2 Avami 11 - KITABU KITAKATIFU

¹ Kunangwa Athalia mama wa Ahazia lwa ya lola mwana wewe u kudzi, ya singira ni yiita kisukululwi kyobwami kyosi.

² Navutswa Jehosheba, mukana womwami Joram, mbotso wa Ahazia, ya vugula Joashu mwana wa Ahazia, noku mwiva nokutwulidza mu avana vomwami aviitwa, uyu nomuleri wewe, na a va vika mu inyumba yokugona mu; va duke kumuvisa, Athalia a vule kumunyola; na ndiyo ya vula kwii twa;

³ na Joashu ya viswa halala naye mihiga gyitano na mulala mu inyumba ya Yahova. Na Athalia yameha ku kivala.

⁴ Mu muhiga gwe gyitano na gyiviri Jehoiada ya tumana kuleta avanene vetsimia, na aviiti, na valindi, kuvaleta kuye mu inyumba ya Yahova; na ya kola lilagana halala navo, nokuvisuhidza mu inyumba ya Yahova, na a va mannya mwana womwami.

⁵ Naye ya veganehidza, na a va volera, Mu la kola inkuva yiyi: kidieli kya kavaka ku mwinye, avingira ku lidiku lyelisabato, mu la va valindi venyumba yomwami;

⁶ nekidieli kya kavaka mu la va mu kiribwa ki langwa Suri, nekidieli kya kavaka ki la va mu kiribwa kyenyima wavalindi: na ndiyo mu linda inyumba, mu ve kyokwigalira.

⁷ Viduma vyenyu viviri, li vola li veye yavo vosi ava twula ku lidiku lyelisabato, mu la linda inyumba ya Yahova ku tsimbega tsyomwami.

⁸ Na mu la kumbiridza mwami yiyi neyiyi, sa mulala nevyuma vivye mu mukono gwigwe; na uyu wingira mu tsimbaso, yiitwe: mu ve halala nomwami lwa a twulanga, kandi lwa yingiranga.

⁹ Na vanene vavasikari mia va kola kuli gosi ga Jehoiada musalisi ya va laga; ni va vugula sa mulala avandu veve, yava avenya kwingira ku lidiku lyelisabato, halala na yavo avenya kutwula ku lidiku lyelisabato, vadza ku Jehoiada musalisi.

¹⁰ Musalisi ya ha avanene vetsimia amatimu netsingavo tsya li tsyomwami Daudi, tsya li mu inyumba ya Yahova.

¹¹ Navalindi va singira, sa mulala nevyuma vivye mmukono, ku twula ku luvega lwomukono mulungi lwenyumba kuduka ku luvega lwomukono mmosi lwenyumba, himbi ku bwali nenyumba, kukumbiridza mwami yiyi neyiyi.

¹² Hene yaho ya leta mwana womwami, nokumuvika itaji ku mutwe gwigwe, nokumuha lilolekidza; ni va mu kola mwami, ni va mbaka maguta; ni va kong'onda makono, nokuvola, Mwami a ve mwoyo.

¹³ Athalia lwa ya hulira liyoga lyavalindi nelyavandu, ya tsia kuvo mu inyumba ya Yahova:

¹⁴ ma ya henza, na, lola, mwami na a singiye ahimbi ne itiru, kuli mwima, navanene nevisiliva vya li ahimbi nomwami; navandu vosi vekivala va sangala, nokukupa visiliva. Hene yaho Athalia ya tandula tsingubo tsitsye, nokuhanzuka, na a vola, Bwebaali bwebaali

¹⁵ Na Jehoiada musalisi ya laga avanene vetsimia ava vikwa igulu ku lihe, na a va volera, Mu mu twulidze mu tsimbaso; na uyu u mu londa mu mwiite nekivavi. Kigira musalisi ya vola, A tiitwa mu inyumba ya Yahova mba.

¹⁶ Ma va mu lombera inzira; na ya tsia ku inzira y etsiparasi tsingiriranga mu inyumba yomwami: na ya itirwa ho.

¹⁷ Jehoiada ya kola lilagana hagati ha Yahova nomwami navandu, va duka kuva avandu va Yahova: kandi hagati homwami navandu.

¹⁸ Na vandu vosi vekivala va tsia ku inyumba ya Baal, na va gi sambula; nobwali bwibwe bwosi, nevifwananyi vivye va vyatanya ligali, ni viitira Matan musalisi wa Baal imbiri wo bwali. Kandi musalisi ya vika avanene ku inyumba ya Yahova.

¹⁹ Na ya vugula avanene vavasikari mia, na aviiti, navalindi, navandu vosi vekivala; na va sulungutidza mwami kutwula mu inyumba ya Yahova, ni va londa ku inzira yeki ribwa kyavalindi kuduka mu inyumba yomwami. Naye yikala ku intebe yavami.

²⁰ Ma avandu vekivala vosi va sangala, nelidala lya li nemirembe. Na viita Athalia nekivavi himbi nenyumba yomwami.

²¹ Jehoashu ya li mwana wemihiga gyitano na gyiviri lwa ya tanga kwameha.