1 Samweli 31 - KITABU KITAKATIFU

¹ Na Vafilisiti va lwana na Israeli: navandu va Israeli viruka imbiri wa Vafilisiti, na va gwa hasi ni viitirwa mu kigulu kya Giliboa.

² Na Vafilisiti va londerera Saulo na avana veve budinyu; na Vafilisiti viita Jonathan, na Abinadabu, na Malikishua, avana va Saulo.

³ Nobulwani bwa duka ku Saulo ubunene ligali, na avalasi vemibano va mu nyola; naye ya dambidzwa ligali kigira yavo ava lasi mibano.

⁴ Hene yaho Saulo ya volera uyu ya ginga vyuma vivye, Somola kivavi kikyo, u ntumite nakyo, gase yava avasindi va la ntumita, nokundegannya. Navutswa mugingi wevyuma vivye si ya bugirira mba; kigira ya tia ligali. Ma Saulo mwene ya gumira kivavi kikye, na a gwa kukyo.

⁵ Hene yaho uyu wa ginga vyuma vivye lwa ya lola Saulo u kudzi, naye kandi ya gwa ku kivavi kikye, na a kudza halala naye.

⁶ Kunangwa Saulo ya kudza, na avana veve vavaka, na uyu wa ginga vyuma vivye, navandu veve vosi halala, ku lidiku yilyo lyeng'ine.

⁷ Navandu va Israeli ava li ku luvega lundi lwelivona, na yavo ava li engereka wa Yordani lwa va lola avandu va Israeli viruki kandi Saulo na avana veve va kudzi, yavo kandi va leka madala yago ni viruka; na Vafilisiti va tsia kumenya mu madala yago.

⁸ Na ga duka mugamba, lwa Vafilisiti va tsia kulanya yavo aviitwa, va lola Saulo na avana veve vavaka ni va gwiye ku kigulu kya Giliboa.

⁹ Ma va mu kala mutwe, ni va mu navula vyuma vivye, ni va tuma avatumwa mu kivala kya Vafilisiti yiyi na yiyi, va duke kuhila makuva kali mu inyumba yevifwananyi vyavo, noku avandu.

¹⁰ Nevyuma vivye va vi vika mu inyumba ya Ashitarothu; nomubiri gwigwe va gu bamba ku lidigi lyelidala lya Bethshan.

¹¹ Na lwa yavo avamenya mu Jabeshgileadi va hulira makuva gege kuli aga Vafilisiti va kolera Saulo,

¹² avaluviriri vosi va singira, ni va tsia budiku bwosi, ni va vugula mubiri gwa Saulo, nemibiri gyavana veve ku lidigi lya Bethshan; na va gyi leta Jabeshi, ni va gyi sambira yo.

¹³ Na va vugula vigumba vyavo, ni va vi hila ku vi ta isi womusala mu Jabesh, na va honga lilia madiku gatano na gaviri.