1 Samweli 23 - KITABU KITAKATIFU

¹ Na va volera Daudi, ni va vola, Henza, Vafilisiti va lwananga ku Keila, na vivanga ubuswage ku vyanekiru.

² Kunangwa Daudi ya teva ku Yahova, na a vola, Nda tsia kukuya Vafilisiti naho? Na Yahova ya volera Daudi, Tsia, na u kuye Vafilisiti, nokukonya Keila.

³ Navandu va Daudi va mu volera, Henza, ku veye nobutii hano mu Yuda: nasindi ni ku tsia Keila kulwana na mahe ga Vafilisiti, bu la duka ndi?

⁴ Ma Daudi ya teva ku Yahova kandi, Na Yahova ya tivula, na a mu volera, U singire, u sulungute Keila; kigira inze nda vika Vafilisiti mmukono gugwo.

⁵ Na Daudi navandu veve va tsia Keila, ni va lwana na Vafilisiti, na va lanya tsing'ombe tsyavo, nokwiita avandu nobwiiti ubunene ligali. Na ndiyo Daudi ya honnya avandu va Keila.

⁶ Na ga duka, lwa Abiatharu mwana wa Ahimeleku, yirukira ku Daudi ha Keila, ya sulunguta ya li nekisibao mmukono gwigwe.

⁷ Na Saulo ya volerwa Daudi u duki Keila. Na Saulo ya vola, Nyasaye u mu viki mu mukono gwange; kigira u boheywi mu, kigira wingiye mu lidala li veye neviribwa na maliva.

⁸ Na Saulo ya vungidza avandu vosi va tsia mbulwani, kusulunguta Keila, va duke kukumbiridza Daudi navandu veve.

⁹ Na Daudi ya manya Saulo u saaviye ubudamano kuye; na ya volera Abiatharu musalisi, Leta kisibao.

¹⁰ Ilene yaho Daudi ya vola, O Yahova, Nyasaye wa Israeli, inze mutumekiri wowo mbuliye ligali Saulo yenyanga kuduka hano Keila, a dividze lidala yili kigira inze.

¹¹ Avandu va Keila va la ntwulidza nokumbika mmakono gege? Saulo a la sulunguta kuli mutumekiri wowo u huliye? O Yahova, Nyasaye wa Israeli, nku saala ligali, u volere mutumekiri wowo. Ma Yahova ya vola, A la sulunguta.

¹² Daudi ya vola kandi, Avandu va Keila va la ntwulidza navandu vange nokukuvika mmukono gwa Saulo? Na Yahova ya vola, va la ku twulidza.

¹³ Hene yaho Daudi navandu veve, ava duka kuli avandu tsimia tsitano na indala, va singira kutwula Keila, na va tsia hosi ha va nyola ubwiyangu. Na Saulo ya volerwa, Daudi wiruki kutwula Keila, na yononnya lugendo lwilwe.

¹⁴ Na Daudi ya menya mwigendanyama mu lyevisa, nokumenya mu kivala kyevigulu, mwigendanyama lya Zifu. Na Saulo ya mwenya madiku gosi, navutswa Nyasaye si ya mu vika mmukono gwigwe mba.

¹⁵ Na Daudi ya lola Saulo u twuli a duke kwenya livamwoyo lilye; na Daudi ya li mwigendanyama lya Zifu, mu mulitu.

¹⁶ Na Jonathan, mwana wa Saulo, ya singira, na a tsia ku Daudi mu mulitu, na a vika tsingulu mmukono gwigwe ku Nyasaye.

¹⁷ Naye ya mu volera, U ta tia mba; kigira mukono gwa Saulo dada wange si gu la ku nyola mba; na ive u la va mwami ku Israeli, na inze nda va wa kaviri ku ive; na Saulo dada wange u mali kumanya yaga.

¹⁸ Na yavo vombi va lomba lilagana halala imbiri wa Yahova: na Daudi ya menya mu mulitu, na Jonathan ya tsia ingo wewe.

¹⁹ Ma Vazifu vanegira ku Saulo ha Gibea, ni va vola, Daudi si yivisa ku kwinye mu lyevisa lyomulitu, mu kigulu kya Hakila, ki veye ku luvega lwa kusini kye kyangalangwi?

²⁰ Kunangwa kalunu, O mwami, u sulungute, kuli lyenya lyosi lyomwoyo gugwo kusulunguta; nemiyinzi gyetu gugwo kusulunguta; nemiyinzi gyetu gyi la va kumutwulidza nokumuvika mu mukono gwomwami.

²¹ Na Saulo ya vola, Yahova a gasidze mwinye; kigira mu mberereye.

²² Mu tsie, mwadza, mu kole ligali kuvita, mu manye na mu lole ha yivisa, ni bwaha a mu lola yo; kigira mboleywe a kolanga nobugeeri ligali.

²³ Kunangwa, mu henze, mu manye ligali makuva ga ha zana hosi ha yivisa ma mwidze ku inze kandi nageligali na nda tsia na mwinye: na ga la duka, na a va na a veye mu kivala, nda mwenya mu tsielfu tsyosi tsya Yuda.

²⁴ Navo va singira, ni va tsia Zifu imbiri wa Saulo: navutswa Daudi navandu veve va li mwigendanyama lya Maon, mu kireremu ku luvega lwa kusini lwekyangalangwi.

²⁵ Na Saulo navandu veve va tsia kumwenya. Na va volera Daudi: kunangwa ya sulunguta ku lwanda, na ya menya mwigendanyama lya Maon. Na Saulo lwa ya hulira makuva yago, ya londerera Daudi mwigendanyama lya Maon.

²⁶ Saulo ya tsia ku luvega yilu lwekigulu, na Daudi navandu veve va tsia ku luvega yilwo lwekigulu: na Daudi ya kola bwangu a twule kigira ya tia Saulo; kigira Saulo navandu veve va kumbiridza Daudi navandu veve va duke kuvagumira.

²⁷ Navutswa Saulo, mutumwa ya duka kuye na a vola U kole bwangu, udze; kigira Vafilisiti va lanyi kivala.

²⁸ Ma Saulo yirana kutwula ku lilonderera Daudi, na ya tsia ku Vafilisiti: kigira yaga va gulika lieta lya ha zana Sela-hamalekothu.

²⁹ Na Daudi yanegira kutwula yo na a menya mu lyevisa lya Engedi.