1 Samweli 14 - KITABU KITAKATIFU

¹ Na ga duka lidiku lilala, Jonathan mwana wa Saulo ya volera musolele wa mu gingira vyuma vivye, Genda kwambuke kuduka ku lugaga lwa Vafilisiti, lu veye engereka. Navutswa ya vula kuvolera dada wewe.

² Na Saulo ya menya ku luvega lwekiheri kya Gibea isi womukomamanga gu veye mu Migiron: navandu va li halala naye va duka kuli avasatsa tsimia tsitano na indala;

³ na Ahija, mwana wa Ahitubu, amwavo Ikabodu, mwana wa Finehasi, mwana wa Eli, wa li musalisi wa Yahova mu Shilo, naye ya li nekisibao. Navandu si va manya Jonathan u tsii.

⁴ Hagati ho lumbatania ha Jonathan yenya kuvitira kwambuka kuduka ku lugaga lwa Vafilisiti, ha li ho neligina ku luvega lulala, nelindi ku luvega lundi: lieta lyeligina lilala lya langwa Bozezi, nelindi lya langwa Sene.

⁵ Ligina lilala lya singira ku luvega lwa kasikasini kuhenza Mikimashi, nelindi ku luvega lwa kusini kuhenza Geba.

⁶ Na Jonathan ya volera musolele uyu wa ginga vyuma vivye, Genda, kwambuke kuduka ku lugaga lwavasindi: namusia Yahova a la ku lwanira; kigira Yahova si a veye nekyokumigalira kuhonnya ku vanyingi kinga ku vakekeke.

⁷ Na uyu wa ginga vyuma vivye ya mu volera, Kola gosi ga u lola kuva malahi mu mwoyo gugwo: girunkana, henza, inze mbeye halala nive kuli mwoyo gugwo.

⁸ Hene yaho Jonathan ya vola, Henza, ku lambuka ku tsie ku avandu yava, ku lelangaminya kuvo.

⁹ Ni va va ni va ku volera likuva yili, Mu linde ku duke ku mwinye; hene yaho ku la singira ha zana ha ku veye, si ku lanegira kuvo.

¹⁰ Navutswa ni va va ni va vola likuva yili Mwanegire ku kwinye ha ku veye, hene yaho ku lanegira; kigira Yahova u va viki mmakono getu: kiloleru kyetu ki la va yiki.

¹¹ Navo vombi velangaminya avene ku Vafilisiti volugaga: Vafilisiti va vola, Henzi, Vahebraina va twuli mbogo bwa vivisa mu.

¹² Navandu vomu lugaga va tivulira Jonathan na uyu wa ginga vyuma vivye, ni va vola, Mwanegire yino, na ku la mmannya kindu. Na Jonathan ya volera wa mgingira vyuma vivye, Wanegire inyima wange, kigira Yahova u va viki mmakono ga Israeli.

¹³ Na Jonathan yanegira na a mola namakono gege nevirenge vivye, nowa mgingira vyuma vivye ya mu londa inyima: navandu yavo va gwa imbiri wa Jonathan; na wa mgingira vyuma vivye ya viitira inyima wewe.

¹⁴ Neliita yili lyokutanga, lya Jonathan ya kola na uyu wa mgingira vyuma vivye, lya duka kuli avandu makumi gaviri, mu kivala kyal duka kuli ligera lyenusu ya aker mbutambi bwakyo.

¹⁵ Nelidegera lya li ho mu mahema, na mu mulimi, na hagati ha avandu vosi; avandu vomu lugaga navalanyi va degera kandi; nekivala kya degera: nelidegera lya li ho linene ligali.

¹⁶ Navalindi va Saulo mu Gibea ya Benjamini va lola; na, henza, kiduma kya kama, na va tsia yiyi na yiyi.

¹⁷ Hene yaho Saulo ya volera avandu va li halala naye, Mu validze avandu kalunu, mu lole ni bwaha u twuli ku kwinye. Navo lwa va validza, henza, Jonathan nowa mgingira vyuma vivye si va veye ho.

¹⁸ Na Saulo ya volera Ahija, Leta yino lisanduku lya Nyasaye. Kigira lisanduku lya Nyasaye lya li halala navana va Israeli inyinga yeyo.

¹⁹ Na ga duka, lwa Saulo ya volerana nomusalisi uyu, liyoga lya li mu hokusosa ha Vafilisiti lya kira kumeda: na Saulo ya volera musalisi, U twulidze mukono gugwo.

²⁰ Na Saulo navandu vosi va li halala naye va vugana halala, kutsia ku lihe: na henza, kivavi kya mundu sa mulala kya li ku wakye, na ha li nekivihiri kinene ligali.

²¹ Kunangwa Vahebraina ava li halala na Vafilisiti ku matsyambiri, avanegira halala navo mu hokusosa, kutwula mkivala kya va kumbiridza, avandu yavo kandi va girunkana kuva halala na Vaisraeli ava li halala na Saulo na Jonathan.

²² Na ndiyo kandi avasatsa vosi va Israeli avivisa mu kivala kyevigulu kya Efiraim, yavo lwa va hulira Vafilisiti viruki, yavo va va londerera mu lihe.

²³ Na Yahova ya honnya Israeli lidiku yilyo: nelihe lya vita kuduka himbi Beth-aven.

²⁴ Avasatsa va Israeli va kupa kivi ligali lidiku yilyo; kigira Saulo yisuhidza avandu, na a vola, A laamwe umusatsa u lia vyokulia ku vyosi kuduka mgolova, na inze ndevanzira kisalya ku vasigu vange. Kunangwa si ha li nomundu kuvo wa tsatsama kyokulia.

²⁵ Avandu yavo vosi vingira mmulitu; na ha li nobwuki ku kivala.

²⁶ Navandu lwa vingira mu mulitu, na henza, ubwuki bu tonyatonya: navutswa si ha li nomundu wa vika mukono gwigwe ku munwa gwigwe; kigira avandu va tia lisuha.

²⁷ Navutswa Jonathan si ya hulira lwa dada wewe yeganehidza avandu halala nelisuha: kunangwa ya nyira isonga ye impimbo ya li mmukono gwigwe, na a gi dira mu lisang'asa lyobwuki, na ya vika mukono gwigwe ku munwa; netsimoni tsitsye tsya kunuka.

²⁸ Hene yaho mundu mulala kuvo ya tivula, na a mu volera, Dada wowo yeganehidza avandu budinyu ligali halala nelisuha, na a vola, A laamwe musatsa u lia kyokulia lero. Avandu yavo va li ni va daki tsingulu.

²⁹ Hene yaho Jonathan ya vola, Dada wange ya dambidza kivala yiki: henzi, mwadza, mu lole kuli tsimoni tsyange tsya kunuka kigira ntsatsami ubwuki bukekeke yibu.

³⁰ Nasindi, avandu yava ni va va ni va lia nokwiguta vilanye vyavasigu vavo vya va nyola? Kigira kalunu si ha veye neliita linene hagati ha Vafilisiti.

³¹ Navo va kuya Vafilisiti lidiku yilyo kutwula Mikimashi kuduka Aijalon. Navandu yavo va li ni va gehi ligali tsingulu;

³² navandu yavo va tuuma ku vilanye, ni va vugula magondi, netsing'ombe, nevimoli, nokutsiitira ha zana hasi; navandu va tsi lia halala namasahi gatsyo.

³³ Hene yaho va volera Saulo, ni va vola, Henza, avandu va koleranga Yahova ubwoni, kigira va litsanga halala namasahi. Naye ya vola, Mwinye mwa koli nobugadi: mu gomogominye ha mbeye ligina linene lero.

³⁴ Na Saulo ya vola, Mu salane hagati ha avandu, nokuvavolera, Mu lete ku inze sa mulala ing'ombe yeye na sa mulala ligondi lilye, mu viitire hano, nokulia; mu vule kukolera Yahova ubwoni mu lilia halala namasahi. Navandu vosi va leta sa mulala ing'ombe yeye halala naye budiku yibu, navo va tsiitira ha zana.

³⁵ Na Saulo yombakira Yahova ubwali: yibu nibwo bwa li bwokutanga bwa yombakira Yahova.

³⁶ Na Saulo ya vola, Gendi ku sulungute kulonda Vafilisiti inyinga yobudiku, nokuvalanya kuduka mugamba, ku vule kuleka kali mulala a tigale. Navo va vola, Kola aga u lola kuva bulahi. Hene yaho musalisi ya vola, Gendi kwisunde himbi ku Nyasaye.

³⁷ Na Saulo ya teva livola lya Nyasaye, Nda sulunguta nokulonda Vafilisiti naho? U la va vika mmukono gwa va Israeli? Navutswa si ya mu tivulira lidiku yili mba.

³⁸ Na Saulo ya vola, Mwisundi himbi hano, mwinye vosi avanene vavandu; mu manye nokulola ubwoni bwa lero bu veye mu inkuva ki.

³⁹ Kigira, kuli Yahova a veye mwoyo, u honnyanga Israeli, kali ni bu veye mu mwana wange Jonathan, ligali a la kudza. Navutswa si a li ho kali mulala, muvo vosi wa mu tivulira.

⁴⁰ Hene yaho ya volera Israeli vosi, Mu ve luvega lulala, na inze na Jonathan mwana wange ku ve luvega lundi. Navandu va volera Saulo, Kola aga u lola kuva bulahi.

⁴¹ Kigira yaga Saulo ya volera Yahova, Nyasaye wa Israeli, U lolekidze agobulungi. Na Jonathan na Saulo va vugulwa nekura; navutswa avandu va hona.

⁴² Na Saulo ya vola, Koli ikura hagati hange na Jonathan mwana wange. Na Jonathan ya vugulwa.

⁴³ Hene yaho Saulo ya volera Jonathan, U mbolere ga wa kola. Ma Jonathan ya mu volera, na a vola, Ligali inze nda tsatsama ku bwuki bukekeke ku isonga yempimbo ya li mmukono gwange; na henza, ga ndukira kukudza.

⁴⁴ Na Saulo ya vola, Nyasaye a kole kuli yaga nokumeda; kigira ligali ive, Jonathan, u la kudza.

⁴⁵ Navandu va volera Saulo, Jonathan a la kudza naho, na a li niye wa kola ubukonyi bunene mu Israeli? Auwa: kuli Yahova a veye mwoyo, si li la gwa hasi lisu kali lilala lyomutwe gwigwe; kigira a koli miyinzi halala na Nyasaye lero, ma avandu va honnya Jonathan, a vule kukudza.

⁴⁶ Hene yaho Saulo yanegira kutwula kulonda Vafilisiti; na Vafilisiti vatsia wavo.

⁴⁷ Lwa Saulo ya vugula ubwami ku Israeli, ya lwana navasigu veve vosi tsimbega tsyosi, ya lwana na Vamoabu, navana va Amon, na Edom, na avami va Zoba, na Vafilisiti: na ya guuta tsimbega tsyosi, kuli hosi ha ya girunkana.

⁴⁸ Naye ya kola nobuluviriri, na a kuya Vaamaleki, nokuhonnya Israeli kuvatwulidza mu makono ga yavo ava va lanya.

⁴⁹ Navana avayai va Saulo ni yava, Jonathan, na Ishiv-i, Malikishua; nameta gavakana veve vaviri ni yaga: lieta lyowokutanga ya lanwga Meraba, nomuke ya langwa Mikali:

⁵⁰ na lieta lyomuka Saulo lya langwa Ahinoam, mwana wa Ahimaazu. Lieta lyomunene welihe lilye ya langwa Abineri mwana wa Neri, wa li ise wa Saulo muke.

⁵¹ Na Kishi niye dada wa Saulo; na Neri dada wa Abineri ya li mwana wa Abieli.

⁵² Ha li ho ubulwani ubululu ligali ku Vafilisiti amadiku gosi ga Saulo: na Saulo lwa ya lola mundu wetsingulu, kinga muluviriri, ya mu leta kuye ave naye.