1 Vakorintho 4 - KITABU KITAKATIFU

¹ Mundu a vole ku kwinye ku veye avatumwa va Kristo, kandi avalindi vagaviswa ga Nyasaye.

² Hano kandi genyangwa avalindi va lolwe kuva avasuuvirifu.

³ Navutswa ku inze ki veye kindu kikekeke ligali mwinye mu nzidere, kinga mundu; yee, si nzidere inze mwene.

⁴ Kigira si mmanya kindu ki veye ku inze navutswa ku yaga si mbolwa kuvz mulungi: navutswa u nzidere a veye Mwami.

⁵ Kunangwa mu ta kalaga likuva inyinga i kikiri kuduka, Mwami a luhe a duke, u li lang'aminya vindu vya viswa vyekisundi kandi a la lang'aminya lisaavira lyomu myoyo; kunangwa mundu sa mulala a la va nelidzominya lilye li twula ku Nyasaye.

⁶ Vindu yivi, avamitu, mmali kuvigirunkannya vi gwe lugano lwange nolwa Apolo kigira mwinye; mu duke kwega ku kwinye mu ta sira aga ng'odwa; ga ta va mundu mulala ku mwinye yigingira ku mulala kuvita wundi.

⁷ Kigira nibwaha wavukannya ive? Kandi u veye na kindu ki kya wa vula kuhebwa? Navutswa ive nu u va ni wa hebwa wiidzominyira ki kuli wa vula kuhebwa?

⁸ Mu mali kwiguta. Mu mali kugwa avatugi. Mu duki kwameha bugira kwinye. Yee, nkano mwamehi, kwinye ku duke kwameha halala nemwinye.

⁹ Kigira ng'anagana Nyasaye u ku lang'aminyi kwinye avatumwa inyima wa vosi, kuli avandu va kalagirwa viitwe: kigira ku koleywi kyokugennya ku lirova, ku tsingelosi, noku vandu.

¹⁰ Kwinye ku veye avasiru kigira Kristo, navutswa mwinye mu veye avageeri mu Kristo; kwinye ku veye avadedekere, navutswa mwinye mu veye netsingulu; mwinye mu veye nelidzominywa, navutswa kwinye ku veye nelilegwa.

¹¹ Kali kuduka inyinga yiyi ku veye nenzala, nobuluhu, kandi ku veye kyahonyo, kandi ku kuyangwa tsinzasaya, kandi si ku veye na hokumenya;

¹² kandi ku nyankana, ku kolanga miyinzi namakono getu avene. Kwinye ni ku nyegwa ku gasidzanga; ni ku dambidzwa kwikudziranga;

¹³ ni ku hudziridzwa ku goonyanga: ku koleywi kuli ubudamano bwelirova, amandu gevindu vyosi kuduka kalunu.

¹⁴ Si ng'odi vindu yivi kumulegannya, navutswa kumweganehidza kuli avana avayanze vange.

¹⁵ Kigira kali ni mu veye navegidzi tsielfu likumi mu Kristo, navutswa si mu veye navadada avanyingi; kigira mu Kristo Yesu inze nda mwivula ku ivangeli.

¹⁶ Kigira yaga ngoonya mwinye, mwege ku inze.

¹⁷ Kigira yaga, mmali kutuma Timoteo ku mwinye, u veye mwana wange, mu yanze nomusuuvirifu mu Mwami, u li mwidzulitsa miima gyange gyi veye mu Kristo, kuli nzegidzanga hosi mu mavugano gosi.

¹⁸ Kalunu valala vigingiranga kuli inze si nzidza ku mwinye.

¹⁹ Navutswa ndadza ku mwinye bwangu, Mwami na a yanza; kandi si nda manya likuva lyavigingiri navutswa nda manya tsingulu tsyavo.

²⁰ Kigira ubwami bwa Nyasaye si bwa li mu likuva navutswa mu tsingulu.

²¹ Mwenya ki? Nzidze ku mwinye nempimbo, naho nzidze mu buyanzi, nomu roho gwobuhooma?