1 Yohana 2 - KITABU KITAKATIFU

¹ Avana vange, mmu ng'odira yaga mu ta kole ubwoni. Kandi kuvo vosi mundu kali mulala na a kola ubwoni, ku veye nomusaaviri ku Dada, Yesu Kristo Mulungi:

² a veve kyowisayasayira ku bwoni bwetu; kandi si a veye ku bwoni bwetu bweng'ine, navutswa kandi ku bwoni bwavomkivala vosi.

³ Ku yaga ku manya, ku mu manya, ni ku gumira amalago gege.

⁴ U volanga, mmu manya, na a vula kugumira amalago gege, a veye mubehi, nageligali si ga veye muye;

⁵ ku vosi u gumira likuva lilye ubuyanzi bwa Nyasaye bu dukidzeywi muye ligali. Ku yaga ku manya ku veye muye.

⁶ U vola a menya muye nu bulahi a gende mwene kuli naye ya genda mwene.

⁷ Avayanze, si mmu ng'odera lilaga lihya, navutswa lilaga lya kale lya mwa hulira kutwula mu litanga: lilaga lya kale ni likuva lya mwa hulira.

⁸ Kandi lilaga lihya mmu ng'odera, lya li lyeligali muye nomu mwinye; kigira kisundi ki vita nobulavu bweligali bu mali kwaaka.

⁹ U volanga a veye mu bulavu kandi a dunyira amwavo wewe, a veye mu kisundi kali kalunu.

¹⁰ U yanza amwavo wewe a menya mu bulavu, kandi si ha li nobwiyangu bwokwikigitala muye.

¹¹ Navutswa u dunyira amwavo wewe a veye mu kisundi, kandi a genda mu kisundi, kandi si a manya wa a tsitsa, kigira kisundi kya vakulidza tsimoni tsitsye.

¹² Mmu ng'odera mwinye, avana vange, kigira ubwoni bwenyu bu sameheywi kigira lieta lilye.

¹³ Mmu ng'odera mwinye vadada, kigira mwa manya uyu a veyo kutwula mu litanga. Mmu ng'odera mwinye avasoleli, kigira mwa guuta mudamano. Nda mu ng'odera mwinye avana, kigira mwa manya Dada.

¹⁴ Nda mu ng'odera mwinye vadada, kigira mu manya uyu a veyo kutwula mu litanga. Nda mu ng'odera mwinye, avasoleli kigira mu veye netsingulu, kandi likuva lya Nyasaye li menya mu mwinye, kandi mwa guuta mudamano.

¹⁵ Mu ta yanza kivala, kinga vindu vyomkivala. Mundu na a va na a yanza kivala, ubuyanzi bwa Dada si bu veye muye.

¹⁶ Kigira vyosi vi veye mu kivala, likayirwa lyomubiri, nelikayirwa lyetsimoni, noluyai lwomwoyo, si li veye lya Dada, navutswa lyomkivala.

¹⁷ Kandi vyomkivala vi vita halala nelikayirwa lyavyo: navutswa u kolanga ubulaliri bwa Nyasaye a hindira mihiga nemihiga.

¹⁸ Avana vakekeke, ni inyinga yekiheri: kandi kuli mwa hulira umhangalidzi-kristo udza, kali kalunu avahangalidzi kristo vanyingi va twuli; ku yaga ku manya ni inyinga yekiheri.

¹⁹ Va twula ku kwinye, navutswa si va li ku kwinye; kigira ni va veye ku kwinye, nkano va menya nekwinye: navutswa va twula ku kwinye va lolekidzwe vosi si va li ku kwinye.

²⁰ Navutswa mwinye mu veye nelivakwa li twula ku Mutakatifu, kandi mu manya gosi.

²¹ Si nda mu ng'odera kigira mu vula kumanya ageligali navutswa kigira mu ga manya, kandi kigira si ha li nobubehi kali bulala bu twula ku ageligali.

²² Ibwaha a veye umubehi navutswa uyu wambakana Yesu kuva Kristo? Uyu nomuhangalidzi-kristo, uyu wambakana Dada no Mwana.

²³ Ku vosi wambakana Mwana, uyu si a veye na Dada: uyu weyama Mwana a veye na Dada kandi.

²⁴ Mwinye aga mwa hulira kutwula mu litanga, mu ga leke ga menye mu mwinye. Aga mwa hulira kutwula mu litanga, ni ga menya mu mwinye, mu la menya mu Mwana, nomu Dada.

²⁵ Lisuuvira lya ya ku suuviridza ni yili, liva mwoyo li ta hera mba.

²⁶ Vindu yivi nda mu ng'odera ku yavo avenya kumugada.

²⁷ Navutswa mwinye, livaka lya mwa nyola kuye li menya mu mwinye, kandi si mwenya mundu kali mulala kumwegidza; navutswa kuli livaka lilye li mwegidza ku vindu vyosi, kandi li veye lyeligali, kandi si li veye lyobubehi, kandi kuli wa lya mwegidza mu menya muye.

²⁸ Kandi kalunu, avana vakekeke vange, menyi muye; kandi na a va na a lolekidzwa ku ve nobuluviriri, kandi ku ta va netsitsoni imbiri wewe ku liduka lilye.

²⁹ Ni mu manya a veye mulungi, mu manya kandi ku vosi u kolanga ubulungi yivulwa kutwula kuye.