1 Samweli 18 - KITABU KITAKATIFU

¹ Na ga duka, lwa ya mala kuvolerana na Saulo, mwoyo gwa Jonathan gwa hambana nomwoyo gwa Daudi, Jonathan ya mu yanza kuli yeyanza mwene.

² Na Saulo ya mu vugula lidiku yili, si ya mu leka kutsia ingo ku dada wewe kandi mba.

³ Hene yaho Jonathan na Daudi va lomba lilagana, kigira ya mu yanza kuli yeyanza mwene.

⁴ Jonathan ya navula ingubo yegulu ya yivika, na a ha Daudi, nevyuma vivye, kali kivavi kikye, nobuta bwibwe, nomusipi gwigwe.

⁵ Kunangwa Daudi ya twula a tsie hosi ha Saulo ya mu tuma, na ya kola nobugeeri: na Saulo ya mwamehidza ku avandu vobulwani, nenkuva yiyi ya li indahi ku avandu vosi, noku vatumekiri va Saulo kandi.

⁶ Kandi lwa va gendanga, inyinga Daudi yirana kutwula kwiita Mufilisiti, avakali va twula mu madala gosi ga Israeli, na vimba nokukina, va duke kwaganira mwami Saulo, navo va li nevindu ku lugano lwa isuguti, ni va sangala, na va li nevindu vindi vyokwimba.

⁷ Navakali zana, vimbirana avene navene, ni va vola, Saulo yiiti tsielfu tsitsye, Na Daudi tsielfu tsitsye likumi.

⁸ Ma Saulo ya vihirirwa ligali, makuva yaga ga mkendekidza ligali; na ya vola, Uyu Daudi va mu taliranga tsielfu tsitsye likumi, na inze va ntaliranga tsielfu vutswa: kalunu a la nyala kuva na ki kandi, ni bu ta li ubwami bwene?

⁹ Ma Saulo ya li na a guniyera Daudi kutwula lidiku yilyo nokutsia imbiri.

¹⁰ Na ga duka mugamba, roho mudamano gwa twula ku Nyasaye, gwadza ku Saulo netsingulu, naye ya profeta mu inyumba: na Daudi ya kupa ubukana nomukono gwigwe, kuli ya kola lidiku na lidiku. Na Saulo ya li nelitimu mmukono gwigwe;

¹¹ ma Saulo ya sikisa litimu; kigira ya vola, Nda tumita Daudi uyu kuduka ku lidigi. Na Daudi yehonnya ku litwula imbiri wewe hali kaviri.

¹² Na Saulo ya tia Daudi, kigira Yahova ya li halala naye, na Yahova ya li na a leki Saulo.

¹³ Kigira yaga Saulo ya twulidza Daudi a vule kuva ahehe kandi, na a mu kola ave munyampara ku vasikari elfu; na ya twula na yingira imbiri wetsimoni tsya avandu.

¹⁴ Na Daudi ya kola nobugeeri mu tsinzira tsitsye tsyosi; na Yahova ya li halala naye.

¹⁵ Saulo lwa ya lola Daudi a kolanga nobugeeri ligali, ya mu tia ligali.

¹⁶ Navutswa Israeli vosi na Yuda va yanza Daudi; kigira ya li na a twula na yingira imbiri wetsimoni tsyavo.

¹⁷ Na Saulo ya volera Daudi, Henza, mwana wange munene Meraba, nda ku ha mukana wange uyu a ve mukali wowo: navutswa ive u ve muluviriri kigira inze, u lwane ubulwani bwa Yahova, yaga geng'ine. Kigira Saulo ya vola, Mukono gwange gu vule kuva kuye, navutswa amakono ga Vafilisiti ga ve kuye.

¹⁸ Na Daudi ya volera Saulo, Inze mbeye bwaha, na livamwoyo lyange li veye ki, kinga inyumba yadada wange mu Israeli, nduke kuva navizala ku mwami?

¹⁹ Navutswa ga duka inyinga ya Meraba, mukana wa Saulo, yenya kuhebwa Daudi, Meraba ya kwebwa ku Adirieli Mumeholathu kuva mukali wewe.

²⁰ Na Mikali mukana wa Saulo, ya yanza Daudi na va volera Saulo, na inkuva yiy ya mu yanzidza.

²¹ Na Saulo ya vola Nda mu ha mwana wange uyu, u duke kuva mutego kumutega, mukono gwa Vafilisiti gu duke kuva kuye. Kunangwa Saulo ya volera Daudi, Ive u la va navizala wange lero hali kaviri.

²² Na Saulo ya laga avatumekiri veve, Mu volerane na Daudi makiriri mu vole, Henza, mwami a ku yanza navatumekiri veve vosi va yanza ive: kunangwa kalunu u ve navizala womwami.

²³ Navatumekiri va Saulo va vola makuva yaga rnmatu ga Daudi. Na Daudi ya vola, Mwinye mu lolanga ni inkuva inkekeke kuva navizala womwami, kigira inze mbeye mudaka, kandi si mbeye nekyokwi dzominyirwa?

²⁴ Ma avatumekiri va Saulo va volera Saulo, ni va vola Daudi u voye kuli yaga.

²⁵ Na. Saulo ya va volera, Mu la volera Daudi makuva yaga, Mwami si yenya kyobukwi kali kilala, navutswa yenyanga magodo mia ga Vafilisiti, a duke kwevanzira kisalya ku vasigu vomwami. Ni ndiyo Saulo ya ganagana kukola Daudi kugwa ku mukono gwa Vafilisiti.

²⁶ Na lwa avatumekiri va Saulo va volera Daudi makuva yaga, ga yanzidza Daudi ligali kuva navizala womwami. Madiku yago ga kikiri kufwa;

²⁷ Daudi ya singira na a tsia, navandu veve, na yiita Vafilisiti tsimia tsiviri, na Daudi ya leta magodo gavo, na ya ha mwami livalidza lyosi, a duke kuva navizala womwami. Ma Saulo ya haana Mikali mukana wewe kuva mukali wewe.

²⁸ Na Saulo ya lola na a manya Yahova a veye halala na Daudi; na Mikali mukana wa Saulo ya mu yanza.

²⁹ Na Saulo ya kira kutia Daudi ligali; Saulo ya li musigu wa Daudi kazozo.

³⁰ Inyinga yeyo avanene wa Vafilisiti va twula: na ga duka, ku tsinyinga tsyosi tsya va twula, Daudi ya kola nobugeeri kuvita avatumekiri vosi va Saulo; na lieta lilye lya li nelidzominywa linene ligali.