1 Timoteo 3 - KITABU KITAKATIFU

¹ Livola li veye lyobusuuvirifu, Mundu ku vosi ni yenya miyinzi gyomuhenzi, yenya miyinzi milahi.

² Kunangwa ga dukira muhenzi a vule kuva nekindu kuye, a ve musatsa womukali mulala, u ta li mubitiriru, mwelindi, mulohidzi, mwingiridzi wavageni, wetsingulu tsyokwegidza;

³ a ta va muhambiki, a ta va wekizalo; navutswa a ve muhooma, a ta va mutindi, u ta yanza ifetha;

⁴ a ve u singirira bulahi inyumba yeye mwene, a ve wegehidzira avana veve bulahi;

⁵ (navutswa mundu na a ta manya kusingirira inyumba yeye mwene, a linda ndi livugana lya Nyasaye?)

⁶ A ta va muhya mu lisuuvira gase a la gwa mwigingiri ma a gwe mu lika lagirwa lya Setani.

⁷ Kuvita yaga za mu dukira ava veye kyova va mu lolekidze kuva mulahi; gase a la gwa mu budamano nomu mutego gwa Setani.

⁸ Kandi ndiyo avatumiki velivugana ga va dukira kuva nobugoosi, va vule kuva netsinimi tsiviri, kandi va vule kunwa iwaini inyingi, kandi va vule kukayirwa vyambeti vi ta dukani navo;

⁹ va ve ava gumira ga viswa gelisuuvira mu mwoyo mulahi.

¹⁰ Kandi yava va tange ku geridzwa, inyima va tumike niva si va li nekindu kuvo.

¹¹ Kandi avakali ndiyo va ve nobugoosi, va ta va avagini, va ta li avavitiriru, kandi avasuuvirifu mu vindu vyosi.

¹² Avatumiki velivugana va ve sa mulala musatsa womukali mulala, nokusingirira avana vavo netsinyumba tsyavo bulahi.

¹³ Kigira yava ava li ni va tumika bulahi venyolera ubugali bulahi, nobuluviriri bunyingi mu lisuuvira li veye mu Kristo Yesu.

¹⁴ Nku ng'odera vindu yivi, nsuuvira ndadza ku ive bwangu;

¹⁵ navutswa ni mba nindagira, u duke kumanya kuli ga dukira avandu kwivika mu inyumba ya Nyasaye, nayo ni livugana lya Nyasaye welivamwoyo, itiru nomuse gwageligali.

¹⁶ Kandi ni likuva li ta li nelihayahayidzwa, liviswa lyelihulira Nyasaye li veye linene; Uyu ya lang'aminywa mmubiri, Nokuvolwa kuva mulungi mu roho, Nokuloleka ku tsingelosi Nokwilwadzwa mu Tsihiri Nokusuuvirwa mu lirova, Nokuvugulwa migulu mu bukumi.