2 Avami 10 - KITABU KITAKATIFU1 Kunangwa Ahabu ya li navana vayai makumi gatano na gaviri mu Samaria. Na Jehu ya ng'oda tsibaruwa, na ya tsi hila Samaria, tsi duke ku vamehanga va Jezireeli, avakulundu, noku avavirukidza avana va Ahabu, na a vola, 2 Ibaruwa yiyi lwa i duka ku mwinye, kigira avana vomunene wenyu va veye halala nemwinye, mu veye namagari netsiparasi halala nemwinye, kandi mu veye nelidala lyevwa amadigi getsingaga, nevyuma; 3 mu henze mulala ku avana vomunene wenyu u veye mulahi mudukanu, mu mu vike ku intebe ya dada wewe, mu lwanire inyumba yomunene wenyu. 4 Navutswa va tia ligali, nokuvola, Henzi avami yava vaviri si va singira imbiri wewe: kwinye ku la singira ndi? 5 Na uyu wa li munene ku avandu venyumba, kandi uyu wa li munene ku lidala, na vakulundu, nava virukidza va tuma avatumwa kutsia ku Jehu, ni va vola, Kwinye ku veye avatumekiri vovo, na ku la kola vyosi vya u ku laga; si ku la kola mundu kali mulala mwami: kola ga u lola kuva malahi mu tsimoni tsitsyo. 6 Hene yaho ya va ng'odera ibaruwa hali kaviri, na a vola, Mwinye ni mu va ni mu veye ku luvega lwange, ni mu va ni mu hulira mwoyo gwange, mu vugule mitwe gyavandu avana vomunene wenyu, mudze ku inze ha Jezireeli mugamba inyinga kuli yiyi. Ma avana vomwami, avandu makumi gatano na gaviri, va li halala navanene velidala, ava va virukidza. 7 Ga duka, lwa ibaruwa ya duka kuvo, va vugula avana vomwami, nokuviita, avandu makumi gatano na gaviri, na va vika mitwe gyavo mu midiema ni va gyi hila kuduka Jezireeli. 8 Mutumwa yadza, na a mu volera, na a vola, Va leti mitwe gyavana vomwami. Naye ya vola, Mu gyi vike vitumi viviri ha bwingiriru bwekiribwa ku duka mugamba. 9 Ga duka mugamba, ya twula, na a singira, na a volera avandu yavo vosi, Mwinye mu veye avobulungi: henza, nda kolera munene wange bwebaali, nokumwiita; navutswa ni bwaha wiita yavo vosi? 10 Mu manye kalunu li la vula kugwa hasi ku likuva ku gosi gelivola lya Yahova, lya Yahova ya vola ku inyumba ya Ahabu: kigira Yahova ya kola ga ya vola nomunwa gwomutumekiri wewe Elija. 11 Ma Jehu ya kuya vosi ava tigala venyumba ya Ahabu mu Jezireeli, navandu avanene vosi, navalina veve navasalisi veve, kuduka si ya leka mundu kali mulala. 12 Na ya singira na a tsia, na a duka Samaria. Na lwa ya li ku inzira ha inyumba yavayi yokukalira mu bwoya bwamagondi, 13 Jehu ya vugana navamwavo va Ahazia mwami wa Yuda, ya va teva, Mu veye vaha? Navo va tivula, Ku veye avamwavo va Ahazia: na ku sulunguta kuchelidza avana vomwami navana vomukali vomwami. 14 Na ya vola, Mu va gumire ni va veye mwoyo. Va va gumira ni va veye mwoyo, nokuviitira ha bogo bwenyumba yokukalira mu bwoyo bwamagondi, avandu makumi gane na vaviri; si ya leka kali mulala wavo. 15 Na lwa ya twula ho, ya vugana na Jehonadabu mwana wa Rekabu, naye ya li ni yadzanga kumwaganira; naye ya li ni yadzanga kumwaganira; ya mu chelidza, nokumuteva, Mwoyo gugwo gu veye mulungi, kuli mwoyo gwange gu veye halala nomwoyo gugwo? Jehonadabu ya tivula, Yee, gu veye mulungi. Jehu ya vola, Ni i va ni i veye Yee, mbe mukono gugwo. Ya mu ha mukono gwigwe; na ya mikalidza halala naye mu ligari lilye. 16 Ya mu volera, Hamba halala ninze, u lole liguluha lyange lya mbeye nalyo kigira Yahova. Ma va mu ha kunina mu ligari lilye 17 Naye lwa va duka Samaria, ya kuya avandu vosi ava tigala ku Ahabu mu Samaria, kuduka ya mala kumudividza, kuli livola lya Yahova, ya volera Elija. 18 Jehu va vungidza avandu vosi halala, na a va volera, Ahabu ya tumekira Baal hakekeke; navutswa Jehu a la mu tumekira ligali 19 Kunangwa kalunu va lange vadze ku inze avaprofeti va Baal vosi, na vosi ava mu sigamiranga, navasalisi veve vosi; mu ta leka mulala a vule kuva yo: kigira mbeye nekihaanwa kinene kukolera Baal; u vula kuva yo si a la hona mba. Navutswa Jehu ya kola nobugeeri bwobugadi, a duke kwiita ava sigamiranga Baal. 20 Jehu ya vola, Mu takase livugana lya Baal. Na va landidza. 21 Na Jehu ya tuma vatumlva hosi mu Israeli: na vosi ava sigamira Baal vadza, na si ha tigala nomundu mulala wa vula kuudza. Navo vingira mu inyumba ya Baal; nenyumba ya Baal yizula avandu, kutwula ku luvega yilu kuduka ku luvega yilu. 22 Na ya volera uyu w a linda inyumba yetsingubo, leta tsingubo va duke kwivika yavo vosi ava sigamiranga Baal. Naye ya va letera tsingubo. 23 Na Jehu ya tsia, na Jehonadabu mwana wa Rekabu, vingira mu inyumba ya Baal; naye ya volera yavo ava siga miranga Baal, Mwenye, mu lole a ta va hano halala nemwmye mutumekiri wa Yahova, navutswa ava sigamira nga Baal veng'ine. 24 Navo vingira va duke kulomba kihaanwa nokuhaana visyuviriru vyokusambwa. Na Jehu ya li na a mali kuvika avandu makumi gatano na gavaka kyova, nokuvavolera, ni i va umundu ku vosi wa mbika mu makono genyu, na a hona, uyu u mu leka a hone, mwoyo gwigwe gu la va mbugono bwomwoyo gwa uyu. 25 Na ga duka, lwa ya mala kuhaana visyuviriru vyokusambwa, hene yaho Jehu ya volera valindi navasikari, Mwingiri, mu viite; mu ta leka mundu kali mulala a twule. Ma va va kuya nobwogi bwekivavi; navalindi navasikari va va ta kyova, na va tsia ku lidala lyenyumba ya Baal. 26 Na va twulidza vifwana nyi vya li mu inyumba ya Baal, nokuvisamba. 27 Navo vatannya vi fwananyi vya Baal, nokusambula inyumba ya Baal, nokugikola isiina, kuduka lero. 28 Na ndiyo Jehu ya twulidza ligali Baal mu Israeli. 29 Halala na yaga Jehu si ya leka kulonda ubwoni bwa Jeroboam mwana wa Nebati, bwa ya gotidzira ku Israeli, nabwo bu veye, vifwananyi vyethahabu vyevimoli vya li mu Beth-eli, nomu Dan. 30 Yahova ya volera Jehu, Kigira wa kola bulahi kudukidza a ga li malahi imbiri wetsimoni tsyange, na wa kolera inyumba ya Ahabu kuli gosi aga li mu mwoyo gwange, avana vovo kuduka ku kisukululwi kya kane va likala ku intebe yobwami bwa Israeli. 31 Navutswa Jehu si yelinda kuduka kugenda mu lilaga lya Yahova, Nyasaye wa Israeli, nomwoyo gwigwe gwosi mba: si yavukana ku bwoni bwa Jeroboam, bwa ya gotidzera ku Israeli. 32 Madiku yago Yahova ya tanga kugehidza Israeli: na Hazaeli ya va kuya mu tsinzako tsyosi tsya Israeli; 33 kutwula Yordani ku luvega lwe vugwe kivala kyosi kya Gileadi, ne kya va Gadi, ne kya va Rubeni, ne kya Manase, kutwula Aroeri, li veye himbi nelivona lya Arnon, nalyo ni Gileadi na Bashan. 34 Vikolwa vindi vya Jehu vya tigala, nevindu vyosi vya ya kola, netsingulu tsitsye, si vya ng'odwa mu kitabu kyetsinyinga tsyavami va Israeli? 35 Na Jehu ya gona halala navaguga veve; na va mu ta mu Samaria. Na Jehoahazu mwana wewe yameha mbugono bwibwe. 36 Inyinga ya Jehu yameha ku Israeli mu Samaria ya li mihiga makumi gaviri na gyitano na gyivaka. |
©Bible Society of Kenya, 1967
Bible Society of Kenya