1 Vakorintho 5 - KITABU KITAKATIFU

¹ Ligali ga mali kulanda ha veye nobuheyi mu mwinye, ubuheyi kuli bu ta li mu Tsihiri, mulala ku mwinye a veye nomukali wa ise.

² Mwinye mwigingira, kandi si mwa verera, uyu wa kola inkuva yiyi a twulidzwe mu mwinye.

³ Kigira inze ligali, ni mba ni nta veye ho ku mubiri, navutswa ku roho gwange mbeye ho, mmali kukalagira uyu wa kola inkuva yiyi, kuli nda li ho,

⁴ mu lieta lyo Mwami wetu Yesu, mwinye ni mu va ni mu mali kuvu gana, na roho gwange, halala netsingulu tsyo Mwami wetu Yesu,

⁵ mu he Setani mundu uyu, liva lyomubiri liitwe, roho gu honnywe mu lidiku lyo Mwami Yesu.

⁶ Liidzominya lyenyu si li veye lilahi. Si mu manya mamera makekeke ga kolanga lihumbe lyosi li ve namamera?

⁷ Mu twulidze mamera ga kale, mu duke kuva lihumbe lihya, kuli ava vula kuvikwa mamera. Kigira lipasaka lyetu li mali kwiitwa, nalyo ni Kristo:

⁸ kunangwa ku lombe lilia, li ta va namamera ga kale, kinga namamera gembodoka nobu damano, navutswa nobukima obwere nobweligali bu ta li namamera.

⁹ Mmali kung'odera mwinye mu ibaruwa yange mu ta hambana navaheyi;

¹⁰ Si mboye ku vaheyi avomulirova yili ligali mba, kinga ava kayirwa ubudamano, navanuuli, kinga ava londa misambwa; ki gira ni ga ve ndiyo nkano nu bulahi mu twule mu lirova:

¹¹ navutswa kalunu mmu ng'odeye mu ta hambana nomundu u langwa amwavo, na a veye muheyi, kinga u kayirwa ubu damano, kinga u londa misambwa, kinga munyegi, kinga muhambiki, kinga munuuli; mundu u veye ndi mu ta hambana naye mba, auwa, kali kulia naye.

¹² Kigira mbeye naki kukalagira ava veye kyova? Mwinye si mu kalagira ava veye ku mwinye?

¹³ Navutswa ava veye kyova, Nya saye a va kalagira. Mu twulidze mundu mudamano a twule ku mwinye.