸ Avasalisi va bugirira va ta vugula ifetha yindi ku avandu, kandi va ta lomba ha sasuguka henyumba.

⁹ Navutswa Jehoiada musalisi ya vugula lisanduku, na ya hudula muluhu ku kikuniko kyalyo, na ya li vika himbi nobwali, ku luvega lwomukono mulungi lwa wingiranga mu inyumba ya Yahova: navasalisi va linda kiliango va vika mulyo ifetha yosi ya letwa mu inyumba ya Yahova.

¹⁰ Na ndiyo ga li, lwa va lola ifetha inyingi i veye mu lisanduku, hene yaho mung'odi womwami nomusalisi munene vanegira, ni va gi vika mu tsimuya na va validza ifetha ya nyoleka mu inyumba ya Yahova.

¹¹ Na va vika ifetha ya nyoleka mu makono gavakoli vemiyinzi, yavo ava singirira inyumba ya Yahova: navo va gi tumekira kutunga avavadzi navombaki, ava li ni va lombanga inyumba ya Yahova,

¹² na vatigiki na vavadzi vamagina, nokugula misala na magina ga vadzwa va duke kulomba ha sasuguka henyumba ya Yahova, kandi ku vyosi vya vikwa ku lilomba inyumba.

¹³ Navutswa si vya lomberwa inyumba ya Yahova vikombe vyefetha, makasi, tsindavo visiliva, kinga viju vyethahabu, kinga viju vyefetha, ku ifetha ya letwa mu inyumba ya Yahova;

¹⁴ kigira va gi haana kuha avandu ava kola miyinzi, va lomba inyumba ya Yahova nayo.

¹⁵ Halala na yaga si va validzira avandu, if etha ya va vika mmakono gavo kukolera miyinzi; kigira va tumika nobusuuvirifu.

¹⁶ Ifetha yevihaanwa vyamahyolo, nefetha yevihaanwa vyobwoni, si ya letwa mu inyumba ya Yahova mba: yivyo vya li vyavasalisi.

¹⁷ Inyinga yeyo Hazaeli mwami wa Siria yanegira, nokulwana na Gathu, nokulivugula; Hazaeli ya henzidza mmoni mwimwe kwanegira Yerusalemi.

¹⁸ Na Jehoashu mwami wa Yuda ya vugula vindu vyosi vya takaswa, vya Jehoshafatu, na Je horam na Ahazia, avaguga veve, avami va Yuda, vya va takasa, nevindu vivye mwene vya takaswa, nethahabu yosi ya nyoleka mbutugi bwenyumba ya Yahova, nomu inyumba yomwami, na ya hilira Hazaeli mwami wa Siria: na ya tsia na a leka Yerusalemi.

¹⁹ Na vikolwa vya Joashu vya tigala, nevindu vyosi vya ya kola, si vya ng'odwa mu kitabu kyetsinyinga tsyavami va Yuda?

²⁰ Navatumekiri va Joashu va vuka, ni va kola bwebaali, ni va mukuyira mu inyumba ya Milo, ku inzira i sulunguta kutsia Sila.

²¹ Kigira Jozakaru mwana wa Shimeathu, na Jehozabadu mwana wa Shomeru, avatumekiri veve, va mu kuya, na a kudza; na va mu ta halala navaguga veve mu lidala lya Daudi: na Amazia mwana wewe yameha mbugono bwibwe.