1 Samweli 22 - KITABU KITAKATIFU

¹ Kunangwa Daudi ya twula ha zana, ni yirukira mu luhangaywa lwa Adulam: navamwavo veve, navenyumba yosi ya dada wewe, lwa va hulira va tsia kuye ha zana.

² Ku vosi wa li mu lidambidzwa, noku vosi va vanzwa magovi, noku vosi wa li nobululu mmwoyo, va vugana yo kuye; na ya duka kuva munyampara kuvo, navo va li halala naye avasatsa va duka kuli avandu tsimia tsine.

³ Inyinga yeyo Daudi ya tsia Mizipe lya Moabu: na ya volera mwami wa Moabu, Mwadza, u bugirire dada wange na mama wange, va twule ha va veye, va ve halala nive kuduka inyinga ya ndi manya kya Nyasaye a li kolera inze.

⁴ Na ya va leta imbiri womwami wa Moabu: navo va menya halala naye tsinyinga tsyosi tsya Daudi ya menya mu lyevisa.

⁵ Na muprofeti Gadi ya volera Daudi, Ive u ta menya mu lyevisa; u twule hano u tsie mkivala kya Yuda. Hene yaho Daudi ya twula, na a menya rnu mulitu gwa Herethu.

⁶ Na Saulo ya hulira Daudi u loleki, navandu ava li halala naye: Saulo ya li na a menyi mu Gibea, isi womusala, mu Rama, naye ya li nelitimu mmukono gwigwe, na vatumekiri veve vosi va singira nokumukumbiridza.

⁷ Ma Saulo ya volera avatumekiri veve ava singira kumukumbiridza, Mu hulire kalunu mwinye avandu va Benjamini; mwana wa Jesse uyu a la haana ku mwinye sa mulala milimi, nemilimi gyomuzabibu, a la mu kola mwinye vosi avanyampara avetsielfu, navanyampara avetsimia,

⁸ mwinye vosi mu duke kukola tsimbemba ku inze, kinga si ha veye nomundu u vuula ku inze lwa mwana wange ya kola lilagana nomwana wa Jesse, kinga si ha veye nomulala ku mwinye u vereranga inze, kinga ku mbuulira mwana wange a gemanga mutumekiri wange ku inze, nokungoneka kuli ga veye lero?

⁹ Ma Doegu Muedom ya tivula, na a singira himbi na vatumekiri va Saulo, na a vola, Inze nda lola mwana wa Jesse ni yadzanga Nobu, ku Ahimeleku mwana wa Ahitubu.

¹⁰ Naye ya mtevera Yahova, nokumuha vyokulia, nokumuha kivavi kya Goliati Mufilisiti.

¹¹ Ma mwami ya tuma mutumwa kulanga Ahimeleku musalisi, mwana wa Ahitubu, na vosi avenyumba ya dada wewe, avasalisi va veye ha Nobu: navo va tsia ku mwami vosi.

¹² Na Saulo ya vola, U hulire kalunu, ive mwana wa Ahitubu. Naye ya tivula, Mbeye hano, mwami wange.

¹³ Na Saulo ya mu teva, Kigira ki mwinye mu kolanga tsimbemba ku inze, ive nomwana wa Jesse, kigira wa mu ha vyokulia, nekivavi, nokumtevera Nyasaye, a duke kuvuka ku inze, nokungoneka, kuli ga veye lero?

¹⁴ Hene yaho Ahimeleku ya tivulira mwami, na a mu volera, Ku vatumekiri vovo vosi, u li ha kuvo u veye musuuvirifu ku leng'ana na Daudi, u veye navizala womwami, wa bugirirwa mu makuva gogo, welidzominywa mu inyumba yoyo?

¹⁵ Inze ntangi lero kumtevera Nyasaye? Auwa, li ve ihale ku inze likuva yili: mwami a vule kuvika liganagana ku inze mutumekiri wewe, kinga ku inyumba yosi ya dada wange; kigira mutumekiri wowo si a manya kindu ku yaga gosi, bukekeke kinga bunyingi bwago.

¹⁶ Nomwami ya vola, Ligali ive u la kudza, ive Ahimeleku, navandu vosi venyumba ya dada wowo.

¹⁷ Nomwami ya volera avalindi ava singira himbi kuye, Mu girunkane mwiite avasalisi va Yahova kigira mukono gwavo gu veye haiala na Daudi, kandi kigira va manya yiruka, na si va leta ku inze makuva mba. Navutswa vatumekiri vomwami si va bugirira kunyira mukono gwavo nokugwira avasalisi va Yahova.

¹⁸ Ma mwami ya volera Doegu, U girunkane, u gwire avasalisi yava. Ma Doegu Muedom ya girunkana, na a gwira avasalisi, na ya viita ku lidiku yilyo avandu makumi gatano nagavaka na vatano avevika kisibao kyengubo yekatani.

¹⁹ Nelidala lyavasalisi, Nobu, ya li kuya nobwogi bwekivavi, avasatsa na vakali, avasoleli na vanunanga, netsing'ombe netsisukiri na magondi, ku bwogi bwekivavi.

²⁰ Mulala ku avana va Ahimeleku, mwana wa Ahitubu, wa langwa Abiatharu ya hona, na yiruka na a londa Daudi.

²¹ Abiatharu ya volera Daudi, Saulo u mali kwiita avasalisi va Yahova.

²² Na Daudi ya volera Abiatharu, Inze nda manya ku lidiku yilyo lya Doegu Muedom ya li yo, ligali a la volera Saulo: inze mmali kuleta likudza lya vosi avenyumba ya dada wowo.

²³ U menye halala ninze, u ta tia mba: kigira uyu wenyanga livamwoyo lyange, yenyanga kandi livamwoyo lilyo: kigira halala ninze ive u la va mu lilindwa lilahi.