1 Samweli 27 - KITABU KITAKATIFU

¹ Ma Daudi ya vola mmwoyo gwigwe, Ku lidiku lilala nda diva ku mukono gwa Saulo: si ha veye nekindu ki nkonya kuvita liruka lyange nokwingira mu kivala kya Vafilisiti; na Saulo a la twulidza mwoyo gwigwe ku inze, si a li nyenya kandi mu tsinzako tsya Israeli: na ndiyo nda hona ku mukono gwigwe.

² Ma Daudi ya singira, ni yambuka, uyu navandu tsimia tsitano na indala halala naye, kuduka ku Akishi mwana wa Maoku, mwami wa Gathu.

³ Na Daudi ya menya halala na Akishi ha Gathu, uyu navandu veve, sa mulala na avenyumba yeye, na Daudi navakali veve vaviri, Ahinoam wa Jezireeli, na Abigaili wa Karimeli, mukali wa Nabali.

⁴ Na Saulo ya volerwa, Daudi wiruki kutsia Gathu: naye si ya mwenya kandi.

⁵ Na Daudi ya volera Akishi, ni mba ni nyoye liverererwa imbiri wetsimoni tsitsyo, va mbe ubwiyangu mu lidala lilala mu kivala, nduke kumenya yo: kigira ki inze mutumekiri wowo a menyanga mu lidala lyobwami halala nive?

⁶ Hene yaho Akishi ya mu ha lidala lya Ziklagu lidiku yilyo: kigira yaga lidala lya Ziklagu li veye miyandu gyavami va Yuda kuduka lero.

⁷ Livalidzwa lyamadiku ga Daudi ya menya mu kivala kya Vafilisiti lya li muhiga mulala ne myeli gyine.

⁸ Na Daudi navandu veve vanegira, ni va yaka Vageshuri, na Vagerizi, na Vaamaleki; kigira tsihiri yitsyo nivo ava li avene kivala yikyo, ava tangira, lwa u vitanga Shur, kuduka mu kivala kya Egepeti.

⁹ Na Daudi ya kuya kivala yikyo, na si ya leka mundu musatsa kinga mukali kuva mwoyo, na ya vugula magondi, netsing'ombe, netsisukiri, netsing'amia, netsingubo; na yirana na a duka ku Akishi.

¹⁰ Na Akishi ya mu teva, Ive wa twuliye ibwaha lero? Na Daudi ya vola, Ku luvega lwa Kusini lwa Yuda, noku luvega lwa Kusini lwa Vajerahameeli, noku luvega lwa Kusini lwa Vakeni.

¹¹ Na Daudi si ya leka kuva mwoyo musatsa kinga mukali, kumuleta Gathu, na a vola, Gase va la vuula, nokuvola, Ni ndiyo Daudi a kolanga, kandi ni ndiyo miima gyigye gyi veye tsinyinga tsyosi tsya ya menya mu kivala kya Vafilisiti.

¹² Akishi ya suuvira Daudi, na a vola, Ya kolanga aveve va Israeli va mu dunyire ligali; kigira yaga a la va mutumekiri wange kazozo.