1 Samweli 3 - KITABU KITAKATIFU

¹ Nomwana Samweli ya tumekira Yahova imbiri wa Eli. Noku madiku yago amakuva ga Yahova si ga nyolekanga mba, navutswa ku budinyu; si ha li nelivuula habulavu.

² Na ga duka inyinga yeyo, lwa Eli ya gona mu bugono bwibwe (tsimoni tsitsye tsya li ni tsi tangi ku vakula, si a nyala kulola bulahi),

³ netaya ya Nyasaye ya li nekikiri kusima, na Samweli na a mali kugorla, mu litempeli lya Yahova, helisanduku lya Nyasaye lya li;

⁴ inyinga yeyo Yahova ya langa Samweli: naye ya vola, Mbeye hano.

⁵ Naye ya tsia ku Eli bwangu, na a vola, Mbeye hano; kigira wa nanga. Na Eli ya mu volera, Si nku langi mba; u gone kandi. Naye ya tsia na a gona kandi.

⁶ Na Yahova ya langa kandi hali kaviri, Samweli. Na Samweli ya vuka na a tsia ku Eli, na a vola, Mbeye hano; kigira wa nanga. Na Eli ya tivula, Inze si nku langi mba, mwana wange; u gone kandi.

⁷ Na Samweli ya li na a kikiri kumanya Yahova kinga likuva lya Yahova lya li li kikiri kulang'aminywa kuye.

⁸ Na Yahova ya langa Samweli hali kavaka. Naye ya vuka na a tsia ku Eli, na a vola, Mbeye hano; kigira wa nanga. Kunangwa Eli ya manya ni Yahova u langanga mwana.

⁹ Kigira yaga Eli ya volera Samweli, U tsie kugona: na ga la va, na a ku langa, hene yaho u la vola, Vola, Yahova; kigira mutumekiri wowo a huliranga. Ma Samweli ya tsia na a gona ha bugono bwibwe.

¹⁰ Na Yahova yadza, na a singira, na a langa kuli ya langa ku matsya mbiri, Samweli, Samweli. Hene yaho Samweli ya vola, Vola; kigira mutumekiri wowo a huliranga.

¹¹ Na Yahova ya volera Samweli, Henza, nda kola kindu mu Israeli, ku vosi u hulira kindu yikyo amatu gege gombi ga la lutsirira.

¹² Mu lidiku yilyo, vindu yivi vyosi vya nda vola ku Eli ku makuva genyumba yeye, nda vi dukidza, kutwula ku litanga lyavyo nokuduka ku kiheri kyavyo.

¹³ Kigira mmu voleye nda kalagira inyumba yeye mihiga nemihiga, kigira ubudamano bwa ya manya, kigira avana veve va letera lilaamwa kuvo, naye si ya vigalira.

¹⁴ Kunangwa, mmali kwisuhira inyumba ya Eli, ubudamano bwenyumba ya Eli si bu la twulidzwa netsisadaka kinga visyuviriru kuduka mihigi nemihiga.

¹⁵ Na Samweli ya gona kuduka mugamba, ma yigula miliango gyenyumba ya Yahova. Na Samweli ya tia kuvolera Eli amakuva ga malola.

¹⁶ Hene yaho Eli ya langa Samweli, na a vola, Samweli, mwana wange. Na ya vola, Mbeye hano.

¹⁷ Naye ya mu teva, Ni likuva ki lya Yahova ya volera ive? Nku goonya, u ta mbisa likuva zana mba: Nyasaye a ku kolere ndiyo, nokuvita, nu u va nu u mbisa kindu ku vyosi vya ya volera ive.

¹⁸ Ma Samweli ya mu volera sa kilala, si ya mu visa kindu mba. Naye ya vola, Ni Yahova: a kole aga veye malahi kuye.

¹⁹ Na Samweli ya viruka, na yahova ya li halala naye, na si a leka kindu kali kilala ku makuva gege kugwa hasi.

²⁰ Na Israeli vosi kutwula Dan kuduka Beeri-sheba va manya Samweli u singeridzeywi kuva muprofeti wa Yahova.

²¹ Na Yahova yelangaminya kandi ha Shilo: kigira Yahova yelolekidza ku Samweli ha Shilo mu likuva lya Yahova.