1 Vakorintho 8 - KITABU KITAKATIFU

¹ Kalunu kigira vindu vi salisirangwa misambwa: Ku manya kwosi ku veye nelimanya. Limanya li kola uluyai, navutswa ubuyanzi bwombakanga.

² Mundu na a va na a ganagana a manya kindu, a kikiri kumanya kindu kuli ga mu dukira a manye;

³ navutswa ku vosi mundu na a yanza Nyasaye, uyu a manyekana imbiri wewe.

⁴ Kunangwa amakuva yaga agokulia vindu vi salisirangwa misambwa, ku manya si ha veye nekifwananyi ki veye kindu mu lirova, kandi ku manya si ha veye na Nyasaye wundi, navutswa mulala yeng'ine.

⁵ Kigira ni va va ni va veye ho avalangangwa avanyasaye, ni va veye mu ligulu naho mu lirova; kuli va veye ho vanyasaye vanyingi, navami vanyingi;

⁶ navutswa ku kwinye a veye ho Nyasaye mulala, Dada, wevindu vyosi vi twula kuye, kandi kwinye ku veye aveve; kandi Mwami a veye mulala yeng'ine, Yesu Kristo, wevindu vyosi vi twula kuye, halala nekuinye.

⁷ Navutswa limanya yili si li veye ku vandu vosi; navutswa avalala ava nala misambwa kuduka kalunu, va litsanga kuli kindu kya salisirua misambwa; myoyo gyavo kigira gya li midedekere, gyoneki.

⁸ Navutswa vyokulia si vi nyala kukuhila imbiri wa Nyasaye: ni ku va ni ku ta lia si ku geha; kandi ni ku va ni ku lia si ku medeka.

⁹ Navutswa mu henze, tsingulu tsyenyu tsi ta gwa likigitala ku vadedekere.

¹⁰ Kigira mundu na a lola ive u veye nelimanya, ni wikaye ku vyokulia mu litempeli lyemisambwa, na a veye mudedekere mu mwoyo gwigwe si gu la nyola tsingulu, a luhe a lie vindu vi salisirangwa misambwa?

¹¹ Kigira uyu u veye mudedekere a divanga kigira limanya lilyo, naye a veye amitu wa Kristo ya kudzira.

¹² Lwa mu koleranga ndi avamitu ubwoni nokuvalasa mu myoyo gyavo gyi veye midedekere, mu kolera Kristo ubwoni.

¹³ Kigira yaga, vyokulia ni vi va ni vikigitalidza amitu wange, si ndia inyama mihiga nemihiga, mbule kwikigitalidza amitu wange.