1 Yohana 4 - KITABU KITAKATIFU

¹ Avayanze, mu ta suuvira roho gyosi, navutswa mu geridze roho, ni gyi va ni gyi twula ku Nyasaye; kigira avaprofeti avobubehi avanyingi va twuli kutsia mu kivala.

² Mu manya Roho wa Nyasaye ku yaga; ku gyosi roho gweyama Yesu Kristo u mali kuudza mu mubiri gu twula ku Nyasaye:

³ kandi ku gyosi roho gu vula kweyama Yesu si gu twula ku Nyasaye: yigwo ni roho gwomuhangalidzi-kristo gwa mwa hulira guudza; kali kalunu gu veye mu kivala.

⁴ Mwinye mu veye ava twula ku Nyasaye, avana vakekeke vange, kandi mwa va guuta: kigira u veye mu mwinye, a veye munene kuvita u veye mu avomkivala.

⁵ Yava va veye ku avomkivala: kigira yaga va vola agekivala, kandi avomkivala va va hulira.

⁶ Kwinye ku veye ava twula ku Nyasaye: u manya Nyasaye a ku hulira; u ta twula ku Nyasaye, si a ku hulira. Ku yaga ku manya Roho weligali na roho gwokugada.

⁷ Avayanze, ku yanzane: kigira ubuyanzi bu veye bwa Nyasaye; ku vosi u yanzanga yivulwa kutwula ku Nyasaye, kandi a manya Nyasaye.

⁸ U ta yanza si a manya Nyasaye, kigira Nyasaye a veye ubuyanzi.

⁹ Ku yaga ubuyanzi bwa Nyasaye bwa loleka ku kwinye, kigira Nyasaye ya tuma Mwana wewe muderwa mu lirova, kwinye ku duke kuva mwoyo muye.

¹⁰ Ubuyanzi bu veye ku yaga, kigira si kwa li kwinye kwa yanza Nyasaye, navutswa niye wa ku yanza, na a tuma Mwana wewe kuva kyokwisayasayira ku bwoni bwetu.

¹¹ Avayanze, Nyasaye na a va na a ku yanza ndiyo, nu bulahi kwinye ku yanzane.

¹² Si ha li nomundu wa lola Nyasaye tsinyinga tsyosi: kwinye ni ku yanzana, Nyasaye a menya mu kwinye, nobuyanzi bwibwe bu dukidzeywi mu kwinye.

¹³ Ku yaga ku manya ku menya muye, naye mu kwinye, kigira u mali kukuha ku Roho wewe.

¹⁴ Na kwinye kwa lola kandi ku lolekidza, Dada ya tuma Mwana wewe a ve Muhonnyi wavomkivala.

¹⁵ Ku vosi u lyeyama Yesu no Mwana wa Nyasaye, Nyasaye a menya muye, naye mu Nyasaye.

¹⁶ Kandi kwinye ku manya, kandi ku suuvira ubuyanzi bwa Nyasaye a veye nabwo ku kwinye. Nyasaye a veye ubuyanzi: u menya mu buyanzi a menya mu Nyasaye, kandi Nyasaye a menya muye.

¹⁷ Ku yaga ubuyanzi bu dukidzeywi ku kwinye, ku duke kunyola ubuluviriri mu lidiku lyokukalaga; kigira kuli a veye, kandi kwinye ku veye ndiyo mu lirova yili.

¹⁸ Si ha li nobutii mu buyanzi; navutswa ubuyanzi bu dukidzeywi bu tedza ubutii kyova, kigira ubutii bu veye nobusaliridzi; u tidzanga si a dukidzwa mu buyanzi.

¹⁹ Kwinye ku yanza kigira ya tanga kukuyanza.

²⁰ Mundu na a vola, Nyanza Nyasaye, kandi a dunyira amitu wewe, nomubehi: kigira a vula kuyanza amwavo wewe wa ya lola, a nyala ndi kuyanza Nyasaye wa a ta loia?

²¹ Kandi kwinye ku veye nelilaga yili li twula kuye, u yanza Nyasaye a yanze kandi amitu wewe.