1 Samweli 5 - KITABU KITAKATIFU

¹ Kunangwa Vafilisiti va vugula lisanduku lya Nyasaye, va tsia nalyo kutwula Ebenezeri kuduka Ashidodi.

² Vafilisiti va vugula lisanduku lya Nyasaye, ni va tsia kulivika mu inyumba ya Dagon, na va li vika himbi na Dagon.

³ Navandu va Ashidodi lwa va vuka mugamba, henza, Dagon u gwiye mammama imbiri welisanduku lya Yahova. Na va gumira Dagon, na va mu singeridza ha bugono hehe kandi.

⁴ Kandi lwa va vuka mugamba, lidiku li kola gavaka, henza, Dagon u gwiye hasi mammama imbiri welisanduku lya Yahova; nomutwe gwa Dagon nevigalo vya makono gege vyombi vya kalikira ku mukingi; gwa tigala mubiri gua Dagon gweng'ine.

⁵ Kigira yaga avasalisi va Dagon, noku vosi wingiranga mu inyumba ya Dagon, si va sena ku mukingi gwa Dagon ha Ashidodi, kuduka lero.

⁶ Navutswa mukono gwa Yahova gwa li muliduhu ku avandu va Ashidodi, na ya va dividza, nokuvakuya namihi, mu lidala lya Ashidodi nomu kivala kyosi kya li kumbiridza.

⁷ Navasatsa va Ashidodi lwa va lola inkuva yiyi, va vola, Lisanduku lya Nyasaye wa Israeli si li la menya halala nekwinye; kigira mukono gwigwe gu veye muliduhu ku kwinye, noku munyasaye wetu Dagon.

⁸ Ma va tuma avandu kuvungidza avakulundu vosi va Vafilisiti vadze kuvo, nokuvavolera, Kalunu ku kola ki nelisanduku lya Nyasaye wa Israeli? Navo va tivula, Lisanduku lya Nyasaye wa Israeli li hilwe Gathu. Ma va ginga lisanduku lya Nyasaye wa Israeli ni va li hila kuduka Gathu.

⁹ Na ga duka, lwa va mala kulihila, mukono gwa Yahova gwa li ku lidala yilyo nekivi kinene: na ya kuya avasatsa velidala yilyo, avakekeke navanene; namihi ga va gwira.

¹⁰ Kunangwa va hila lisanduku lya Nyasaye kuduka Ekiron. Na ga duka, lwa lisanduku lya Nyasaye lya duka Ekiron, avandu Vaekiron va kupa lwanga, ni va vola, Va leti lisanduku lya Nyasaye wa Israeli ku kwinye, kuduka kwiita kwinye navandu vetu.

¹¹ Kunangwa va tuma avandu kulanga avakulundu vosi va Vafilisiti, va vugana halala, na va vola, Mu twulidze lisanduku lya Nyasaye wa Israeli, li tsie hehe lyene, li vule kwiita kwinye, navandu vetu. Kigira ha li nekivi kinene ligali mu lidala yilyo lyosi; mukono gwa Nyasaye gwa li yo mulidihu ligali.

¹² Navandu va vula kukudza va duywa namihi; nalilira lyelidala lya duka migulu.