1 Samweli 4 - KITABU KITAKATIFU

¹ Namakuva ga Samweli ga duka ku Israeli vosi. Na Israeli vosi va tsia kulwana na Vafilisiti, na va singeridza mahema gavo himbi Ebenezeri: na Vafilisiti va singeridza mahema gavo ha Afeku.

² Na Vafilisiti va lomba lihe lyavo ku Israeli: na lwa va lwana, Israeli va kuywa imbiri wa Vafilisiti; na viita avandu mu lihe lya li mwigendanyama kuli tsielfu tsine vasatsa.

³ Na lwa avandu va galuka mu hokusosa, avakulundu va Israeli va teva, Kigira ki Yahova a kuyi kwinye lero ndi imbiri va Vafilisiti? Gendi ku tsie kuvugula lisanduku lyelilagana lya Yahova kutwula Shilo ku tsie nalyo, li duke kwingira hagati hetu, noku kuhonnya ku makono gavasigu vetu.

⁴ Kunangwa avandu yavo va tuma avandu kuduka Shilo; na va li leta kutwula yo, lisanduku lyelilagana lya Yahova wa mahe, wikalanga igulu ha vakerubi: navana vaviri va Eli, Hofini na Finehasi, va li halala nelisanduku lyelilagana lya Nyasaye.

⁵ Nelisanduku lyelilagana lya Yahova lwa lya duka mu hokusosa, Israeli vosi va kupa isango nomwoyo munene, kuduka lirova lya langirira.

⁶ Na lwa Vafilisiti va hulira isango yemyoyo, va teva, Isango yemyoyo minene yigyo i veye kigira ki mu hokusosa ha Vahebraina? Ma va manya lisanduku lya Yahova li duki mu hokusosa.

⁷ Na Vafilisiti va tia, kigira va vola, Nyasaye u duki mu hokusosa. Kandi va vola, Vayaye ku kwinye kigira kutwula yaho inkuva kuli yiyi i kikiri kuva ho.

⁸ Vayaye ku kwinye bwaha u nyala kukuhonnya ku makono gavanyasaye yava avobunyali? Avanyasaye yava nivo ava kuya Vaegepeti namaduya tsing'ano tsinyingi lugano lugano mwigendanyama.

⁹ Mu ve avanyala, mu ve avasatsa, mwinye Vafilisiti, mu vule kuva avatugwa ku Vahebraina, kuli lwa va li avatugwa venyu: mu ve avasatsa, mu lwane.

¹⁰ Na Vafilisiti va lwana, na Israeli va kuywa, ni viruka sa mulala ku lihema lilye: na ha li neliitwa linene ligali; ni va gwa mu Israeli avasatsa tsielfu makumi gavaka.

¹¹ Nelisanduku lya Nyasaye lya vugulwa; navana vaviri va Eli, Hofini ne Finehasi, viitwa.

¹² Nomulala ku Benjamini ya nyagula kutwula mu lihe, na a duka Shilo lidiku zana yilyo, naye ya tandula tsingubo tsitsye, na a vika budohi ku mutwe gwigwe.

¹³ Na lwa ya duka, henza, Eli ya li ni yikaye ku intebe yeye ku luginga lwenzira na a lindanga; kigira mwoyo gwigwe gwa li ni gu degeranga kigira lisanduku lya Nyasaye. Na lwa mundu uyu ya duka mu lidala, ya twulidza makuva, nelidala lyosi lya kupa lwanga.

¹⁴ Na lwa Eli ya hulira lioga lyelilira, ya teva, Lioga lyomuliviti yigu li veye kigira ki? Nomundu uyo ya nyagula na a tsia kuvolera Eli.

¹⁵ Inyinga yeyo Eli ya li na a veye wemihiga makumi gatano na gane, na gyitano na gyivaka; tsimoni tsitsye tsya li tsyavakuye, si a nyala kulola.

¹⁶ Nomundu zana ya volera Eli, Ni inze wa twula mu lihe, na nziruki lero kutwula mu lihe. Eli ya mu teva, Ga genda ndi, mwana wange?

¹⁷ Naye wa leta amakuva ya tivula na a mu volera, Israeli viruki imbiri wa Vafilisiti, kandi ha li neliitwa ligali hagati ha avandu, navana vovo, Hofini na Finehasi, va kudzi, nelisanduku lya Nyasaye li vuguywi.

¹⁸ Na ga duka, lwa ya tala lisanduku lya Nyasaye, Eli ya gwa kutwula ku intebe yeye ku luvega lwemugongo himbi ku kiliango; neligoti lilye lya kalika, na ya kudza: kigira ya li musakulu ligali nomuliduhu. Naye ya li mukalagi wa Israeli mihiga makumi gane.

¹⁹ Navizala wa Eli, muka Finehasi, ya li inda inyinga yeyo, himbi kwivula: na lwa ya hulira lisanduku lya Nyasaye li vuguywi, kandi navizala wewe nomusatsa wewe vombi va kudzi, yeyinaminya mwene ni yivula; kigira lilumwa lilye lya duka kuye.

²⁰ Na inyinga yelikudza lilye avakali va singira himbi va mu volera, U ta tia mba; kigira wivuye mwana muyai. Navutswa si ya tivula kindu, kandi si ya kola kuli ya hulira.

²¹ Naye ya gulika mwana Ikabodu, na a vola, Ubukumi bu twuli ku Israeli; kigira lisanduku lya Nyasaye lya vugulwa, na kigira navizala wewe nomusatsa wewe.

²² Naye ya vola, Ubukumi bu twuli ku Israeli; kigira lisanduku lya Nyasaye lya vugulwa.