1 Samweli 8 - KITABU KITAKATIFU

¹ Kandi ga duka, lwa Samweli ya sakula, ya kola avana veve avakalagi ku Israeli.

² Lieta lya wa tanga kwivulwa lya langwa Joeli; na lieta lyomuke lya langwa Abija: va li avakalagi mu Beer-sheba.

³ Navana veve va vula kugenda mu tsinzira tsitsye, navutswa va tsia haluvega kulonda ubutugi, na va vugula vikukula, nokukyaminya likalaga.

⁴ Hene yaho avakulundu vosi va Israeli va vugana halala avene, na va tsia ku Samweli kuduka Rama;

⁵ na va mu volera, Henza, ive u veye musakulu, navana vovo si va gendanga mu tsinzira tsitsyo mba; kunangwa kalunu u ku singeridzire mwami kukukalagira kuli tsihiri tsyosi.

⁶ Navutswa likuva yili lya vihiridza Samweli, lwa va vola, U ku he mwami a ku kalagire. Na Samweli ya saala Yahova.

⁷ Na Yahova ya volera Samweli, U hulire mwoyo gwavandu yava mu gosi ga va ku volera; kigira si ga veye vambakananga ive mba, navutswa vambakananga inze, mbule kuva mwami kuvo.

⁸ Kuli ku miyinzi gyosi gya va kola kutwula ku lidiku lya nda va twulidza mu kivala kya Egepeti kuduka lidiku lya lero, kigira va leka inze, nokutumekira avanyasaye vandi, ni ndiyo va koleranga ive kandi.

⁹ Kunangwa kalunu u hulire mwoyo gwavo: navutswa u la va volera amakuva maliduhu, nokuvamannya lugano lwomwami wenya kwameha kuvo.

¹⁰ Na Samweli ya volera avandu venyanga kuye mwami amakuva gosi ga Yahova.

¹¹ Naye ya vola, Mwami wenya kwameha ku mwinye a la va ulugano yilu: uyu a la vugula avayai venyu, nokuvavika kuye, mu magari gege, va la va avanina tsiparasi tsitsye; na va la nyagula imbiri wa magari gege;

¹² na a la va vika kuye kuva vanyampara ku tsielfu, navanyampara ku makumi gatano; navandi a la va vika va lime kivala kikye, nokugesa ligesa lilye, nokulomba viju vivye vyobulwani, neviju vyamagari gege.

¹³ Na a la vugula vakana venyu va ve avaduugi veve, nokuva avadeki veve, nokuva avalugi veve.

¹⁴ Na a la vugula milimi gyenyu, nemilimi gyenyu gyemizabibu, nemilimi gyenyu gyemizeituni, gyi veye milahi ligali, na a la gyi haana ku vatumekiri veve.

¹⁵ Na a la vugula kidieli kyelikumi kyobugutsa bwenyu, ne kyemilimi gyenyu gyemizabibu, nokuhaana ku vanene veve, noku vatumekiri veve.

¹⁶ Naye a la vugula avatugwa venyu avayai, navatugwa venyu avakana, navasoleli venyu avalahi, netsisukiri tsyenyu, kukola miyinzi gyigye mwene.

¹⁷ Na a la vugula kidieli kyelikumi kyevyayo vyenyu: na mu la va avatugwa veve.

¹⁸ Na mu la lira ku lidiku yilyo kigira mwami wenyu uyu wa mwetovolera; na Yahova a la vula kumuhulira mu lidiku yilyo.

¹⁹ Navutswa avandu yavo va sula kuhulira mwoyo gwa Samweli; ni va vola, Auwa; navutswa kwenyanga kuva nomwami ku kwinye,

²⁰ na kwinye ku duke kuva kuli avetsihiri tsindi tsyosi, nomwami wetu a duke kukukalagira, kandi a twule kutsia imbiri wetu, kulwana ubulwani bwetu.

²¹ Na Samweli ya hulira amakuva gosi gavandu, naye ya ga vola mu amtu ga Yahova.

²² Na Yahova ya volera Samweli, U hulire mwoyo gwavo, u va singeridzire mwami. Na Samweli ya volera avandu va Israeli, Mu tsie sa mulala mu lidala lilye mwene.