1 Yohana 3 - KITABU KITAKATIFU

¹ Henza ubuyanzi lugano ki bwa Dada ya kuha, ku langwe avana va Nyasaye; kandi ku veye ndiyo. Kigira yaga avomkivala si va ku manya, kigira si va mu manya.

² Avayanze, kalunu ku veye avana va Nyasaye, kandi ki kikiri kulolekidzwa kya ku la va, navutswa ku manya, lwa a li lolekidzwa ku la fwanana naye; kigira ku la mu lola kuli a veye.

³ Ku vosi mundu a veye nelisuuvira yili kuye, yetakasa mwene kuli Yesu a veye Mutakatifu.

⁴ Ku vosi u kola ubwoni a kola kirage; kandi ubwoni bu veye kirage.

⁵ Kandi mu manya ya lolekidzwa kutwulidza ubwoni bwetu; kandi ubwoni si bu veye muye.

⁶ Ku vosi u menya muye si a kola ubwoni mba: ku vosi u kolanga ubwoni si ya mu lola, kandi si ya mu manya.

⁷ Avana vakekeke vange, mu ta leka mundu kali mulala a mu gotidze: uyu u kola ubulungi a veye mulungi, kuli mwene a veye mulungi:

⁸ u kola ubwoni a twula ku Setani, kigira Setani a kola ubwoni kutwula mu litanga. Mwana wa Nyasaye ya lolekidzwa kigira yago, kwononnya miyinzi gya Setani.

⁹ Ku vosi wivulwa kutwula ku Nyasaye si a kola ubwoni, kigira bugutsa bwibwe bu menya muye: kandi si a nyala kukola ubwoni, kigira yivulwa kutwula ku Nyasaye.

¹⁰ Ku yaga avana va Nyasaye va loleka, na vana va Setani: ku vosi u ta kola ubulungi si a veye ku Nyasaye, kandi u vula kuyanza amwavo wewe.

¹¹ Kigira yaga namakuva aga mwa hulira kutwula mu litanga, kwinye nu bulahi ku yanzane:

¹² ku ta va kuli Kaini ya li womudamano, ni yiita amwavo wewe. Kandi ya mwiita kigira ki? Kigira vikolwa vivye vya li vidamano, nevyamwavo wewe vya li vilungi.

¹³ Mu ta genya, avamitu, avomkivala ni va mu dunyira.

¹⁴ Ku manya kwinye ku mali kutwula mu likudza kwingira mu livamwoyo, kigira ku yanza avamitu. U ta yanza a menya mu likudza.

¹⁵ Ku vosi u dunyira amwavo wewe nu mulumindi: kandi mwinye mu manya mulumindi kali mulala si a veye nelivamwoyo li ta hera li menya muye.

¹⁶ Ku manya ndiyo ubuyanzi, kigira ya haana livamwoyo lilye kigira kwinye: nu bulahi kwinye ku haane livamwoyo lyetu kigira avamitu.

¹⁷ Navutswa u veye nobutugi bwomkivala, kandi a lola amwavo wewe a daka, na a vula kumbererera, ubuyanzi bwa Nyasaye bu menya muye ndi?

¹⁸ Avana vakekeke, ku ta yanza mu likuva, kinga nolulimi; navutswa mu likola nomu ageligali.

¹⁹ Na ndiyo ku la manya kwinye ku veye ku ageligali, kandi ku la luviridza mwoyo gwetu imbiri wewe:

²⁰ kigira mwoyo g vetu ni gu lola kindu ku kwinye, Nyasaye a veye munene kuvita mwoyo gwetu, kandi a manya vindu vyosi.

²¹ Avayanze, mwoyo gwetu ni gu vula kulola kindu ku kwinye, ku veye nobuluviriri imbiri wa Nyasaye;

²² ku vyosi vya ku saala ku vugula kuye, kigira ku gumira amalago gege, kandi ku kola vindu vi yanzeka imbiri wewe.

²³ Yili ni lilaga lilye, ku suuvire lieta lyo Mwana wewe Yesu Kristo, kandi ku yanzane kwinye avene, kuli ya ku ha munwa.

²⁴ Kandi u gumira amalago gege a menyanga muye, naye muye. Ku yaga ku manya u menyanga mu kwinye, ku Roho wa ya ku ha.