1 Samweli 28 - KITABU KITAKATIFU

¹ Na ga duka mmadiku yago, Vafilisiti va vungidza amahe gavo halala kigira ubulwani, kulwana na Israeli. Na Akishi ya volera Daudi, U manye ligali, u la twula kutsia halala ninze mu lihe, ive navandu vovo.

² Na Daudi ya volera Akishi, Kigira yaga u la manya aga ndi kola, inze mutumekiri wowo. Na Akishi ya volera Daudi, Kigira yaga nda ku kola mulindi womutwe gwange kazozo.

³ Samweli ya li ni ya mali kukudza, na Israeli vosi va mu syomera, nokumuta ha Rama, mu lidala lilye mwene. Na Saulo ya li na a mali kutwulidza ava mademoni gelimanya, navasegetiri, va twule mu kivala.

⁴ Na Vafilisiti va vugana halala, na va tsia kusingeridza mahema gavo mu Shunem: na Saulo ya vugannya Israeli vosi, na va singeridza mahema gavo mu Giliboa.

⁵ Na Saulo lwa ya lola amahe ga Vafilisiti, ya tia, nomwoyo gwigwe gwa degera ligali.

⁶ Na Saulo lwa ya teva Yahova, Yahova ya vula kumutivulira, kinga na malola, kinga na Urim, kinga navaprofeti.

⁷ Hene yaho Saulo ya volera vatumekiri veve, Mu nzenyere mukali u veye nelidemoni lyelimanya, nduke kutsia kuye, nokuteva kindu kuye. Na vatumekiri veve va mu volera, Henza, a veye ho mukali mulala u veye nelidemoni lyelimanya ha En-doru.

⁸ Na Saulo yegirunkanya ni yevika ingubo yindi, na a tsia, uyu navandu vaviri halala naye, ni va duka ku mukali uyo mbudiku: na ya mbolera, Mwadza, u ndagulire, nelidemoni lyelimanya, na u mbukidzire mundu ku vosi wa mtala ku ive.

⁹ Nomukali uyu ya vola, Henza, ive u manya aga Saulo ya kola, kuli ya kalaga kutwulidza ava mademoni gelimanya, na vasegetiri va twule mu kivala: kigira ki ive u vikira livamwoyo lyange mutego, u duke kunziita?

¹⁰ Na Saulo ya mwisuhira ku Yahova, na a vola, Kuli Yahova a veye mwoyo, likalagirwa si li la gwa ku ive kali lilala kigira yaga.

¹¹ Hene yaho i mukali ya vola, Nda ku vukidzira bwaha? Naye ya vola, U mbukidzire Samweli.

¹² Nomukali lwa ya lola Samweli, ya hanzuka nomwoyo munene; nomukali ya volera Saulo, na a vola, Kigira ki wa ngada? Kigira ive u veye Saulo.

¹³ Nomwami ya mu volera, U ta tia mba: wa lola ki? Nomukali ya volera Saulo, Inze ndoli munyasaye mulala a twulanga mu lirova.

¹⁴ Naye ya mu volera, A fwanana na ki? Nomukali ya vola, musakulu a twula hasi u kunikeywi nengubo. Na Saulo ya ganagana ni Samweli, naye yinama mumoni mwimwe kuhenza hasi, nokusigamira.

¹⁵ Na Samweli ya volera Saulo, Kigira ki ive u ndambidzi nokumbukidza? Na Saulo ya tivula, Inze mbeye mu lisaliridzwa ligali; kigira Vafilisiti va lwananga na inze, na Nyasaye u ndeki, na si ya ntivulira, kinga na vaprofeti, kinga na malola: kigira yaga nda langa ive, u nungike aga nda kola.

¹⁶ Na Samweli ya vola, Kigira ki ive u tevanga inze, kigira Yahova u ku leki, na a gwiye musigu wowo?

¹⁷ Yahova u ku koleye, kuli ya vola ku inze: Yahova u tanduye ubwami bu twule mmukono gugwo, nokubuhaana ku mutende wowo, naye ni Daudi.

¹⁸ Kigira ive wa vula kuhulira mwoyo gwa Yahova, kandi si wa dukidza ubutima bululu bwibwe ku Amaleki, kigira yaga Yahova u ku koleye inkuva yiyi lero.

¹⁹ Nokuvita yaga Yahova a la vika Israeli kandi halala nive mu makono ga Vafilisiti; na mugamba ive navana vovo mu la va halala ninze: na Yahova a la vika lihe lya Israeli mu makono ga Vafilisiti.

²⁰ Hene yaho Saulo ya gwa na a lambira hasi ligali ku lirova, na ya tia ligali, kigira makuva ga Samweli: na si ya li netsingulu muye; kigira ya vula kulia mbasu gwosi, nobudiku bei.

²¹ Nomukali uyu ya tsia ku Saulo, na a mu lola a veye mu kivi kinene, na ya mu volera, Henza, mukana mutugwa wowo mbuliye mwoyo gugwo, na mbiki livamwoyo lyange mu mukono gwange, na mbuliye makuva gogo ga u mboleye.

²² Kunangwa kalunu, nku saaln, ive kandi u hulire mwoyo gwa mukana mutugwa wowo leka nku sundire lidonye lyobukima, na u lagire u duke kunyola tsingulu, lwa u tsia.

²³ Navutswa ya sula na a vola, Inze si nyenya kulagira mba. Navutswa avatumekiri veve, halala nomukali uyu, va mu goonya; na ya hulira myoyo gyavo. Ma ya vuka hasi ni yikala ku kitali.

²⁴ Nomukali uyu ya li na a veye nekimoli kenetu mu inyumba; na ya kola bwangu, kukiita; na ya vugula ubusie, na a duvula, ni yominya ubukima bu ta li namamera:

²⁵ na ya sundira Saulo, navatumekiri veve vyokulia: na va lagira. Ni va singira, ni va tsia ubudiku yibwo.